Zu hi

Mifingte thurawn tlem leh Bible-in min hrilh dan tlem i han lawrkhawm teh ang:-

1. Zu rui chu sual eng pawh ti turin a tling tawk a ni - Orcarles

2. Zu hi bo se, mi zawng zawng kan hlim a ni mai - Horace

3. Zu no khat in chu hriselna, zu no hnih in chu phursarhna, zu no thum in chu zahna, zu no li in chu atna - Ancharis

4. A tirah mihringin zu a in a, a tawpah zuin mihring a in - Japan thufing

5. Mihring an lo awm khan, zu hi a lo awm nghal a ni - Unknown

6. Zuah hian mihring lungawi loten hlimna an zawng a, zakzumin zahtheihlohna an zawng a, a tawp chu chhiatrupna a ni - Gurthie

7. Ramhuaiin zu in mi a thlem a, zu ruiin ramhuai a hmu ta mai a ni - John Milton

8. Zu ka rui dawn tichuan, ka a dawn a tihna a ni mai - Seneca

9. Zu rui chu ramsa nen an dang chuang lo - William Penn

10. Zungawl vei rilru chu nitin a chhe tawlh tawlh a ni mai - Addition

11. Zu rui hi en la, zu ṭhat lohzia sermon vak ngai loin a chiang thar mai ang - Sairicle

12. Tuifinriata tlahlum aiin zua tlahlum an tam zawk - Cyrus

13. Nitina accident a thi aiin nitin zu avanga thi an tam zawk - Isaak Newton

14. Zu tak hi chu aw, engtinnge ka tih tak ang? Heti taka mihring tichhetu chu! Ramhuai ka ti mai - Shakespeare

15. Zu hian result pathum a nei - ruihna, nawmchenna leh chhiatna - Ancharchis

16. Zu no tinah hian ramhuai a awm - Koran

17. Darthlalanga taksa a lang angin zuah hian rilru a lang vek ṭhin - Archulus

18. Mifing chuan tuisik thianghlim a in a, a duh tawk mai ṭhin - Socrates

19. Taksa rawng hrisel tur leh rilru fim pu turin zu lakah inthiarfihlim ang che - Smith

20. Ramsate hi en rawh, Pathianin zu in turin a siam si lo. Engahnge mihringin zu kan in bik ang? - Unknown

21. Ramsa hi zu tulh chhin teh? Zu ṭhatlohzia chu i hre mai ang - Bulwer

22. Zu dawrah i pawisa i dah a, i hloh nghal a, i hun i hloh bawk. Zu i in rui a, i awm phung pangngai i hloh a, a tawpah i thlarau i hloh nghal a; hloh hlir, hloh hlir a ni e. I chhungten hlimna an hloh bawk si, awi ka rei! - Cough

23. Zu hi ka in duh lo a, ṭhenawmte tan leh kan chhungkaw tan ka in duh lo bawk a, zu in hi a ṭulna reng reng ka hre lo - Cuyler

24. Zu chuan a tawpah rul tur ṭha mi angin mi a chuk hlum ṭhin - Solomona

25. Zu in buai leh zu ruia awm loin - Paula

26. Zu ruih hmangten Pathian ram an lut lovang - Paula

27. India ramah hian darkar khat chhung chauh Dictator-ah dah lo ni ta ila, ka thiltih hmasak ber tur chu zangnadawmna pe miah loin zu dawr ka khar vek ang - Mahatma Gandhi

28. History-a pawikhawihtu lian ber ka ni a, khawvela indonaa thi zawng zawng aia tam ka that tawh a. Khawvela chhungkaw tam tak tilungngaitu ka ni. Ṭhalai tam tak beisei boa siamtu ka ni a, mi chak lo ka tichhia a, mi chak ka tichak lo a. Mifing ti â tu ka ni a, mi tam tak awhhlum tirtu ka ni a, nu leh naupangte tiretheitu ka ni. Mi tam tak tihchhiat ka tum zel a ni, ka hming chu zu a ni - H.W. Gibon

29. Kum tin America ramah zu avangin mi 10,000 an thi ṭhin a, dollar maktaduai 120 an sengral ziah a. Mahni intihlum 60% chu zu avang a ni a, pawngsual 50% chu zu avang a ni a, rukruk 70% chu zu avang bawk a ni - New York Time

30. Zu chu thil a ni mai - Laldenga

31. Khawthlang finna leh khawchhak finna te an lungrual tlanna chu 'zu avangin fahrah tam tak an siam a ni' tih a ni - Eastern & Western Wisdom

32. Zu hian hriselna a tichhia a, rilru a pawt hniam a, mihring khawsak dan pangngai phak loa siamtu a ni. Zu hian thuruk a puangzar a, ṭul loah buaina a siam a, zu rui chu ramsa koham ang chiah an ni - Penn

33. Zu rui chu an damlai pawhin mitthi ruang an ni reng bawk - John Chrisostom

34. Khawvel history kal tawhah indonaa thi aiin zu avanga thi an tam zawk - General Pershing

35. Zu hi mihring society-a cander a ni a, a pawimawh lai ei zo a, chhiatna rapthlak thlentu a ni - Abraham Lincoln

36. Zungawl vei enkawlna hmunah "Chanchin Ṭha Johana ziak hi vawi 50 chhiar chhuak ula, zu bawih ata chhuah dan ka zirtir ang che u" ka ti a. Vawi 50 chhiar chhuak hman an awm lo, vawi 7, vawi 8 an chhiar chhuah hmain an piangthar vek - Major Van Seckle

37. Zu rui mi hian Kohhrana awm hi an fit ngang lo a ni - Unknown

38. Zu hian mi tam tak mi â-ah te, ramsaah te, ramhuaiah te a siam ṭhin - Benjamin Franklin

39. Zu ruih hi thil dang tehvak a ni lo, mahni duhthu ngeia mi â nihna a ni mai - Seneca

40. Nova zu ruihna chuan 'zahna' a siam a (Gen. 9:21). Lota zu ruihna chuan 'hriatsualna'; a keng tel a (Gen. 19:30). Ahasuera zu ruihna chuan buaina a siam (Estheri 1:10).

41. Benhadada zu ruihna avangin hmelmaten an hneh a (Lalte 1:20, 16:20). Belsazara zu ruihna chuan Temple bungrua a ti bawrhbang bawk (Dan. 5:1-5)

42. Zu in a ti uang a, rakzu in buaina a tichhuak a, zu rui mifing an awm ngai lo (Thufingte 20:1)

43. Zu leh sa ngaina mi chu a hausa lo ang (Thufingte 21:17)

44. Zu heh mi zingah chuan awm suh la, zu leh sa heh mi chu a pachhia ang a, ruih ching mi chuan kawr ṭet a ha ang (Thufingte 23:20, 21)

45. Tute nge che pawi a, ninawm ṭhin? Buaipuiawm taka vui reng mai si, ṭul lova pem phengphung, meng sen rum rum ṭhin le? Zu in reng mai, zu chi hrang hrang chawhpawlh hratte an ni (Thufingte 23:29, 30)

46. Zu an in chuan dan an theihnghilh a, mi dik chan tur an ngaihthah ṭhin (Thufingte 30:5).