R Dengṭhuama Indoor Stadium a chung pawp tihphui vat a ṭul
Mizo infiammite chuan R Dengṭhuama Indoor Stadium hi an hmelhriat vek ang. A chhan chu he lai hmun hian basektball, volleyball, boxing, futsal, badminton bakah inkhawmpui thlengin a thleng tawh.
Infiamna hmun pawimawh a nih avangin R Dengṭhuama Indoor Stadium hian hma a sawn zel a, an hawn tirh ai kha chuan tunah chuan a changtlung tawh zawk. Lirthei dahna tur ṭha tawk tak a awm a, dressing room-te pawh dah thar a ni.
A changtlun avang leh a hmunhma a ṭhat avangin an hmang nasa a, tun ai pawhin an tih changtlung zel a rinawm. Tun dinhmuna hmalakna atana ṭul hmasa chu a chung phui lo, tihphui hi a ni thei ang.
Hall-ah hian carpet ṭha tak phah a ni a, chutihrualin carpet hi a huh chuan a nâl em em thung. Kumin June thla khan BR Studio MFA Futsal League 2023-24 khelh a ni a, ruahsur laiin inelna kalpui a harsa hial. Hall hian a chung nei bawk mah se tui a far nasa hle. Hun chêp tak kara inelna buatsaih a nih avangin chawlh theih a ni si lo a, inelna kaltlangpui a ni a, result-ah pawh nghawng a nei thei hial ang. Player an tawlh thlu nasa a, chak takin an tlan ngam lo a, inhliam a hlauhawm em em bawk.
Player inhliam a hlauhawm vang ringawt pawh hian a chung phui lo hi ngaih pawimawh a ṭul. Inhliam vangin player hmabak nei êng tak tak te beiseina a tawp fo. Vanduai vang ni lo - inelna hmunhma ṭhat tawk loh vang a nih chuan a pawi lehzual.
Inhliam vanga sum sen hi a tam hma em em a, nunna hial pawh chân theih a ni. R Dengṭhuama Indoor Stadium-a inelna neih hoah hian sum a tam tawk ṭhin lo a, chhungkaw châwmna khawp niin a la lang lo. Chutihrualin, helai hmun hi thui zawk thlenna tura a bul ṭanna ṭha tak a ni thei thung. Chuvangin, infiammite'n ṭangkai lehzuala an hman theih nan bakah inelna buatsaihtute buaina ṭhahnem tak chinfel a nih theih nan hall chung thawm ṭhat hi a ṭul a ni.
Futsal inelna chauhin harsatna hi an tawk lo a; Mizorama basketball inelna sang ber Mizoram Super League leh Mizorama volleyball inelna sang ber Pro Volleyball League pawhin harsatna hi an tawk vek mai.
Tunah hian Mizoram Volleyball Association leh Central YMA ṭangkawp chuan 23rd Inter Branch YMA Volleyball Tournament 2024 an buatsaih mek a, ruahsur hun lai a nih avangin a chung ṭha tawk lo avangin harsatna tawk ve thei an ni. Tun hnaia Indian Metrological Centre, Minstry of Earth Sciences thuchhuah chuan tun kar chhoah ruah a sur nasat tur thu a sawi a, hei hi a thleng tak tak a nih chuan CYMA Volleyball inelna pawhin harsatna chu an neih phah ngei ang.
Hengte avang hian R Dengṭhuama Indoor Stadium enkawltu Mizoram State Sports Council hian a rang lama hma an lak a pawimawh tak zet. Hall/inchung pawp siamṭhat hi ruahsur lai lo chuan a phui leh phui loh hi hriat a har ṭhin. Khua a chêng reng tawh lo a, khaw ṭhat leh chhiat a inchhawk chhoh avangin tun hun hi hall chung pawp tihphuina remchang a ni ngei ang le.
- Lalzarzova