Sorkar ramah mimal an cheng maw!?
Tun hnai khan Luangmual rama Industry Growth Centre hmun mimalin chenna leh huan atan an nei darh nasa hle tih tarlan a ni a, chinfel dan kawng an zawng dawn a ni awm a, engtin tak chingfel ang maw? A huphurhawm dawn mang e ka lo ti ve mai mai.
Khawi lai hmun pawh hi sorkar ta a ni a, dan dik takin hmun ruak dilin sorkarin LSC min pe a, kan dam chhung bakah kan tu leh fate thlengin an la rochun dawn a ni a; a duhin an zuarin an hralh ṭhin bawk. Sorkar phalna thlapa kan neih kan ram chu zalen takin kan tih kual theih a nih chu.
Industry ram erawh chu sorkarin luah hawh tura a tih a ni a, a hmanna tur dik taka hmang tura a tihte'n an luahin an hmang tur a ni. Amaherawhchu, industry atan hmang ta lo, mahni chenna atan leh huan thlai siam nana hmang ta ngawr ngawr an tam ta viau mai. Hengho hi chinfel a har dawn hle niin a lang.
Kan Veng group changkang tak pakhatah industry ram mimal neih nasat leh an hralh hial chungchang kan khel a, a bikin Zuangtui Industrial Estate hi a nihna anga hmang lo an tam hle a, za zelah 90 aia tam mimal chenna leh sakhaw biak in awmnate a ni ta nawk mai. LSC an nei thiang lo a, local council pass tak ngial pawh an nei thei lo. Chuti chung chuan an hralh nasa hle a, ram hralh leh leina hmunpuiah a chang a ni ber mai.
Kan group-ah chuan ti hian ka sawi a, "Mipui awmnaah chuan sikul te, biak inte leh damdawi in thlengin a awm tur a ni," ka ti a. Ṭhenkhat chuan mak an ti viau. Zuangtui ngat phei chu kohhran hrang hrang biak in a ding thar zel a, biak in sa lai leh sa mek tur pawh an la awm zel a ni.
Zuangtui ramah hian ram an hawh chhan anga hmang zui zel an la awm mek a, an fakawm khawp mai. An tan chuan a ṭangkaiin mipui pawhin an chhawr lêt viau. Chuti ni loa sumdawn nana ram an hralh erawh chu mit a kham ve viau a, in hmun nei ve lote tan chuan an thîkawm ve duh ṭhin khawp mai.
Engpawhnise, heng hmun chingfel tur chuan eng party sorkar mah hian a thei dawn lo tih a chiang. A department enkawltu lam fel loh tam tak a awm ang. Ministry chhâwng eng emaw zat a liam tawh a, chinfel ngaihna a awm lo. Tuna taka chinfel tum chu thil har tak a ni tawh ang. Tuchhuan thlengin industry ram luahin mahni ta angin an lo chengin an lo enkawl tawh a, han tharthawh leh ngaihna vak a vang viau mai thei. Tu nge zawhte chu ṭhi awrhtir ngam ta ang le?
Ram luahtuin a luah dan tur dik taka luahte chhinchhiah se, an luahna anga hmang lo erawh chu sorkarin a âwm tawkin pawisa chawitirin pe law law ta mai se a fel ber mai ang em?
- Lal Rinmawia