Remna Ni a huho zelin aw

Kum dangah chuan India sorkar leh MNF-te'n inremna an siam ni June 30 chu lawm mumal lohin a awm ṭhin. MNF an sorkar laiin an lawm ropui deuh a, Congress-in sorkarna an chan chuan lawm mumal a awm ngai loin ka hria, ka hresual mai thei.

Kha leh chen Mizo mipuite mut mu pawh tuah loin, hlauthawng reng rengin hun an hmang ṭhin a nih kha. Rambuai avanga nun ralṭi taka awm ṭhinte kha remna avangin mutmu an tuah ve thei ta. June 30 hi Mizote tan chuan ni chhinchhiah tlak leh hlu bik a ni awm e. He ni hlu bik hi Mizo mipuite rilruah a reh mai hi thil hlauhawm tak a ni.

Remna Ni hi hman mumal a nih ṭhin loh avang hian ṭhangthar zawkte chuan a hlutna leh ropuina an hre tawh lo ang tih a hlauhawm a ni. Political party leh pawl
ṭhenkhatte'n mahni bilin hun an hmang a, chungah chuan Mizo mipui nawl-pui tan chuan tel a rem loh mai bakah, telna chi pawh a ni lo. Political party bilin an hmannaah chuan Remna Ni hlutna leh ropuina hriat tur a awm lem lo a, mahni party infakmawina hun a ni mai.

Kuminah chuan Mizo-rama tlawmngai pawl lian ber leh Mizo mipuite pawhin kan ngaihsan ber Central YMA chuan a huhoa Remna Ni hmang turin rawtna a nei a, a lawmawm hle. CYMA pawl lian leh zahawm nge nge, thutlukna pawh an siam thiam e.

Kumin aṭang hi chuan CYMA zarah Remna Ni hi mipuite thinlungah a tharin a thawk ang a, a hlutzia Mizo mipuite thinlungah a rawn lang thar leh dawn a ni. Mizote tana ni hlu tak, a hlutna hriat mang loa bopil mai tur a bopil lohna atana hmalatu CYMA hruaitute ka fak a, kum dangah pawh Remna Ni a huhoa hman zel a nih theihna atan hian ṭan la zel teh se.

CYMA hruaitute u, Remna Ni a huhoa hman in rawt avang hian seltu pawh in tawng mai thei mah se, zam miah suh u. In thutlukna
ṭhatzia hi nakin zelah a rawn lang telh telh ang. Ṭhangtharte'n Remna Ni hlutzia nangmahni avanga an hre thar leh tur hi a ropui a, selna avang mai maiin in thil tih ṭhat ropui tak hi chhhunzawm loh phah hauh suh ang che u.

Remna Ni hman a nih hunah hian Remna Ni hlutzia leh ropuizia tilang thei tur hmuh ka lo inbeisei a ni. Mizote tana ni ropui tak hi keini Mizote'n kan hlut loh chuan tumahin min rawn hlutsak dawn lo.

Chuvangin, Central YMA hruaitute hlut tham leh hlut tlak a nihzia hi tarlang zel ula, Mizo mipuite'n a huhoa hlim taka kan hman theihna atan ngaihtuahna seng zel ang che u.

Remna Ni hi Mizo mipuite'n inrem thar lehna ni atan hmang ila, CYMA duh dan ang ngei hian Remna Ni hi political party-te'n inbeihna atan hmang tawh lo se. CYMA bultumin Remna Ni hi a huhoin hlim takin i hmang zel ang u.

- Lalrinthanga