Thisen man chungchang
A mamawhtute tana mi tlawmngaite'n thisen a thlawna an pek lei a ṭul tak thu hi a chhan chiang zawka kan hriat a ṭul hle niin a lang.
Synod Hospital-ah hian MSACS aṭanga Blood Bag leh Test Kit dawn ṭhin a nih lai pawh khan a mamawhtute hnenah Unit 1-ah Rs. 500/- chawi tirin pek chhuah a ni. Tun hnaia MSACS-in blood bag leh test kit min pek ṭhin tak loh aṭang hian Rs. 1,500/- vel damlo ten an chawi a ngai ta a ni.
A thlawna mi inphalte thisen pek sa hi sum leh paia hlawk nana hralh a nih loh thu leh damlo mamawhten thisen thianghlim ngei an dawn theih nana sawngbawl a nih thu hi mipuiten kan hriat a ngai hle.
Tun hma kha chuan damlo thisen petute thisen leh a dawngtu tur thisen inmil leh inmil lo test mai bak chu engmah tih a awm lo. Tunlaiah erawh chuan thisen hi a thianghlim ngei a ni tih finfiah nan uluk taka test hrang hrang - blood grouping, HIV, Hepatitis B, Hepatitis C, VDRL, Malaria leh Cross Matching te enfiah vek a ṭul tawh a ni. Hetianga test zawng zawng tih hnuah him tawka hriatte chauh damlote pek ṭhin a ni.
Kum 2014 laihawl aṭang kha chuan blood bag leh test kit-te in lei chawp vek a ngaih tak avangin National Blood Transfusion Council (NBTC) in rate a siam zulzuiin blood processing charge hi lak a lo ngai ta a ni.
Whole Blood Packed Red Cells Processing Charge atan Rs. 1,450/- lak a nih laiin Platelets Concentrate leh Fresh Frozen Plasma (FFP) atan erawh chuan Rs.400/- (blood bag man) chiah lak a ni thung (Plateslets Concentration leh Fresh Frozen Plasma hi test vek tawh sa aṭanga siam a nih avangin blood bag man chauh lak a ni.)
Blood Processing Charge chu chipchiar zawkin hetiang hian tarlang ila:-
(1) Blood bag man - Rs. 400/-
(2) Kits for transfusion transmitted infection testing (Thisen aṭanga natna inkaichhawn theih test-na - Rs. 250/- Eg. HIV, Hepatitis B, Hepatitis C, VDRL & Malaria)
(3) (a) Donor Haemoglobin (Thisen petu Hb)
(b) Blood Grouping (damlo leh thisen petu blood group test-na)
(c) Cross matching (damlo thisen leh a dawngtu thisen inmil leh inmil loh test-na) - Rs. 200/-
(4) Chemical, stationery, glassware & plasticware - Rs. 200/-
(5) Equipments, maintenance & power supply - Rs. 200/-
(6) Quality Assurance and Wastage - Rs. 200/-
Total - Rs. 1,450/-
Hetiang Processing Charge lak hian Blood Bank hian hlawkna a nei lo a, chawi belh lohna tur tawk velin a rate hi siam a ni.
Tlawmngaia thisen pe ṭhinte chungah lawmthu kan sawi a, mi mangangte nun chhan nan tlawmngaia thisen pe zel turin kan sawmin kan ngen nghal bawk che u a ni e.