PAWL SUM TUAK HI

Mizoram ang em em hian ram dangah hian pawl chi hrang a tam ve ang em aw? ka ti ṭhin. A ram mipui zat ngaihtuah phei chuan, Mizoram hi pawl hrang hrang tamna ber a ni hialin ka ring! Political party ringawt pawh hi kan ngah angreng a nia, mipui he tizat lekah chuan, kohhran hrang kan tam dante hi a nuih zatthlak lek lek. Veng ṭhenkhatah phei chuan kohhran hrang pakua tehmeuh te zu awma maw le!

He tizat pawl a awm si a, engtin nge maw inhmang turte hi kan indaih sen aw? ka ti mai mai ṭhin. A kal pawh hi engtin nge maw kan kalpui reng theih zawk le? Pawl tharte hi a la rawn pian belh tak ang deuh deuh a! Engtin nge maw kalpui zel kan tum ni?

Heng pawl zawng zawng tung-dinga kalpui zel tur chuan, sum a awm a ngai. Sum lah hi thei anga kung nei emaw, tui anga hnar nei emaw a ni mang chiah si lo va; a thawha thawhchhuah zel a ngai si. Pawl tinin sum kan han tuak tak tak hi chu, tute emaw tan chuan kan huatthlala âwm mange aw, ka ti ṭhin. Mimal sumdawnna huangahte hian kan zuang lut leh mai ṭhin bawk sia.

Chuvang chuan kan sum tuak dan hi chu pawl tin hian kan in enfiah deuh chu a ngai a ni. Nuho te, Upa Pawl te leh Naupang Pawl tihawm tawk lek te hi, ṭhalai awm khauh zawkte hian kan ti leh mai ṭhin. Tlangval sek pui puiin purunvar tih vel te, pickle tih vel mai mai kan han zuar ṭhin hi chu a zahthlak lam deuh chu a ni.

Miin dawra nitin an zawr angte hi chu zawrh loh hram a ṭha ngawt mai. Mi sumdawnna kan khawihbuai chu thuhran, mi tinin duh hun huna kan lei theih thil a nia. Pawl thil zawrh a nih tawh hi chuan, tu mai pawh hian lei sak loh hi nuam kan ti tawh bik si lo, mamawh mang lova kan lei changte pawh a awm. Ṭhenkhat phei chuan min rawn pem buhbel chawt zel a, sum lama harsat zual lai a nih phei chuan an ngeiawm lek lek!

Miin tlawmngaih chhuah­ten min leisak ṭhin a, mimal zawrh aiin i titam deuh ang u, tih ahnekin kan la titlem zawk titih lehnghal! Kan beisei anga min lo dawnsawn ṭhat loh phei chuan kan la rel zui leh ta deuh deuh. Kan inngaihtuah chian deuh chu a ngai a ni. Midangte va tibuai zawnga pawl sum tuak hi chu kan sim ṭhen deuh a ṭha ngawt mai. Mi tana malsawm-na ni tur zawk hi mi tan phurrit kan ni thei mai dawn.

Veng tin deuhthawah hian, sangha dawr te, vawksa rep dawr te, vawksa leh bawngsa sera eizawng an awm ta fir fer mai. Heng mite sumdawnna leh eizawn vena tibuai zawng hi chuan, pawlin sum tuak lo hram ang u. Mite ṭangpuitu tur leh mite tana malsawmna ni tura din ni si hi, mite tana hnawksak leh harsatna siamtu kan nih zawk hlauh chuan a dik lo ang.

Sum tuakna tur dang ṭha zawk kan hre ngang lo a nih a, pawl mi (member) ten mahni ni khat hlawh emaw tal kan pe phal bawk si lo a nih chuan, (a tam zawk hi chu ni khata cheng khatmah la lut lo kan ni awm sia!) pawl hi kalpui reng theih a ni lo tiin ṭil-ṭiak ngam ta mai ila a ṭha zawk awm mang e. Chutianga tih kan la hreh deuh si a nih chuan, intuk (budget/ target) te hi titlem deuh ila. He ti reng chuan, engpawl mai pawh hi midang tan phurrit leh hnawksak a ni thei mai dawn!