(1966-1986) - Buaina chu remnaah

A hma zawnga rem-na leh muanna hnuia leng ṭhin Zofaten kum 1966 March-ah Politics thukduk chu rin lawk leh tum lawk pawh awm lovin kan dai pherh duai mai a, a thuk pherh bawk, a mihring pherh nasa bawk. Kan ramah Independent nau piantir kan tum a, kan pawng nawr ta chiam a, chu tah le, ṭap ri leh mangang au thawmin kan Zoram chungah par chhia a chhuang mup mup ta reng a. Kan Zoram khaw tam tak na tuar thawm ri leh chanchin duhawm loh tak tak kan hriat ṭhin ten min ṭhawng na em em vek a. Tuar nasa zual phei chu an chanchin hriat loh leh sawi loha ṭha zawk te pawh an tam mai. Zoram khawi hmun pawh a ral muang aram pawh kan awm lova. Chhungkaw tam tak kim ta lo kan awmin, chenna in nei lo tam tak kan awm ta bawk. Nu leh pa tam takin chhungkaw rorel ngaihna an hre lova, a tla chawp tak ngial pawh an ngaihtuahn phak hek lo. Ṭhenkhat phei chu an nun him nana ram pawna pem ta daih te pawh an awm. Nun kawng engkim kha a kehchhia a ni ringawt a, kan Zoram nun zemawi tak hmangaihnaa indawm tawn ṭhin te kha "Nun suar ang a chim" tih hla lo pianna ram kan ni ta.

Kawng tin rengah buaina leh harsatna chuan zual lam a pan zel a, ei leh bar zawna kawng a chim chhe vek a, nu nau ei ṭha mamawh em em ten an mamawh an hmu zo lova, ei tur nei deuh te pawh an puarin an fan thei bik chuang lo. Mipui mi mir reng rengte kha a fu hian kan fu fap mai a ni. Independent hmuh tum a, a tufate leh mipui lam te pawhin nunna kan chan ṭeuhin ram palaileng leh ram dai a ruang zalh ta mai mai pawh kan tam. A ni taka, he khawvel nau chhiatna ramah hian kan Zoram pawhin Independet nau kan chhiat ve tak siah chuan kan Zoram chu a tarsa pumin a na a, tuman tap e tip e kan ti ngam si lo; a tawrh hian kan tuar tlawk tlawk a ni ber. Kan inhnemna ber UNO lam te an ngaihawm hle. Hun leh ni a kal leh deuh a, a rem rem khuah min sawi khawmin, khaw 3/4/5 lai te min sawi khawm a, khawm khua te phei chu an bungrua, silhpuan, mutbu leh thil chi hrang hrang thlengin kan inthiar zawh vat a ngai. Tin, damlo leh tar chak lote thlengin ngaihnathiamna awm hek lovin a rang a ranga nawr kal kan ni bawk. Nun reng reng hi a chep ngawih ngawih a, khaw buruak in anglo tuar ta fe fe pawh kan tam. Thlawhhma lak leh tui tlan thlengin kan buai em em a, hetiang teh hrep hnuia nung leh khawsa kan nih avangin remna leh muanna Zoramin a mamawh tak zet a ni. Remna leh muanna a awm leh theih nana kha tih hun laia sorkarna changtu Pu Lal Thanhawla leh a sorkar, kohhran hrang hrang leh pawl hrang hrang te mimal ṭawngtaina te thlengin theih tawp chhuahin, a sulin an insul zut zut a ni. Remna leh muanna aia hlu eng dangmah Zoramah a awm lo. Tin, heti hi a ni a, ram zawng zawnga thuneitu kan Pathian chuan a mite tawrhna zo zai chu tih tawpa tih kian a duh a, kan ṭawngṭaina ten chhanga remna leh muanna peka kan awm theih nan Pu Lal Thanhawla leh sorkar chu remna hriak a thih a, remna leh muanna Maichamah hlanin an awm ta. Chumi a zarah ni 20/6/2086-ah kan Zoram thim chhah tak, sala tang chu chhuahin kan awm ta; a va ropuiin a va lawmawm tak em! Inremna chuan ken tel a nei nual a, MNF ten tunhmaa an lo rilruk tawh C.M leh minister pathum vel tal seat luahsaa lo kir an duhna chu Pu Lal Thanhawla leh a sorkar chuan ngaihtuah nawn ngai lova felsain an kian nghal a. He lai point tak C.M leh minister pathum ten remna muanna atana a kenna hi a zahawmin a ropui tak zet a ni. MNF lam unaute pawh remna leh muanna hnuaia chhungkua, u leh nau
ṭhen leh rual ṭha te nena an han inhmu leh thei te hi ka lawmpui tak zet a,; rawn hawng tur awm ve ta lo chhungkua te erawh pawi kan tihpui tak zet a ni.

Tichuan rambuai hreawm zia kan hre tawh a, remna leh muanna hlut zia kan hre bawk. Remna leh muanna nei tur hian kawng a thuiin a bumboh tak zet tih hriain remna leh muanna tichhe zawnga policy leh propaganda, boruak chhia dai tawh lo hram turin Mizoram mipuite kan inngen nawn leh a ni. He Remna Ni ropui takah hian duhsakna chibai ka buk cheu a, he ni hi Zofate tan ni pawimawh tak leh hlu tak a ni tih hrereng chunga hmang turin duhsakna ka hlan a che u. Zoram mipuii remna leh muanna hi ngawipawimawhin, i vawng nung zel ang u.

Lalseni pu

Champhai