Hruaitu nih ka tlin lo ang

Local TV-a news ka en chang hian Central YMA, MHIP, MZP, MSU, MUP-te telna news hi zan tin deuhthaw en tur hi a awm ta a, heng pawl hruaitu hi ka ni ang tih ka hlau. Ṭhenkhat hi chu kan minister-te ai pawha TV news-a lang tam zawk an niin ka hria. Minister publicity thiam lote leh hna pawimawh lo deuh chang chu kan hmu ngai lo, NGO hruaitu chu kan hmu reng mai a ni lo'm ni?

Hman deuhah khan Central YMA hruaitu ni tur chuan sorkar hnathawk lo a ṭhat thu an ziak kha ka chhiar tawh a, kha kha a hunlai khan ka ngaihtuah chiang ngai lem lova, tun hnua ka ngaihtuah lêt hian an lo thlir dik chiahin ka hria. Tunah hi chuan sorkar hnaa an nihna vang ni lo, Central YMA-a an nihna vangin sorkar committee pawimawhah central YMA hruaitu kan hmu leh vûng ṭhin a, a inhmeh loin ka hria. Ka sawi duh rtak zawk chu heng mite hi an office lamah hian an âwl tawp nge ni office hi an kal ṭha lo hrim hrim zawk? tihte hi ka ngaihtuah zui a ni.

MUP hi chu pensioner an nih vangin an free deuhah ka han ngai a, anni hi chu programme hi a zawnin zawng pawh ni se an inawm tleina a nihna chin a awm avangin kei chu kan hmu ngun deuh a nih pawhin mak ka ti lova, MUP tak hi chu kan hmuh khât deuh chu an ni leh lawi si. MHIP hruaitu ni chunga in chhunga nu ṭha tak nih kawp pawh hi a harsat hmel hi ka ti a, pawl thil pawimawhah an chhuak an chhuak ve bawk si a, a hahthlak ngei ngei ang tih ka ring a ni.

Tichuan MZP leh MSU lam hi han thlir leh ta ila, anni hi full time worker angin an kal a nih law law hi maw, ka ti rilru deuh a, zirlai hruaitute hi chuan zirlai tak hi chu an ngai serious vak lo a nih hmel a, zirna lamah an hmel hmuh tur a van hmel hle lo maw? lo chhut ve chhin teh. Anni hi crisis hunah an ṭangkai a, hnam thilah hian an ṭha riauva, mahse hlawh nei si lova full time-a thawh hi chu kei nia ng tlin ve chi a ni lo.

Sports associaition lam pawh hi an rim khawp mai, anni pawh hi an nitin hnaah an chhawrnaawm vak lovang. Kohhran Upate pawh hi semi full time chu an nih tak ber hi maw, inneih leh mitthi vuinaah 'Kohhran Committee nen' tih a lang ve ziah a, kohhran lian deuha lawi kohhran upa-in mitthi leh inneih a kal kim dawn chuan a eizawnna lam chuan a tuar ve viau dawn a nih hi, tihte ka ngaihtuah ta vel mai mai bawk a, eng hruaitu nih mah hi kei ni ang tlin chi a nih loh hi ka ti ta mai.

Engpawhnise NGO hruaitu ni tur hi chuan eizawnna lama ngaihtuahawm lo, private-a eizawng hi an ṭha ber em ni aw ka ti. Kohhran hruaitu hi chu thingtlangah chuan sorkar school zirtirtu an ṭha a, pawisa nei, hun nei, zahawm ve tho si an ni a, khawpuiah hi chuan sorkar hnathawk chunga kohhran hruaitu ni tur chuan sorkar hna thawk chhe tak nih a ngai a nih tak ber hi.

Ngaihtuahna vak vel hian thil tam tak ka ngaihtuah ṭhin a, tuna kan kal dan hi Mizoram tan a la ṭha bera kan ngaih a nih chuan kan mi pawimawh kan tih zawngte hi mahni hnaa thawk hman bar lo an ang ka ti ta a ni. Hei hi ngaihtuah zui chi, ngaihtuahna sen zui ngai, ngun taka ngaihtuah hnuah chauh sawi zui chi niin kei chuan ka hria, kan ram kal dan hi mak ka ti a ni.