MIZO GORKHA’S vs Real MIZO

Kan pi leh pute aṭangin Mizoramah piangin kan seilian ve a. Mizo rilru dik tak pu in Mizoramah in leh lo te in bengbelin kan khawsa chho a, hei bak ram dang kan nei chuang lo. Zawngṭah leh khanghu te tui ti em emin, anṭam tlak tel lo chuan chaw ei harsa kan ti ve tho a. Buhchiar leh baite pawh tui kan tiin kan siam thiam ve em em a, chawhmeh pawh a chhumin tui kan ti ve tho. Kan rilru-ah Mizo hmangaihna leh tlawmngaihna te hi ril takin a bet ve a ni. 

Nulate pawh kan rim ve fo a, Chawlhni ah kan fellowship a, mitthi inah tlaivarin lenkhawm leh mitthi ral te pawh kan tih hmaih bik lo. Tuibur tuina kan pawh pha ve tho a, thingpui sen-hang leh kurtai kan ngainatna pawh a tlem bik lo. Chakai khawrh leh loa feh te pawh kan thisenah a bet ve tlat a ni. Kan nulaten em an phur thiam ve tho a, puan bih an zak bik lo. Kan tlangvalten lo vah leh ram kal an thiam ve bawk. 

Sarlamkai leh Cheraw kan thiam nula tlangval kan nei ve a, kan naupang ten chengkawl hip an ngaina in sava veh pawh nuam an ti ve em em. Damdawiin ah Mizo nurse leh doctor-ten kan nau min chhar sak ve tho a, kan damlohin Mizo damdawi hatkora leh nimbu tui te, kaihzawl zik leh saphai mit te kan hmang ve ṭhin bawk. YMA day leh MHIP day-ah tel ve kan duh  a, chapchar kutah chhawng hnawh ve kan chak. 

Urlawk zan te, Christmas te leh kum­hlui thlah zan te kan nghakhlek ve ṭhin khawp mai. Hnatlan te pawh kan thisenah a bet ve tlat a ni. 

Rilru leh thinlung takzetin keini Gorkha te hi Non Mizo-ah ngai lovin Mizo Gorkha identity hi kan hmu ve thei lo em ni tih hi ka zawhna chu a ni. 

Mizoram mi leh sa nihna hi kan thisenah a luangin a bet a, Non Mizo tia min thliar hrang mai loin “Mizo Gorkha Minorities Group in Mizoram” tih identity te hi min pe ve thei ula chuan kan zan mut leh kan zing thawh te hi a nuam ve deuh ngeiin ka ring. 

Kan zotlang ram nuam sa chung zelin,  kan identity hi Non Mizo aṭanga Mizo Gorkha tia min pawm­pui turin kan pi leh pu, u leh nau, kan zoram mipui zawng zawngte ka han ngen che u a ni e. 

Kan zoram tan kan ding e.