Zu an zuar dawn ta

In ṭhenawm lawkah zu an zuar dawn tih hre reng chungin i fate kha tunah lo hneh tum la, zu zawrh tumtu lam chu i hneh tawh loh avangin zu in lo turin nang leh i chhungte in inrin a ngai tih hi lo hre ve rawh.

Mihring chhia leh ṭha hre chin tawh ni si kan ei leh in tura inkhapsak ngai khawpa sawngnawi angin Mizo hnam hi kan inhmu rei ta a, chuvangin sorkar pawhin, "Nangni chuan zu in ve suh u," tiin kan duha kan in a, kan duh loha kan in loh mai tur zu chu min khapsak ta hial mai a, hun rei tak chu khapsakin kan awm ta.

Hetih chhung zawnga Mizote inzirtirna chu 'zu hi sual tinreng bul a ni a, zu i in chuan kohhran leh khaw­tlangah ngaihsan i hlawh lo ang a, zu i in vaih chuan i sual hle a ni ang' tih a ni.

Hman ni khan whatsapp-ah hian message pakhat ka dawng a, chuta inziak chu a ziak ang diak diakin hre tawh lo mah ila ka hriat chin chin ka han sawi chhawng ve dawn ang e. "Miin a eirukin car a lei a, sualah kan ngai lo. Miin a eiruk tih chiang takin in ṭha deuh mai a neia sualah kan ngai lo mai ni loin kan lawmpui zawk. Miin ama thawhchhuah ngei aṭangin zu a lei a, chu pa chu sual let derah kan ngai," an han ti a, hei hi Mizoram rilru sukthlek a ni.

Zu hi sawi mawi ka tum lo. Zu vanga thihna leh sualna tam tak thleng, nupa inṭhen leh thil ṭha lo thlengte hi ka hre hnem hle a ni. Zu hian ṭhatna a neih pawh ka hre lo.

Ka sawi tel duh chu zu hi hlauhawm a ni lo. Zu hi i hlau lo ang u. Kan in duh lo a nih chuan i in lo mai ang u. Tunah pawh a in duh tan chuan zu in tur hi a tam khawp mai. A man a to a, a zu a chhe deuh bawk.

Mizoramah zu zawrh a nih hun chuan zu a ṭha sawt ang a, zu man a tlawm sawt ang.

An zawrh hunah chuan zu ruih vanga accident-a thih phah an awm ang. Tunah pawh zu ruih vanga accident-a thihna hi a thleng reng. Zu rui an insual ang, tunah pawh zu rui an insual fo.

Tute emaw zu zawrh leh khap vanga him tum lo la, zu an zawrh hunah i duh lo tak tak a nih chuan in lo turin i rilru siam mai la, in chhungkuain lo sawiho ṭhin rawh u. Zu hi ka fak lo a, mah se zu hlau hi chu ka ngainep khawp mai.