Zirlaite leh Zonunmawi
Lehkha thiam tak, degree sang pui pui nei, mahse kan pipute rohlu zonunmawi chhawm tel miah lo kan pung thur thur mai: eng nge a chhan ni ta ang le? Kan pipu, kan nu leh pate hun lai aiin tunah hian rualelna a nasa tawh zawk a, kan rilru pawh a changkang tawh zawk.
Kan fate sikul ṭha ber berah kan luh tir a, zir sang satliah ni lo mithiam tak tak ni turin kan fate kan fuih a, a lawmawm hle. Chutih rual chiah chuan Mizo kan nih chhunga kan thil neih hlu ber tlawmngaihna, aia upa zahthiamna, rinawmna - a tawi zawngin zonun-mawi kan zir tel ta lo erawh a pawi hle!
Bus chuannaah pawh zirlai uniform hate'n aia upa leh tar chak lo zawkte ṭhutna ken nangchang pawh kan hre ta miah lo.
Tun kan hun hman mek hi ṭhenkhat chuan ‘Me Generation’ (kei-mah ti zelho chhuan) a ni an ti. Kan rilruah rualelna a lian a, a ṭha ber nih duhna kan nei ṭheuh. ‘ A ruh no no chhuakah’ tih chu kan zirlaibuin min kawhhmuh mauh mai bawk si. Chutiang rilru pua kan hmalam hun kan thlir avang chuan mahni chiah kan in ngaihtuah tawh a, ‘sem sem dam dam, ei bil thi thi’ tih nun hi kan lo nei tawh meuh lo.
Science & Tech-nology khawvelah kan cheng a, Facebook leh Internet hmangin zan rei tak tak kan meng a. Zing kan tho tlai a, nu leh pa te chhawk zangkhai leh ṭanpui hman lo ṭhalai kan ni ta. Khawhar inah zai laiin phone kan khawih mual mual a, khawhar in riahnaah zan rei tak tak thleng phone kan khawih bawk.
Zonunmawi zir chhuak lo leh nunpui lo mithiam chu MLA, Officer leh Upa pawh nise kut tling loa hnathawk ṭhin an ni zel ṭhin. Zirtirtu ropui Isua kha Mizoah piang se a zirtirte leh mipuite hnenah hian Zonunmawi hi a zirtirin, tlang chunga a thusawi-ah te khan a zep tel ṭeuh ngei ang. Tirkoh Paul-a kha Mizorama piang nise Ephesi khaw mite lehkha a thawnah khan an nitin nunah zonunmawi hi a taka hmanga an bula mite
ṭanpui turin a fuih sauh sauh ka ring.
Mizo kan nih chhung chuan finna ril zawng zawng te hi Havard University aṭang pawh-in lo zir chhuak mah ila, zonunmawi kan zirchhuah tel si loh chuan kan famkim tak tak ngai lo ang.
Khawii University aṭang pawhin zir chhuak ila, hnam nunphung leh ze mawi kan hloh chuan kan boral dawn tho. Zonunmawi degree lak tel ngei tumin i zir sauh sauh ang u!
- Rinfela Zadeng ATC, Durtlang