THU+MAL

Thumal tih hi ‘'thu mal'’ tia a inzawm loa ziak kan pung mek niin a lang a, ni tin chanchinbuahte mi thiam nia kan hriat zingah pawh hetianga ziak hrang hi hmuh tur an awm chho ta zut bawk. Eng vanga hei leh chen mi tam berin 'thumal' tia kan lo ziah hi rawn ziak hrang nge an nih tih chu ka hre lo. Mi ṭhenkhat erawh chuan grammar behchhanin an ziak hrang bawk a nih hmel. Mi tam ber chuan 'thumal' tiin kan la ziak a, Mizo Language Committee danah pawh 'thumal' tia ziah a la ni. MLC dan hi tuna Mizo ṭawng ziah danah chuan a standard ber a ni rih a, zawm ṭheuh pawh tum i la a ṭha ang e.

‘Thumal’ leh ‘thu mal’ tih hi a fiah zawk nan entirna pahnih khat nen chauh sawi zui lawk dawn teh ang.

1 Korinth 14:19 ‘Nimahsela, kohhranho inkhâwmnaah chuan ṭawnghriatlohva thu sîngkhat sawi aiin, mi dangte ka zirtir theih nan ka hriat theihnain thu panga chauh sawi ka duh zawk a ni.’

Heti laia 'thu panga' tih hi 'five words' tih a ni a, a mala awmze neia ding hrang thei panga lek tihna a ni a, a tam lo hle. Hei hian Mizoin ‘'thu ka sawi dawn, thu a sawi, etc.,'' kan tiha 'thu' tih ai hian a huam zim zawk a ni. Mahse, Bible hian thu tih hi 'thumal' tlukpuiah a hmang a, hetianga hman chang hi kan nei reng reng bawk (dictionary-ahte pawh kan hmu).

Kan sawi tum bera chu, 'thu' tih leh 'thumal' tih hi inanga hman chang nei mah ila, a tam zawkah chuan 'thu' tih hian a huam zau zawk a, a inan loh chang a tam zawk daih a ni. ‘Thu hril, thu sawi’ etc. tia kan hmanna ang chi reng rengah hian thumal pakhat mai va thlur loin an sawi zawng zawng (thumal sing, sang, nuai...) a kâwk a, ‘thumal’ tih chuan thil pakhat, a mal pakhat, mahnia awmze nei hlawm tê ber chauh kha a kawk a ni.

Chuvangin, ‘thumal’ tih hi chu a pianṭo leh kan hman dan aṭang reng hian compound word a ni tih a chiang a, a hrangin kan ziak emaw, a inzawmin kan ziak emaw, a nihna a bo lo. Amaherawhchu, tun hma aṭangin solid compound word (ziah zawm chi) a ni a, vawiin thlengin a la ni reng a, mi ṭhenkhatin an duh danin an ziak hrang ve mai chauh a ni. Buai phahna tur a awm lo. Chu bakah, thu tih ringawt nen a danglamna hriat fuh a ṭul hle bawk.

Grammer vuakvet

‘Thu’ tih leh ‘thumal’ tih hi inang reng leh inang char char, hman thlak mai mai theih lo ni ta se, 'thu mal' tia ziah kher hi grammar dan a ni chuang lo. Compound thumal zingah hian 'attributive compound' a awm a; chumi awmzia chu a thumal inzawmah khan pakhat zawk kha modifier angin a khawsa a, a headword a modify ve a ni. Chutiang chu Sap ṭawngah pawh hian a ṭhen an ziah zawm a, a ṭhen an ziah zawm lo. Attributive compound ni vek si, ziah dan inang si lo chu a mak kan ti em? Chutiang chu hmân ata vawiin thlengin thil awmzia a ni a, ziah zawm emaw, ziah zawm loh emaw hian a dik vek a, a nihna kha a bo lo hrim hrim tihna a nih chu. A thiam ril zawkte sawi danin, compound word reng reng hi a tira ziah zawm ni lo pawh nikhaw reiah chuan ziah zawma hman zui a ni leh ṭhin zawk bawk.

‘Thumal’ tih pawh chu attributive compound a ni a, ‘thu’ tih hi a headword a ni a, 'mal' tih hi modifier angin a phusa ve tihna a ni. Thumal ṭang kawp emaw, ṭang khawm emawin awmze thar a puak chhuah hian a awmze puak chhuah chu 'awmze danglam (idiomatic meaning) a ni emaw, awmze danglam ni chuang lo, a thumal ve ve ang ngau ngau aia a awmze hrang ta hlek si ang chite a awm ṭhin. Thumal tih pawh hi idiomatic meaning nei chuang si loa eng emaw sawina bika hman ang chi chu a ni. Hetiang chi hi a tlangpuiin ziah zawm a ni chawt bawk. Chutiang chu zir thûk zawkte chuan 'semantics criterion' tiin an vuah nghe nghe. Chu vang chuan, ‘thumal’ tia ziah zawm hi a fuh em em a, a gramatikal a, a semantikal bawk a, a Mizo bawk a nih chu.

- Iril Fanai