Fak Dertu Lakah Fímkhur Rawh

In bàwl kan uar lutuk hian fakna ṭawngkam mawi tak kha a tihmélhem a, fakna dawngtu nih pawh thil nuam lovah kan chhuah chu a ni titih ta dèr mai! Kam thlum satliah hian hmasàwn tùrin min cho chhuak lo va, mi pangngai chuan ménah an thlâk zâwk ṭhìn.

Thu sawitu chuan a sawi ṭhat tehlul nèn, saum bàwl takin kan báwl a, "Nang hi a ngheta lâk làw làw chi i nih hi," kan tih loh leh, "A bu ang thlap a ni, a káwm siam law law ila," te kan ti thùl. "I thu sawi hnua sawitu nih a va hrehawm dáwn êm! Mi dang tán sawi ve ngamna chi pawh a ni tawh lo," tia kâp zuiin, "Speaker ni la ka zui ang che," tiin ṭhenkhat lah chuan nui súngin kan han chibai a; an thu hla min hnehtu awm mang si lova inbáwl satliah kan ni tih hai rual a ni si lo. "A làwmawm hle mai, i thusawi khân min hneh lutuk," tih mai te, "Kha ngei kha ka lo vei ve ṭhin, ka sawi chhuah thiam loh a ni a, ka hlâwkpui tak zet e," tih te hi a awihawmin a dawnsawn a nuam zâwk hle si a! Mahni leh mahni pawh kan inpawm hauh loh, kan nihna ni rëng rëng lova infak chu kan ngaina lo va, min fak lai reng pawhin tlànsan daih kan duh ṭhìn.

Ṭhenkhat chuan mi ang pha meuh lo pawh celebrity-a inngai khawpin kan báwlzän peih a! Tih loh tùr tùr an tih phah a, kan lo hlimpui zawmah a. Mi ropuite chuan an fa pianphunga rual ban meuh lote pawh kaihruaiin mi pángngaiah an chhuah a, keini zawngin a mi ang sa reng pawh kan chhawnchhaih khawlo zo vek ṭhìn a nih hi! Mihring tam lam chhûta zaithiam ngah hnam kan ni hi kan vànnei hle. Chutih rual chuan mi bàwl chíngte avàngin celebrity nia inngai kan ngah lu deuh niin a lang. Hei hi entírna pakhat mai a ni. Hmaichhana mi ropui tak anga min cheibáwl ṭhìnte hian hnunglam aṭang chuan eng hèhù-ah min ngai lëm lo tih hriat a ṭha. “Ka pu, ka pu,” min ti duan duantute hian, “Chhúra awm ta lo ve,” tia min nuih zui loh nán invèn a ṭül hle.

Fakna dawngtu nih hi a nuam khawp mai, min tiphürin hmasâwn tùrin min pui thei. Kan ṭhatna lai hmu ṭhìnte kiangah chuan kan tleiin anmahni pawh kan ngaina nghâl thuai a. Chu chuan ṭhianah min siam mai ṭhìn. Kan nihna hre chiangtuten kan ze mil tâwk leh keimahni kan inhriatna ang tâwka min fak phei chuan kan lem duak duak a, min fak hluak lo mah se min zilhna leh fuihna thlengin dawnsawn nuam kan ti ṭhìn. Chawimawi phúte thinlung taka chawimawi nacháng hriat hi a class a sáng hle a, mi zawng zawng tih theih a ni lo. Thîkna tel hauh lova mi dangte duhsakna lantír hian an thlen phâk loh ram thleng tùrin a pui ṭhìn.

Ṭum khat chu Biak In kawtah ka hmélhriat pakhat hian min lo nghâk a, "In zai ka hriat tawh zawng zawngah a la ngaihnawm ber mai, chibai tlâk loh a dera chibai bûk tùrin ka ûmzui ngai lo; zanin chu in phu a ni," tia min lo chibai chu a dawn a nuam danglam teh mai asin! Thuhriltuten Pulpit pawh an chhuahsan fel hmain chibai tumin kan lo buai a, thusawi hriat zui tlâk a awm vàng ai mahin an sawi ve hrim hrim avànga lawmpuina chibai bûk ang lek a ni ta! Kan intihhmuh vàng mai maia a dera phungthlûk hi bànsan a hun tawh lo maw? 'Ṭah hun a awm a, nuih hun a awm, sùn hun a awm a, làm hun a awm... Ngawih hun a awm a, ṭawng hun a awm.' Chutiang hre hrang lo khawp a harsatna i tâwk a nih chuan i bàwl ṭhin te aiin i dinhmun a him lo mah zâwk a ni tih hria la, a tlai hmain harhchhuak thuai ang che.