Total bandh neih hi

Mizoram political party lian ber zinga mi leh opposition party lian ber MNF party te chuan Febuary ni 25-ah, Mizoram pum huap Total Bandh neih an tum thu an puang leh ta a, bandh neih an tum chhan hi eng pawh chu lo ni se la, Total Bandh neih hrim hrim hi kan ram leh hnam tan hian a ṭha em? tih hi kan ngaihtuah tur niin ka hria.

Democracy ram kan nih angin kan lungawilohna te, kan duh zawng te, kan duh loh zawng te hi zalen takin kan lan chhuahtir thei. Amaherawhchu, he kan zalenna hi kan hman thiam loh chuan, kan chhiatpui ve der thei tho a ni.

MNF party-ten Total Bandh neih an tum chhan hrang hrang hi ngun taka han ngaihtuah chuan eng tik niah emaw tu pawh lo sawrkar se, kan hmabaka kan tih ngei ngei tho tur thilte a ni. Amaherawhchu, opposition party an nih anga advantage (hlawkna) lo neih an duh a nih pawhin mipui zawng zawng tawrhtir loa an duhlohna hi kawng dangin lantir thei se, a duh awm hle. A chhan chu total bandh vang hian mihausa, sumdawng liante leh sawrkar hnathawkte chuan an tuar dawn hauh lo a, a tuar turte chu mirethei, nitin eichawp zawnga nung ve hram hramte hi a an ni. An thlavang an hauh saka te ber chu a tuar ber turte an ni dawn tlat hi a ṭhat lohna chu a ni. Sawrkar hnathawk leh sumdawng liante phei chu chawlh an pe a ni ringawt. Mizoram pumpuiin nikhat hnathawk loa hun kan paih hi, a sum zawngin chhut ta ila chuan Mizoram hian kan hlauh nasa viauin a rinawm.

Kolkata khawpui khu British hun lai leh India-in zalenna a hmuh tirh lam kha chuan India rama khawpui lian leh sumdawnna hmunpui, khawpui ṭhang duang tak a ni ṭhin. Mahse communist party-ten hun rei tak ro an rel chhung khan, nawrhna chi hrang hrang Total Bandh, kawng zawh leh motor kawng danpin etc. te hi a tam lutuk a, an economy-in a tuar hle. Company-ten sum nasa tak an hloh ṭhin avangin, Kolkata khawpui aṭangin hmun dangah an insawn a, tunah chuan khawpui dangten nasa takin an lehpel tawh a ni.

Sawrkar thil tihah kan lung a awi lo a nih pawhin mipui nawl pui harsatna siam lo zawng leh kan economy-in a tawrh lohna tur zawnga kan lantir hi ram leh hnam hmangaihtutena kan tih tur a ni. Ṭha zawka chin fel dan tur hre si loa sawrkar thil tih kan dodal vak te a nih phei chuan a ṭha lo lehzual ngawt ang.

A thu hrimah Public distribution system hnuaia buhfai man tih pun te, PHE tui kan dawn man te, P&E Deptt. in electric kan chhit man a tih san te hi heti lutuka hriat thiam loh tur a ni loin ka hria. Buhfai hi tunah hian Mizoram sawrkar hian FCI-ah Kg-ah Rs 30 bawr velin a lei a, thla khata Mizoramin kan mamawh hi quintal 80,000 vel a ni. Kg 1 Rs 15 a APL chinin kan lei hian kan sawrkar hian chheng vaibelchhe tam tak a la hloh tho a ni.

Tui bill-ah leh electric bill-ah pawh hian, he tia a san tawh hnuah pawh hian sawrkar hian sum a la hloh char char tho a ni. Tin, thisen sawngbawlna man Rs 550 lak pawh hi chhung kaw tam tak rethei tak tak tan chuan phur rit chu a ni ngei mai, amaherawhchu, heng sensote hi Health Care Scheme hnuai aṭangin, a bill leh vek theih tho dawn niin a lang.

Indian ram state tam zawka mite hi chuan an thawhchhuah (income) aṭangin sorkarah chhiah nasa tak an chawi vek a, eng sawrkar mah hian a hran pa in pawisa hi an nei ngawt lo, mipui aṭanga chhiah an lak khawm vek a ni. Khawvel zau zawk thlir phei chuan, nun khawchhuahna senso (cost of living) hi a sang hle a, nung khawchhuak tur chuan nasa taka hna an thawh a ngai ṭhin. A thlawn deuh thaw a engkim mai hi dawng tur kan ni lo a, kan thawhchhuah ve a ngai a ni.

MNF party te hian ngun takin ngaihtuah nawn leh hram se la, an lungawi thei ngang lo a nih pawhin mipui tana harsatna siam lo zawngin kal pui theih dan hram a awm lo'm ni?