Ruihhlo do kawngah ṭan lak thar a ngai

Mizoram hi khawchhak aṭanga ruihhlo, a bikin damdawi lakluhna kalkawng kan nih avangin state chhungah ruihhlo man leh hemi avanga buai hi kan tam hle a ni. Kumin January aṭanga July thleng khan Mizoram chhungah heroin kg 89 man a ni tawh tih Vanglaini, Thawhṭanni chhuakah tarlan a ni.

Ruihhlo man kawngah ṭan kan lak zel a ngai a, chutihrualin man hnem hi a ṭha lam nge ṭha lo lam tih erawh zawhna a lian thei hle ang. Zu zawrh khapna state ni mah ila, Mizoram chhunga khaw hrang hrangah excise leh tlawmngai pawlten ṭhahnem tak an man a, herion leh a dangte chu chawl loin Mizoram chhungah lakluh reng a ni bawk. Ṭan lak thar kan ngai a, police leh excise kuta dah mai loin kan rama ruihhlo lut hi i do tlang teh ang u.

Ṭan kan lak thar a ngaih rualin a bâwiha tang mekte chhan chhuah dan kawng kan zawn a ngai. Kumin Jan-July chhung khan ruihhlo vangin mi 44 an thi tawh tih, Thawhṭannia chhuakah vek tarlan niin; heng zinga 37 chu mipa niin hmeichhia pasarih an tel bawk. Kan ṭhalaite hi an uiawm hle a, ruihhlo vanga thi an tlem theih nan ṭan lak thar a ngai tak zet a ni.

Kan chief minister zahawm tak, Pu Lalduhoma'n lakluh a nih hnu lawka ruihhlo ngaite enkawlna hmun a tlawh hmasa ber khan a ṭha lam entirah ngai ila, sorkar tharah hian hmalakna chak zawk, a bawiha tangte enkawlna ṭha zawk siam kawngaah leh ruihhlo do kawnga hlawhtlinna hmuh zel inbeisei ang.

Mizoram-a ruihhlo tam chhan pakhat chu Golden Triangle an tih mai, ruihhlo siam chhuahna hmunpui- Laos, Thailand leh Myanmar kan hnaih vang a ni. Ruihhlo kalkawng kan nih bakah a man tlawmna hmun kan nih vangin do rem chu harsa mah se, tun ai hichuan kan nek chep theih erawh a rinawm.

Ruihhlo do tur hian zirna inte hian tihtur an nei ve niin a lang, high school zirlai chin tan hian tun aia nasa zawkin ruihhlo ti lo tura fuih theitu pawimawh tak an ni. Khawthlang rama an tih ṭhin danin ruihhlo ti lo tura intiamtir leh tih chhin pawizia inhrilh thar leh hi kan mamawh a ni. A bawiha tangte chhan chhuah an har si a, heihi kan state sum dinhmun thlirin kan tlin tawk china hma lakna ṭha leh awmze nei thei ber tur pakhat niin a lang.

Kohhran leh khawtlangah tun ai hian sawi tam thar a ngai hle niin a lang bawk. Kohhran hrang hrangah campaign neih ṭhinte hi nakin zelah a hlawkna kan hmuh beisei ang. Khawtlang hruaitute pawhin chhun leh zan chawl loin ruihhlo zuar an dap a, an man sak bakah a ngawlveite chu enkawlna hmunahte an dah ṭhin bawk. Kan ṭanrual zel hi a pawimawh a ni.

Ṭhalai tam tak suat tawhtu ruihhlo do hi khawtlang hruaitute leh police leh excise kuta dah mai loin mitin hian kan mawhphurhna ṭheuhah i ruat teh ang. Tun kan dinhmun hi a chhe ta duai tihna erawh a ni lo, kan ṭhalaite suattu leh state anga hmingchhiatna min thlentu do kawngah ṭan la thar zel tura ṭhahnemngai thusawiah min lo ngaihsak dawn nia.

- Tetea L