Ruang lakluh thua Puithiamte zirtirna

- R. Sangliana

Ni 11.6.2016 Vanglainiah Pas-tor etc thite ruang lak-luh chungchanga Revd Chuauthuama’n ama huangah a thlir dan a rawn ziak kha han chhan ve ṭulin ka hria a.

Pakhatnaah, “Bible-in a sawi zawng zawng hi ngial ngan takin kan la vek tawh lo a, a
ṭul vek bawk hek lo” a tih hi ngaih-tuah chian ngai tak a ni. Kan thurinah chuan thuthlung hlui leh thuthlung thar (Bible) hi Pathian thua pawm a nih thu tarlan a ni a, hetianga Revd. Chuauthuama’n pawm loh tur tam tak awm anga a sawi ta mai hi engtizia nge ni ta ang le? Chuti anih chuan pawm tur chin leh chin loh kohhranin thliar fel sela a ṭha ang. Mi naran chuan kan thliar thiam ve hauh silo, Liberalist hovin sakhaw intluk tlanna an sawi ang a, Bible thu duh lai pawma duhlai hnawl ang ziritirna hi kan puithiam te thu kal pui dan a la ni fo hi a him zel em?

Pahnihnaah Biak Ina ruang lak luh hi sapho tih dan an lo entawn a nih hmel bakah fawr hlum ṭhak Diana te ruang pawh Biakinah an vui tih te an lo thik/entawn a lo nih chuan kohhran mi thi zawng zawng KS te nen lam Biakinah vui ve mai ila tha kan ti emaw chu. Sap rama an tih dan entawn atana ṭha hauh lote kan puithiam ten inthiam chawp nana an hman hi a fuh dawn em ni?

Pathumnaah Synod agenda II-na 2014 ah Presbytery pahnih aṭangin Biak Ina ruang lakluh tih tawp rawtna a lo lut a. Nasa taka sawi ho hnuah kan kal dan ngai hi a la ṭha e, kan ti tiin rel a ni. He thu Synod a a luh fo dan aṭang hian mi tlemte ngaihdan niin a lang lo.

He ta kal dan ngai tih hi Biak Ina vui a nih rualin mahni Ina vui mai duh an awm pawhin khap a ni lo. Kum 2015 a Synod newsletter a thuchhuah erawh kha chu a khauh ta a, pastor leh upa thite chu Biak In a vui ngei ngei tur (compulsory) in a vui duh pawh awm se phallloh angin an rawn chhuah ta kha a ni a, kha kha kan ngai mawh zual chu a ni.

Hei hi Revd. Chuauthuama hian a hre ziktluak lo deuh a ni mai thei. Tin, Ina vui duh mi tlemte tih hi a dik hmel loh, synod rorelnaah pawh upa tam takin tih tawp an duh a, pastor ho an ding zing lutuka an ṭang na lutuk a, ṭha tih em em vang pawh nilovin an hmai zah avangin an pass lo mai chauh niin, palai
ṭhenkhat ti ti aṭangin hriat a ni, Synod level-ah hian pastor hi an ding zingin an dictator mah mah tawha sawi a ni nghe nghe.

Mizo customary law ah chuan nu leh pa ten an dam laia thurochhiah an siam hi an zah ṭhin, ro sem thuah te, inphumna tur thuah te a theih hram chuan an zawm ṭhin. An damlaia an thusawi palzut hi mimal zalenna (Fundamental Rights) kalh a nih theih dan a awm bawk. A hremna phei zawng a awm lem lovang.

Biakin compound tih bawlh-hlawh loh tuipui hle a, uisa eite, ruai ṭhehte pawh ngaimawh hle siin Bible-in Lalpa Biakbuk tihbawlhhlawh theihna a sawi zawm leh duh hauh loh bakah Bible thu pawm vek a ṭullo tih ziritir nana kan la hmang leh zel phei hi chu chapona leh ropui lawmzia mai lo chu puh a har hle a ni. Bible ṭan chhan awm bawk silo.

Heti taka mitthi ruang Biak- In a lakluh hi hlu leh ropui a nih chuan kohhran mite hi lalut vek ila, chu lah kan phal silova, chu mai nilovin upa
ṭhenkhat (pem) an upatna hlip silovin an ruang lakluh kan la phallo zuite hi a mak hle a ni. Thil ṭha leh hlu midangte kan duhsak pui leh hauh silo.

Presbyterian kohhran danah hian pastor leh upate ruang Biak Ina lak tur tih a awm kan hre lova, kristianna lo luh tirh lama an lo tih ṭhin tunlai huna hlutna nei tawh lem lo, khawtlang, YMA te buaina zakhua mai ni tawh bansan kan hreh em em mai hi chu a fuh lo deuh a ni.

Tunlaiah khawtlang leh kohhran kal danah ngaihtuahna thar ṭha zawk a lo chhuak zel a, chutiang mila insiamrem ve hret thih hreh taka kan hreh hi chu a chhuanawm hran pa lem lo khawp mai.

Tin, Revd. Chuauva hian Pastor Chhuahkhama 1929-ah a thih tira, Kristian hlabuah 1949 a thi niin ziah a ni si a. Hei hian a thuziak dang pawh hi a tihrinhlelhawm zo vek a ni. Biak Ina ruang lakluh Bible sawi nep nan a hmang phei hi chu kan thurin nen a inmil hauh lo.

Biak Ina pastor leh upa thite ruang lakluh hi chu kal dan tluangtlam Ina vui pawh theih, Biak Ina vui pawh pawilo ang tal khan kal ni leh hram sela, Biak Ina lakluh ngei ngei tur (compulsory) anga kal hi chu i ennawn leh hram ang u.