DAN NGAI PAWIMAWH MLA-TE

Pu Lalduhoma, MLA chunga sorkarna fawng chelh mektu MLA 12 lai maiin Speaker hnena ban (disqualify) tur hiala hekna an thlen chhan ber chu – Lalduhoma hi kan huat vang a ni lo, Dan kan ngaihpawimawh vang tiin an sawi a. Chung MLA 12 zinga pakhat chuan ‘Ram rorelna zahawmna atan leh ram rorelna kal zel tura dan a lal ber zel theihna atan ti kan ni,’ a ti a, MLA pakhat leh pawhin ‘Legislature te chuan dan humhim hi kan mawhphurhna a ni. Dan kan ngai pawimawh a ni,’ a ti bawk. Hetiang taka Dan ngai pawimawh ram hruaitu kan nei hi thil lawmawm tak a ni. Vawiin hun atan chauh pawh ni loin nakin zel atan pawh dan ngai pawimawh zel tawh se la thil ṭha tak a nih bakah kan ram ngei pawh hian hma a sawn phah ngei a beiseiawm bawk. Tun hma lam zawng khan hetiang hian dan hi an lo ngai pawimawh vak lo em ni erawh a tih theih thung a, hetianga Pu Lalduhoma chunga dan ngaih pawimawh vanga thil an lo ti ta hian kawng hrang hrangah rah ṭha tak pawh a chhuah ngei a rinawm.

Hun kal tawh kan thlir erawh chuan kan Legislature te hian dan hi an lo ngai pawimawh lutuk lo em ni a tihtheih thung a, kan hriat lar em em pakhat chu Restricted Tender hi a ni. Hemi awmzia chu hnathawh tur awm hi a thawk theitu tur hnena lilam loin a thawktu tur thlan fel tawhsa chiahin chhan theih tura hna pek tihna a ni mai awm e. Tun Session hnuhnung berah khan sawi chhuah a ni a, Opposition MLA Pu Lalsawivunga zawhna a ni nghe nghe. Chief Minister Pu Zoramthanga chhanna aṭanga a lan dan chuan Aug. Kum 2019 aṭanga 2020 Aug. 31 inkara restricted tender pek chhuah tawh zawng zawng chu hna 53 a niin cheng Nuai 70,000/- vel zet man a ni. He restricted tender hmanga hna pek zinga langsar tak pakhat chu Aizawl Dawrpui-a Multi Level Parking cum Basketball Court Phase – II hi a ni. September 2018 a sunction awm tawh a ni a, sorkar hmasa khan work order a pe hman lo a, sorkar thar (MNF sorkar) ah pawh chuan rin aiin hmalakna a muang tih mek laiin rin loh hnu daihah Restricted Tender turin proposal a kal ta daih thung si. Chu proposal ah lah chuan hnam dang hming pathum a lang tel nghe nghe bawk a. Kan Chief Minister ber lah chuan hemi hma lawk hian MESA Conference ah sorkar aṭanga hna thawh tur awm apiang chu tualchhung mi duhsak an ni ang a lo tih zawh chiah nen chuan a inpersan hle a ni. Heng hnam dang pathumte hi an han chhui chianin Minister pakhat Robert Romawia propose an ti nghe nghe a. Keini tan tak tak a nih leh nih loh erawh finfiah rual ni lo mah se la, heti taka kan ram chhung ngeia hnam dang miin hna lian an thawk reng kan hmuh hi chuan a dik awm mang e kan tih phah a. 

Tin, hriatthiam mai theih loh kan la neih cheu chu CHIEF MINISTER RELIEF FUND hman dan hi a ni. Sorkar sum hmanga hmanraw lei tur niawm tak a nih laiin hengte hi mipui thawhkhawm, CM Relief Fund hmanga lei a ni a:

1. Pamphlet siam nan Rs. 9,00,000/- (Nuaikua). Hei hi a hma khan Cheng Nuai 1,053,000/- tih a ni nain tihdanglam leh a ni.

2. Truenat (Truelab Quottro Realtime Quantative Micro PCR Machine) sawm (10) leh a ken tel lei na Rs. 3,19,83,830/-  

3. Directorate of Hospital & Medical Education leh Aizawl leh Kolasib DC-te hman atan - Rs. 1,40,42,000/-  

4. RAT Kit Singhnih (20,000) leina - Rs. 1,40,29,000/-  

5. Re-agents & consumables for Rt-PCR – Rs. 13,23,463/-

6. Works – Rs. 14,27,670/-

7. Diet for ZMC Quarantine staff – Rs. 23,20,975/-

8. Mobility support – Rs. 8,00,000/-

9. Wages – Rs. 5,00,000/-

Heng bakah hian Truenat atan CMRF aṭangin Rs. 1,00,00,000/- pek chhuah a ni tawh bawk (Hengte hi Congress Party Press Released leh chanchinbu aṭanga kan hmuh theih chin a ni).

Chief Minister’s Relief Fund For Covid-19 hi sorkar ṭanpuina atana hman tur a ni lo a; harsatna tawk, mangangte ṭanpui nan (relief measures)-a hman tur a ni. Hetiang a nih lai hian Mizoramah erawh chuan CM Relief Fund chu sorkar bungrua leh khawl lei nan te, Department leh DC-te hman atan te, RAT Kit lei nante hman a ni ta daih a. Hetianga sorkar insensona tura ngaihah hian CM Relief Fund cheng vaibelchhe 6 chuang zet hman ral a ni tawh a.  

Heng aṭang ringawt pawh hian thil a nihna tur ang chiah lo deuha kal chu vawiin thleng hian a la awm a ni tih kan hrethiam thei mai awm e. Hengte hi kan MLA zahawm tak tak 12 te hian Pu Lalduhoma chunga dan an ngai pawimawh ang hian ngai pawimawh se la kan duh tak zet a ni. A ṭhente chu kohhran upa an ni bawk a, Pathian rawngbawltu mi pawimawh tak tak an ni a, vawiina dan an ngaihpawimawh thu an sawi hian hun kal tawh lama dan ngaihpawimawh lohna zawng zawngte kha a siamṭhat theih dan ang angin siamṭha leh se la emaw, tuna dan ngai pawimawh lo taka kan hman mek thil lian tak tak te hi (tunah kan han tarlan tlemte ringawtte pawh hi) dan ngai pawimawh takin tidanglam leh thei se la an va chhuanawm hlawm dawn tak em.

Lalduhoma chunga dan an ngaih pawimawh ang bawk hian vawiin aṭangin hengte hi ngai pawimawh bawk se la, chung lama kan Pa pawh kei chuan a lawm ngei ka ring tlat a. Ram hruaitu an ni a, mipui Nuai 12 vel chunga roreltute an nihna hi kan ngaihpawimawh em em avangin an thusawi hi vawiin atan chauh ni lo a, rorelna hmuna an ṭhut chhung zawng daih talin dan ngai pawimawh takin hna thawk se la kan duh a ni. An vawi khat MLA-na an nih vek hlawm bawk a, hming chherna atan a ṭhat dawn em bawk avangin chutiang tur chuan kan han ngen nghal bawk e.