'Zirtawpni 13' tih kha

Zofaten kan ngaih­san em em English-ho khuan No. 13 hi Nambar vanduaiah an ngai an ti. Chuvang chuan, an thlawhna, bus leh cinema hall-ah te no. 13 an dah lo te an ti. Anni ai maha tam takin kan ngaihsan zawk American-ho erawh khu chuan hlauh a hnekin an ngaisang zawk tlat an tih pek chu. A chhan chu -

- States 13 inthurualin USA an din.

- An seal-ah khuan, arsi 13, rin, 13, thal lem 13, chhum (cloud) lem 13, laurel hnah lem 13, arhmul lem 13, hawrawp 13 a chuang.

- An President 7 te hming chu hawrawp 13 vek.

- An President 2 te chu ni 13-a piang an ni.

- An hnam hla 'Star Spangled Banner' khu 13.9.1814 a phuah a ni.

- An hnam indona 'War of Revolution' ah khan, ni 13.6.1778 ah France-in an pui.

- An hnam thupui khu hawrawp 13 rem­khawma siam a ni.

English-ho khuan, Friday 13 a nih phei chuan an hlau (râp) lehzual an ti; chutih laiin American-ho chuan an ngaisang zual sauh. A vang chu - an ram election ṭum 1-na, Georgia luah ṭan ni, University of Pensylvania, N. Carolina hawn ni, White House sak ṭan ni, George Washington-a'n E-in-C a kai ni, Arkansas Dan siam ṭan ni, Mississippi fintu Naromiyocknow-husunkatankkhunk hnar an hmuh chhuah ni, Dil te tak te chargoggagoggmanchauggagoggchaubunagungamaugg an hmuh chhuah ni te a nih vang a lo ni.

Heng hi an ram lehkhabu pawimawhah an chuang vek. Mak dangdai ve leh mai mai chu - Baseballer G. Jack Curtis kha ni 13.11.1908 ah piangin a fapa Dan kha ni 13.9.1929 ah a piang a. Dan fapa Darryl kha ni 13.10.1967 ah a piang ve leh. An pian nite hi Friday vek zuk nia!

Pa ngaihsanawm Billy Graham leh Ruth Bell te inneih ni kha, Friday 13.8.1943 a ni bawk. Zoramah pawh -

- Ni 13.11.1987 khan Himalayan Car Rally-a telin Aizawl a rawn lut.

- Ni 13.1.1989 ah PM Rajiv Gandhi a lo zin.

- Ni 7.7.1990 a London-a thi Pu Denga, ni 13.7.1990 ah vui a ni.

- Ni 13.9.1991-ah Lunglei Tennis Court-ah Beat Contest nuam ropui.

- Ni 13.6.1997 ah Rih Dil kamah MZI Inter­national Concert neih a ni.

Sports huangah pawh sawi tur a awm. Fraternity Gold Cup football, ni 7.12.1994 khan, AR bawng kawlhin Meghalaya No. 13 Shyam Rumnong a vawrh. Indian Hockey player chhuanvawr Balbir Singh te, FIFA World Cup 1958 Top Scorer France No. 13 Just Fontaine te, 1966 Top Scorer Eusebio te, 1970 leh 1974 top scorer Gerd Muller te, Michael Ballack-a'n Chelsea a rawn zawm khan Gallas no 13 a rawn chhuhsak.

USA Women's Football team captain, Kristine Lilly khu ram tana ṭum 300 zet khel tawh a ni!

Zoram milar, ni 13-a piang tam tak zingah pawh - Rev. Dr. C.L. Rema, Rev. Dr. PL Lianzuala, Pu C. Saizawna, Pu J. Lalsangzuala, Pu Lalsangzuala (Sudden Muanga), Pu Zoram­thanga Ex-CM, Pu B. Lalthlengliana leh Pu C. Vansanga.