Mizoram Peace Accord kha tute siam nge?

India sorkar leh Mizoram inremna chuan kum sawmthum a lo tling dawn ta reng mai. He remna hi a hlu a, zofate tan chuan ropui taka lawm hi a inhmeh em em a ni.

Kum dangah kha chuan political party ten an remchan dan angin a bik te te in he remna ni hi an hmang mai ṭhin a nih kha. Kuminah erawh chuan Central YMA organise-na hnuaiah Zoram pum huapin ropui taka lawm tum a ni tih kan hre ṭheuh awm e. A bik takin Aizawl khawpuiah phei chuan inbuatsaihna boruak pawh a lian khawp mai.

Hetih lai hian remna kan neih theihna tur atana thawh hlawk ber nih inchuhna thawm thangva hriat tur a awm leh fo ṭhin. He remna hi mimal, NGO emaw political party-in a siam bik a ni lo a; India sorkar leh Mizoram inremna tura kan kalkawng zawhah khan khatih hun laia Mizo mipui tute mai pawh khan kan theihna, kan tha leh zung kan seng ṭheuh a. Kan tha thawh hlawk dan leh kan thlen chin erawh a inang vek kher lo, nimahsela Mizo fa tawh phawt chuan kha inremnaah khan tih kan nei ṭheuh a ni.

Chuvang chuan he peace accord hlu tak hi Brig. T. Sailo emaw, Pu Lal Thanhawla emaw, Pu Laldenga leh MKHC te siam bik a ni lo a; Mizo mipui zawng zawngin kan siam a ni a, kan thawh rah rawn par chhuak a ni zawk.

Heng thu mu hnu "Mautuai haka thi mai tur" tih te, "Lalṭhutthleng a kian lo, a tawlh hret chauh a ni" tih te leh inpuh mawhna thawm reng reng hi tun hnuah chuan ti ri fo tawh lo teh ang u.

State leh mi ram tam takin an thlakhlelh em em, an neih ve theih si loh Remna Ni lawm tur kan nei hi kan vanneihzia hre thar leh ila. Tumah intai loin phur tak leh hlim taka lawm zai i rel zawk ang u.

Tin, khuallian atana kan beisei Prime Minister Norendra Modi-a hi lokal thei lo pawh ni raw sek sek, Zofate tan hnualna tur a awm lo e. A pawimawh ber zawk chu thu khat vuaa lungrual taka kan lawm theih chuan a ropui tawk viau a ni. He remna ni hi Zofate ta a ni si a.