Misual ngaihdam

Tunhnaiah Mizo­ramah thil thleng rapthlak tak tak a awm ta fo a. Tualthahna leh sarthihna, mahni nunna hial lak chingte pawh an pung chho zel a. Nu nau hriat atana him lo tak tak thilthleng hi nitin deuh thaw mai hian Mizoramah a awm ve ta tlat mai.

Tual chhung chan­chinbu ṭhenkhatin inthat, pawngsual tih te an ziah phur viau laiin kan chanchinbu ṭhenkhat, mipui tana pawimawh leh ṭang­kai tur chin thlir thiam chinte erawh chuan mahni inthat leh inawk hlum tih velte chu mipui nawlpui tan a ṭangkaina lam aiin a ṭhat lohna lam a tam zawk nia an hriat vang ni maw an ziak ṭha duh ta lo hial a. Hetiang khawpa sualna a pun tawh hnu hian mi ṭha leh mi felte bawk hi zirtir ngai chu kan va la ni tih hi ka ziak ve duh a ni.

Kristian zaa za state nih tumin Mizoram hi Kristian zaa za awmna tiin kan sawi lui ngar ngar a, a kristian laiah hian kan buai em em ṭhin. Amaherawhchu, pawl, kohhran leh khawtlang thangmawi tura duh em emtu, mahni veng, khua leh kohhran tana nunna hlan phal hial awma mawite pawhin tihsual lian tak kan neih fo chu misualte leh dan bawhchhetute ngaihdam kan in­tihhmuh tlat hi a ni.

Hman deuh tawh khan khaw pakhatah hmeichhe kum tling lo pawngsual tumtu tleirawl pakhat man a ni a, pawngsual a tum hmeichhe naupang kha an ṭhenawma mi a ni a, an pi leh pute aṭanga tawha in ṭhenawm, thisenah inzawmna nei lo mah se chhungkhat anga khawsaa an ni a. Pawngsual tumtu tleirawl chu ṭhenawm tlangvalhoin an man a. Mahse, police hnenah pawh pe loin hmeichhe naupang nu leh pate chuan pawngsual tum­tu tleirawl chu an ngaidam a, ṭawngṭai­na neih sakin an thlah zalen leh ta mai a.

Kum khat pawh a liam hmain hmeichhe kum tling lo pawngsual tumtu bawk chuan veng danga mi hmei­chhe kum tling lo a pawng­sual ta tho a. Chutah zet chuan police beng pawh a thleng ve ta a, engtia rei nge a tan dawn ka hre zui ta lo.

Hetiang hi kan mize ṭha lo lai chu a ni. Kan ṭhen­awm te, kan chhung­khat hnaivai te leh kan naute ngei pawh ni se thil tisualtu chu hremna kan pe ngei tur a ni. Hrem loha zalen taka kan tlat­tir hian midang tan hlauhawm dang kan siam sak tihna a ni.

Chuvangin misual, dan bawhchhetute hi an nun siam ṭha turin hrem nachang kan hre tawh tur a ni.