Mizo media superstar

Mizote hi eng emaw chang chuan awmze nei mang lova mahni Mizopuite han sawh phuan a, han vawrh lâr hluai mai kan thiam riau a. Social media-in kan hnam nun a luh chilh a, a chinleh kual vêl tâk puat puat hnu hian tuipui loh atana ṭha zawk leh buaipui loh atana ṭha zawk han um zui luih luih chang kan nei ta fo mai.

Kan social ethics kalh leh kan rilru sûkthlêk tidâvâ theitu tute emaw, kan nun leh inrêlbawlna kawnga hnawk zet site dah superstar kan chîng thar hi kan tak lohzia lanna pakhat a ni thei! Mi awm ṭha duh lo, entawn tlâk lohte nunphung leh khawsazia vawrh lâr chiam kan hreh lo a. Nuihzat rûka kan neih han vawrh sân luih chiam kan chîng bawk. Hei hian kan nun leh hnam insawh nghehna lam a hawi lo tih hre reng chungin mi awm ṭha duh lo leh mi bâka che uchuakte a cho phûr ṭhin. Mi tak cheibâwla kan cheibâwl, uchuak taka social media kan vawrh lârte hian kan hnam ze ṭhenkhat a tarlang tih ngam a ni.

Kan thutakpui hleih loh kan chei ‘mi chungchuang’ a, kan bâwl zân mai mai nia kan hriatte zûnah kan inhriat loh hlanin kan uai zui thung. Makna leh danglam bîkna tawktarh hreh rêng rêng lo, mi uchuakte tiuchuaktu chu an tána kawng hawnsak ṭâlh duh mi pangngai nia lang, pangngai si lo lawm ru tlatte hi an ni! Vawrh lâr tur kan duh luatah social media-ah tute emaw bâwlzân a, hmasawnna hawi lo leh thil pangngai lo tak tak hmangin kan au chhuak ruai ruai ṭhin. Hei hian kan hnam nun a nghawng thui hle thei a; tin, kan hnam nun darthlalang a ni reng thei bawk ang.

Social media hi platform thiltithei deuh a nihna a awm a; chu chu hre rânin mi tam tak chuan mak leh lâr khelh nan an hmang hreh lo. Mi a zah loh phawt chuan social media superstar ni turin a qualify em em. Chutiang mi chu an lo chhuak tluar tluar mêk bawk. Mahse, social media superstar nazawngte nunzia te, an ṭawngkam te, an nihnate hi kan hnam ṭhang mek tan hian a him em tih chhût chian a hun! Social media-ah hian engkim a leng thei, tia sawi theih a nih rualin, kan rilru sûkthlêk siamtu pawimawh tak a nih avangin awm herh satliah leh zak thei lo fâlte khawvêl inhluisak zawnga kan hman hi a him lo a ni.

Mizote nunah social media hian hmun a chang thûk tawh em em a, min kiansan tawh kher lo ang. Kan nun leh social media kan thlun zawm chial avang hian kan tán kîr leh rual a ni tawh lo. Mahse, he hnam hian social media superstar a thlang duhdah chho ngar ngar a nih chuan kan hmabak chu mi zaktheilote rorelnaa inbarh luh chiah a ni. Mi pangngai chinin an tih duh loh tur, thiangzauna râu ruih chilh a, over-na tui nû rûitute târ chhuahna tura dawhsân kan dawh lui mawlh mawlh mai hi chu kan ngaihtuah chian loh vang liau liau a ni.

Mak leh danglam ûm a, uchuakna kawnga mi bâka kal filawrte hi keini chuan social media superstar-ah kan chhuah chho deuh ngar ngar a. An thil tih leh nunphung kan entawn duh reng reng lohte kan sopui bulh bulh ṭhin hi ngaihtuah tham a ni. Entawn tlâk loh ngialngan tak tak kan vawrh darh chiam chiam fo a; sim daih se kan duh ngawih ngawihte nun dan leh khawsak phung kan vaw lian tual tual a. Chhuan lo awm zel turte’n an rawn ngaisang ang tih hlauhawm tak, an zirtirna leh an khawvel nun dahlau em em maite kan sûkpui dup dup ṭhin hi sim atan a ṭha a ni.

Mizo social media superstar tam takte hi lâr lo atana îtawm leh hnam ang pawha thup bo atan ṭha zawk an ni a. Kan vawrh darh video clip tam tak hi Mizo khawvêl hian theihnghilh hmak thei ila a duhawm zawk. Kan uanpui tam tak hi uanpui lova lâk thutak chi, vawrh darh lova nuai chimih zui tur a ni zawk mah ang. Kan haw hawpui thil tam tak hi huaisen taka rahbeh chi zawk a ni. Kan hohpui thil tam tak hian kan takna a ei dal a; kan fiamthupui nia kan hriat thil tam tak hi kan hriat loh lama kan hnam nun rêk chhetu a ni. Chuvangin, hnam pumpui ṭhatna tur ngaihtuah ila, kan ṭhatpui hauh loh tur hi chu tár langsar duh lo ngam ila. Kan hnam nunin a entawn atana kan duh loh tur thil hi chu i beng hniam ngam teh ang u.

- C Lalbiaknunga, Durtlang North