AMC

A ṭhenin Mizo a aw b anga an tih ‘a em si’ hmak hmak laiin kei chuan, ka ‘a b c’ thiam sa ve te tete hi hmanna tur dang nei hek lo i, ka ti e-em-si zelh zelh a, ka ti ‘e-ti-si’ telh telh zel mai a ni. Nuam ve tlat. USA pawh kan ti ‘emerica’ thlep thlep chuang lo va, YMA pawh kan ti ‘essociation’ nem hlei hlei vak chuang lo. AAP lah kan ti ‘em-edmi-party leh chuang hek lo. UP pawh kan ti ‘Iuttar Pradesh’ ingeuh kual leh vel chuang hleinemte ka ti vel mai mai a.

Italian football league sang ber Serie 'A' pawh, a ṭhenin Mizo a aw anga an tih Serie 'A' chhan chiang taka ka hriat hma leh an league sang ber dawttu, Serie 'B' khu Serie 'AW' an tih leh si loh chhung hi chuan ka ti Serie 'E' zel mai tang e. Mi Sap ṭawng thiam ve te. Civil Hospital, Aizawl = CHA mak awm hmuk hmuk.

Khawpui lian municipal-te la hmu ngai lo leh la khawsa ve ngai lo keini ang tan chuan municipal inawp dan leh an dan leh hraite hre hek lo i. Ka hriat teuh deuh ber chu, 1984 kuma Silchar-a ka awm laia an bazar lian ber Fatak Bazar a kan vak ṭuma a tuka an municipal hotu lo kal tur an nghahhlelh dan leh an lo zah thiam a, a thu an ngaihchan danzia ka hmuh khan, e, municipal inrelbawlna neih hi a lo ṭha hlein, thu an lo nei hle a nih dawn hi, ka lo ti rilru ve ringawt a.

Aizawl hi municipal city dinhmun leh inrelbawl dan ni tura ngiata bei ngar ngartu, eng steering committee emaw nite khan hun rei tak an nawr chhungte khan ka lo nghakhlel ve em em a. Mahse, ka rilrua mawlmang taka ka lo nghahhlelh ve chhan chu hetiang lam daih hi a ni.

1. Aizawl veng chuanhnuai deuh leh kilkhawr deuh chu thu hran ni se, Aizawl khawpui laili deuh leh mi tinin kan inṭawm tlangdung vela veng ṭhenkhat ramri chungchanga neuh neuh an neih ṭhin vang te, mi zawng zawngin kan inṭawm lai deuh ber leh hmun pawimawh lai deuh ber Treasury Square, Vanapa Hall leh Tennis Court bawr velah pawh tun hma kha chuan Venghlui leh Tuikual vengin veng inrina leh inṭhenna chungchangah neuh neuh an neih reng ṭhin kha. Mahse, tunah chuan a reh ta hrih. Tun hnai deuhah pawh Zarkawt leh Chanmari ten thâwm an neih leh deuh laih kha.

2. Veng inṭhenna leilung ramri-ah chuan thuneihna leh tih theih nei lo mah se, veng hrang hrang inzawm khawmna laia awm, Aizawl ti-Aizawl khawpuitu tlangdung vel leh mi zawng zawngin kan inṭâwm hmunahte hi chuan thuneihna neiin, administration an kengkawh turah ka ngai a ni.

Aizawlah hian Mizo zawng zawng ni mai lo, Mizoram chhunga mihring awm zawng zawngte’n kan mamawh leh kan inṭawm loh theih loh kawngpui tlangdung, office, bazar, damdawi in leh hmun pawimawh tam tak a awm. Heng hmunte hi veng hrang hrang insîk khawm velna laite a ni ṭhin. Heng hmun vela mahni veng area chin te tea lo intihthuneih tum leh power lo show vel tum sek hian nunphung a tibuai a, a tihahthlak a, a zahthlak deuh bawkin ka hre ṭhin. Ṭhenkhat hi chuan mi zawng zawng tana hnawksak, sualna leh rukruk te, mi hnawksakte venna leh vauna atana an tih leh sawrkar tha an tihchakna atana an tih a ni ngei ang. Mahse, ṭhenkhatte erawh hi chu chutiang lam thil vang pawh chu ni berin a hriat ṭhin loh.

Rilru hrisel vak lo aṭanga lo chhuak, mi dangte nuna lo inrawlh tum vang te, mite nunphung leh khawsak dan, an chet lak velnaa thuneih lo tum ve duh vang te, rilu tê lutuk leh ṭha lo aṭanga lo chhuak, mite hmalakna leh hmasawnna itsik vang leh tihbahhlah duh vang te, mi dangte hlim leh zalen chu ngaih theih loh vang hrim hrimna aṭanga lo chhuak ni awma ngaih theih hi a awm fo tawh. Khap leh phal loh, duty leh check tih vel leh thuchhuah eng eng emaw hi a awm fo. Veng ṭhenkhat phei chu an venga eng pawl bera mi emaw hruaitu rilru hrisel lo deuh an neih fuh ṭum leh an neih zin deuh phei chuan hetiang thil hi a zualkai duh ṭhin hle. Veteran politician leh journalist hmasa Pu AV Pakunga, Tuikualin, "Pawl hmalakna anga lang sawisel hlawh deuh leh ṭha lo deuh hi chu han chhui han chhui ila, a tawpah mi pakhat rilru ṭha vak lo aṭanga lo chhuak a ni deuh zel," a tih hi a dik khawp ang.

State khat khawpui ber leh municipal city ve riang ruangah chuan zan reh hi a awm thei tak tak lo a ni. A bik takin mi zawng zawngin loh theih loha kan inhman ṭawm lamlian tlangdung vela, 'Kan veng area chinah zana dawr hawn phal loh, ei tur zawrh phal loh, wayside food truck phal loh,' tih velte hi chu a khawpui rilru lovin a riru têtthlak deuh lo maw?

3. Sawi tawh angina, mi zawng zawngin kan inhman ṭawm leh kan pan khawm vantlang hmuna mahni veng leilung area chin zei zei lo buaipui a, chu hmuna mite khawsa zia leh thil tih reng renga thu neih lo tum leh chutiang hmuna eizawngte’n sawrkara fee leh chawi tur chi hrang hrang an chawi tawh chung pawha veng bil hoin duh zah zah an lo chawitir ve leh zelte hi mi tam tak tan harsatna thlentu a ni. Heng thil khawn vel kaihhnawih leh thil dang vanga veng leh veng innghirnghona lo awm ṭhin hi AMC hnuaiah hian a mawi chiah lo a ni.

Khing point pathum ka siam chhunga ka thil sawite khi AMC awm hnu chuan awm tawh lo tura ka lo beiseite an ni. Tunah hian a bo ta nge, a la awm zel tho? A reh ta deuh a nih chuan AMC thil tih vang nge, mipui kan changkang ve tawh hrim hrim vang?

Engpawhnise, veng bil chhung inrelbawlna hi chu sawrkar dan zulzuiin veng chhungin lo inenkawl mai se, mi zawng zawngin kan inṭawm vantlang hmunte hi chu AMC kutah awm mai se, kan felfai zawkin kan hlim tlang zawk lawng maw, tih hi keia mimawl ngaihdan mai a ni e.

Tuna AMC awmzia ka hmuh dan ziah zawm law law a chakawm hle mai.

- K Hmingthankaia