ZPM sawrkar thil tih fakselna tlem
Ṭha ka tihte
* ZPM party kaihhruai sawrkarin ration card var hmangte tana buhfai khulna man a tisang hi a lawmawm ka ti viau. A huaisenthlak ka ti. Card var neite hi khawsak harsa vak loa ngaihte an ni a (an zavai chuan an ni kher lo ang), tam tak chu ration khul ngai lem lo, bazara buhfai ṭha zawk leh man to zawk leia ei ṭhinte an ni. Ration khul ngai vak lote leh bazara buhfai lei tura harsatna nei miah lote thlenga sawrkarin buhfai man a tumsak reng hi a ṭul lo.
* Petrol, diesel leh lubricant hoa chhiah (VAT) an tisang pawh hi a ṭha ka ti viau a, stamp duty an tisang pawh hi a ṭha ka ti hle bawk. Opposition party mite'n an sawisel hi chu - chhiah tihsan ṭha lo an tih vang hrim hrim ni loin, sawrkar sawiselna remchanga an hman duh vang mai mai a ni.
* AMC corporator-te leh LMC councillor-te hlawh an tipung hi a ṭha ka ti a, a lawmawm a, corporator/councillor-te an lawmpuiawm. A hma khan an hlawh a tlem ka ti thei khawp a, Mizoram sawrkara thawk nghet group-D ai pawhin an hlawh a tlem zawk a, a zialo a ni. An nihna nen a inmawi lo. Khawpui enkawl tura mipui thlan tlin an ni miau tlat. Aizawl bikah chuan corporator pakhat hi MLA pakhat zatve ang vel an ni. A awmzia chu MLA pakhat bial chhungah corporator pahnih zel an awm tihna a ni. Chuvangin, mipui thlan, mipui tam tak aiawh an nih angin hlawh ṭha pangngai tak neih an phû em em a ni.
Ṭha lo leh ṭul lo ka tihte
* Chief Minister-in Adviser a nei chiam mai leh OSD a neite hi ṭha ka ti lo hle a, a ṭul lo. Adviser nei duah lo pawh hian ṭha takin hna a thawk thei ngei ngei ang. MNF sawrkar hmasak hun laia CM-in Adviser a nei duah a, mipuiin nasa taka an sawisel leh an nuih lai ai khan tuna kan CM hian Adviser a nei tam tawh zawk. Ṭul loa sawrkar sum tam tak sen belhna a ni a, tihtawp theih ni se a ṭha ngawt ang - Year of Consolidation nen a inhmeh lo.
* Education Department leh Land Revenue Department-ah officer rank sang tak tlukpui Consultant an ruat hi a ṭha lo, a ṭul lo lehzual. Mizoram tan, sawrkar tan leh an awmna department tan hmasawn phahna tur sihsên tiat pawh ka hre lo. Hmasawn phah chu sawi loh, Department-a hotute leh thawktute tibuaitu leh tilâitu mai an nih ka ring. Education Department-a officer pakhat chuan Consultant chu engtiang taka dah pawimawh tur nge, engtianga dawnsawn tur nge hriatthiam a har thu a sawi nghe nghe. Ṭul hauh loa sawrkar sum tam tak kal ralna tur a ni a, Year of Consolidation nen a inkalh tlat a ni. Consultant ruat pawh hi titawp se Mizoram mipui hi kan lawm zawk ngawt ang le.
* MLA-te sawrkar sum hmanga car leisak an titawp hi a ṭha tho nain, a ṭul ka ti lem lo. MLA ṭhenkhat chu a hmaa khawsak nuamsa tak an ni bik lo ang, car nei sa lo pawh an awm nual mai thei. Chung mite dinhmun thlir chung chuan car an lo inleisak ṭhin kha a pawina ka hre lem lo. Tunah car loan cheng nuai 15 thleng lak an phalsak leh tho a, MLA-te'n an la tawh bawk nia sawi a ni. Car inleisak loh chhan ber - sum renchem tih kha chu awmzia a awm leh ta vak lo chu a nih hi.
- Zoramchhana