OH.... DAVID!

Hetia British PM meuhin i bàn thu i han puang ta thut mai hian mi va ṭháwng ve le. Kei aia thla nga laia naupang, Zoram buai kum, 1966 October ni 9-a piang ve chauh, kum 50 pawh la tling 've' lo i ni chunga Kumpinu sorkara kum 6 lai PM ni thei tawh hi ka lo chhuang viau che a, kei lah thlawhbâwk VC takngial pawh ka la ni dèr si lo.

European Union-a tel chhunzawm zel leh chhuahsan chungchanga mipui ngaihdan lo lang kha sorkar bànna tur hial a nih phei chu ka lo la hre reng reng lo pek a, keini lam hian kan hun tiam hman zawh hram hram hi kum leh khuaa kan lo tihṭhan a nih avang leh, kan enkawl Department-ah eng anga hmingchhiatna nasa pawh thleng se, kan ṭhutnaa ṭhut fan fan hi kan tih dan phung ang deuh a nih tawh avangin, kha EU referendum an tih teivet khan 10 Downing Street aṭangin a kar phawng ang che tih ka lo ngaihtuah lo hrim hrim.

Nang lah chu nimin khan i chenna, i pisa ni nghal bawk, 10 Downing Street kawtah i ding a, i sir lawkah i nupui, Samantha kha a pawnfen sen nen i dintir sauh sauh a, 'Ka báng dawn. Mipuite duh dan hi zah leh pawisak a ngai. October thlaa Conservative Party Conference hma-in ka kiang ang' i ti ta hmiah hmiah mai si a, i nupui pawh hian a remti meuh maw? Keinin lal nupui nihte nuam kan tih tehlul vei nen. Iron lady, Margaret Thatcher-i meuh pawh kha Downing Street chhuahsan hlen tura car nalh fahrana a tleng chhuah ni khan, kha kahpathir thinlung pu, hruaitu chhuanawm elkhen, Irish Republican Army (IRA) hel hovin a thlenna hotel-a bomb an tihpuah dup dup pawha zãm lo, in Ropuiliani ve kha, kha meuh pawh kha a mittui a tla asin. PM nihna bansan hi a namén lo tih leh, 'Ram te, thiltihtheihna te, ropui te' hlutzia leh thlakhlelhawmzia hi kan hriat tluk hian i hre ve lo a ni phawt ang.

Nang phei chu e ka nau (kei aiin naupang hek che), 'Prince Charles leh Diana te inneih ni khan kawng sira dinga flag lo vai zingah khan ka tel a' te kha i ti mai mai a, nikuma in inthlanpuiah lah khan khawvel beisei khûm dâwrhin i party kha i chakpui leh ta mai si a. I hmakhua hi a èn tehlul nen, engtin tak chuan i awm zel dawn ta chu ni maw? Kum 2001-ah, kum 35 mi chauh i nih lai khan Oxfordshire bial MP i ni ṭan a, 2005-ah in party hruaitu i ni ta mai a. Kum 2010 inthlanpuiah party chak fál an awm loh avangin engtin tin emaw PM i ni ṭan a, nikum inthlana in chak kha kum 1992 hnu lama in party chak hmasak ber a nih hial kha, kha khan eng ang politician nge, eng ang hruaitu nge i nih a tichiang khawp mai. I hming lah hi Cameron ni na na na, World Cup Football-a Cameroon ho, thim thuah hnih ni àwm tak tak, chak nek si kan lo hmuh tawh avang khan, mi pangngai deuh deuh hian David Kamerûn-a kan la ti fo che lehnghal a, kan hriat fuh hmain bàn i lo puang leh hman dèr bawk si.

I huaisen angreng a, thil pawimawh deuhah hian, 'Mipui ngaihdan la ila' i ti mai zel a, kum 2011-ah pawh British PM te zinga European Union treaty hnawl hmasa ber i nih tawh kha. Khami kum aṭang khan mipui ngaihdan lâk hi i ching ta a, Scotland zalenna chungchangah pawh 2014 September thlaah mipui ngaihdan i la a, European Union-a in ram tel zui chung changah pawh hian mipui ngaihdan lak hi kum 2013-ah daih tawh khan i tiam a nih kha. I ropui ngawt mai. Prince Andrew leh Prince Edward-a te nena in zir chhuahna, Heatherdown School te, Eton College-ah te khan ngaihhlut tur dik tih te, sum leh thuneihna aiin hmingṭhat hi thlan zawk tur tih lamte hi in lo zir uar viau emaw ni? Hei i la pass zel lehnghal.

O-level in tih mai in zir lai vela ruih theih thil (cannabis) i lo zûk ve avanga an man che a, an dâwp che khan, "Aw. Ka zu ngei e" tiin thudik kha i lo dinpui tawh a, hrem nan Latin ṭawng tlar 500 an ziahtir che kha tiraw? I zûk leh zûk loh tak tak kha finfiah theih ni tawh lo mah se, hnawhchhuah hial huama thudik i han sawi tlat mai te kha, kan rama zirlaite scholarship dilna form-a 'Annual Income of parents' endiktu atan hian i
ṭhat hmel ngawt mai.

Tak a, Kelkang harhna angte kha in nei ve ngai em? Hnehna te in puang ve ngai em le? Testimony te hi in sawi ve fo em? Kan chan ang chang si lo hian engtinnge maw thudik hi in dinpui tlat theih bik aw? Engpawh ni se, i bàn hunah i hman viau tawh mai thei a, lo zin la, 'Mipui leh ram kaihhruaina kawnga ka ngaih pawimawhte' tih thupui hi rawn sawi la a va ṭha àwm ve. Ka lo hmuak che ang a, Sakawrtuichhùn kawngah kan dâk dùn âwrh âwrh dawn nia.

- RK Lianzuala