Remna Ni - kan lawm tum dan a uchuak lo maw?

"Buana hmaa kherh," min lo ti a nih pawhin ka thlir duh dan hi a 'negative' a nih vangin Remna Ni hman hmaa sawi hi a ṭha law lawin ka hria a, a ṭul chuan a thlir letna pawh ziah kan la tum dawn a nia. Kum 2016-a Remna Ni hman kan tum dan hi kan ti uchuak a, kan uar leh lutuk a, heti em ema thar thawh tur em ni ngai?

Remna leh Muanna kan lo dawng ta kan lawmzia chu tuma koh khawmn loha 1986-a June 30 zana kan tlaivar rual
ṭhup mai khan a tichiang a, kha boruak kha koh kir theih a ni tawh lo. Tun hnua tharthawh tuma tih chiam phenah hian thil inthup hi a awm tlata ka hriat avang leh, tute emaw tana 'platform' a ni dawna ka hriat avangin ka han zawlnei thupuan phawt teh ang.

A irh chhuahna chu YMA General Conference thurel a ni a, kha thurel kha a zahawm ka ti a, sawisel zui erawh ka tim dawn chuang lo. Keia ngaihdan khawisawi takah chuan YMA General conference hian mipui a hip tawh lo. Zaithiam lar zawng zawng an sawm pawhin mipuiin kal an chak tawh lo, hruaitute tan eng 'platform' mah a chang phak tawh lo. YMA General Conference kal tlangin a lar theih tawh lova, Aizawl leh Lungleiin an thleng khat bawk si a, khaw lian vak loahte kan nghat kual tawh a, he inkhawmpuia thusawi hi a hlu tawh lo. Remna Ni ah chuan Lammualah ngat an inkokhawm dawn a, YMA a thu ber dawn. An hnuaiah Chief Minister te, MNF, ZNP, MPC hruaitute an kun dawn, tute tan emaw chuan eng platform emaw chu a ni dawn a ni. Hengho rualin hmun khatah thu an sawi dawn avangin ngaihven a hlawh dawn a, CYMA hruaitu nih a chakawm ṭum tak a nih ka ring.

Remna Ni lawm tur tih vanga YMA Information Centre-ah hla an play dawn a ni awm a, hei hi chu tih loh tawp turah ka ngai. Boruak siam tum hrim hrim kan ang hle mai. Damlo mangang thi lek lek hi veng tinin kan kawl deuh vek ang a, an play chhung rei an ti ngawt ang, mitthi neite pawh kan awm thei. Kumhlui thlan zana kan halpuah hal 'bengchheng' tiin kan inkhap kha a ni si a, Remna Nia au rinna tura siam hmanga hla play hi a bengchhen thu an sawi pawhin ngai haw bik lo ila a ṭha ang chu.

Remna Ni hi Aizawlah chuan Chapchar Ku ang tho, mahse politics thu sawina remchang ni ta si a ang dawnin ka ring a, fashion show leh cultural item-te nen, zai nen lam nen an ri dawn a ni awm e. Hengte hi a programme detail ka hre lova ka sawi sual chuan min ngaidam dawn a nia.

Keia Remna Ni hman duh ve dan chu a hmaa kan hman dan ang khan holiday ni mai se, political party lamin an duh duh danin hmang se, a tuipui chin kal khawm se. Tu emaw thuneitu nia inngaia, "A huhoa kan hman loh chuan..." tia a firit hamtua ṭan tum reng mai hi kal pelh hlan ka nghakhlel. USA-ah chuan an Independence Day hi 'holiday' a nia, mahni remchan angin mipuiin an lawm a, an nghakhlel a, chhungkuaa intihhlim niah an chantir thiam hle. Kan ramah chuan remna ni, 1986-a thleng tawh kha 'function' anga lawm kan rawt thar mek a, mipui tam thei ang ber koh tumin sorkar leh YMA an inthurual a, hei hi chhut tham a ni.

YMA-in hman a tum a, sorkarin sum a tum ta daih mai hi mak ak ti. Thil kan thlir thiam ngei ngei tur chu tute pawhin thu sawi se, eng political party pawh kal khawm se, ruling thu a ring ber. Platform khata thusawiah ruling party thu hi a lian ber zel a, sorkar lam party tan chuan hetiang hi buatsaih fo se an tih ka ring. A dawt lehah political party tenau deuh tan a ṭha a, an thusawi mipuiin an hmuh ve hun leh mipui tam tak pungkhawm hmaa thusawina remchang a ni bawk. Political party-a pahnihna tan a pawi thei berin ka ring, an hotupain thusawi thiam ber mah se a nuihzatthlak lai lo chu an sawi chhawng leh pek lovang.

Remna Ni hi 1986-ah khan kan lawm tawh. Kha kan lawmna kha kaih thawh thar tur a ni lo. Mizoramah remna a bo leh ta pawh a ni lova, political party te inbeih tawn vanga huang khata khung tum ṭalh pawl, engkima thu ber leh pêl chin siamtu ang mai kan nei hi a democracy lo ka ti a, political party lahin tel lo bik nih an ngam si lo lai hi ka vei chu a ni. Party chu hmun khatah kan khung emaw, anmahni office-ah an hmang a nih pawhin an thu a inmil dawn chuang lo. Hmun khata kan dah khawm vangin an inrem ta a ni dawn lo tihte hi ngaihtuah thlen tel a ṭha asin!

Remna Ni hi lo ngai reng rawh u, inrem lohna ni a nih ka ring a, political party hrang hrangin ngaihdan inang lo ṭhah sawiin anmahni vanga remna a thlen dan an sawi dawn. Hetia kan khung khawm hi a tawpna ni se, i ching zui lo ang u. Kum 2018-a MLA inthlana eng pawl hruaitu hlui tu tu emaw candidate an nih ṭhup huna kan harh chauh chuan kan tlai lutuk palh ang e.

- Lalmuanpuia