Sikul kai hun sawn

Tun hnaiah Mizoram sorkar rorelna sang ber Chief Minister hoa Council of Ministers ṭhukhawm chuan, sikul kai hun tihdanglam rawtna an pawm a, April 2015 aṭangin zing dar 8:00-ah ṭan tur a ni.

He thutlukna siam hi School Education depart­ment hotute chuan, "Sorkar sikul leh sorkar aṭanga ṭanpuina dawng sikulte chu sorkar sikul ni sa an ni a, an zawm nghal mai tura ngaih a ni. Private sikulte pawhin Right to Education Act Section 18 angin an zâwm vek tur a ni," an ti a. Autonomous District Council leh Central Sikulte a huam ve dawn em tih chu Sorkar thuchhuakin a la hril zel turah ngai ang.

He thu chhuak avang hian MZU leh NSUI te chuan an lawmthu an sawi a. A bikin kum eng emaw chhung India hmarchhak tana hun hran (East time zone) neih theih nana lo beitu MZP tan chuan an hmalakna zinga kawng pakhat a hlawhtling dawn nia ngaih theih a ni. MSU erawh chuan he thutlukna lo chhuah hma daih thil, a kaikuang aṭanga chhuiin lawmna lam aiin lungawi lohna tur zawkah an ngai hial a; "Zir chianna leh inbuatsaihna mumal awm loa sikul kai hun a sawn hma hi pawi kan ti a... Mipui thamlohna leh hmuhsitna lian takah kan ngai," a ti a, a do zawnga chet pawh a tum a ni awm e. High School, Middle leh Primary School Teachers Association lam aṭangin lawm thu emaw pawh sawi chhuah hriat a la awm lo thung.

Sikul kai hun chungchang thu hian sawi a hlawh hle ṭhin a. Education Department chuan Mizoram rorelna sang berah a thlen a; ngaihtuahna hun pawh seng tam loin hetiang thutlukna hi a lo piang ta a ni. School Education siamṭhatna tur hmanraw pakhat a nih theih rualin Aizawl khawlaia lirthei tawt lutuk tihnepna pawh a nih theih a beisei awm. Cabinet Meeting thutlukna a nih miau avangin thuleh awm hma chuan mahni duh thua sikul kai hun lo sawn danglam ve ringawt pawh a rem tawh dawn lo a ni.

Mizoram chhungah pawh sikul kai hun a inang lo hlawm hle. A bik takin sorkar pisa kai hun pangngai zing dar 9:00 hnu lama sikul naupang sikul la ṭan lo hmuh tur awm nual ṭhinte hi ngaihmawh awl ve tak a nia! India ram khawpui tam tak Aizawl aia nichhuah tlainaah pawh Aizawla sikul tam ber aiin zirna sikul an ṭan hma zawk a; Mizoram pum huap pawhin tumna a awm phawt chuan engahnge kan theih loh bik ang le?

Fulda khua, Germany-ah Fellowship a kan chen chhung rei vak loah khan zirna sikul dinhmun leh naupang kal dante chu ka thlithlai ve ṭhin a. Zing dar 8:00 ah zirna sikul chu an ṭan deuh vek a, chawhnu lamah an bang hma deuh vek. Zing dar 7:30 velah chuan khaw chhung bus pangngai bakah sikul naupang chuanna tur Schule Bus-ah chuan sikul naupang hlir mai deuhthaw tawt deuhin an chuang ṭhin. Hnathawkho chu mahni lirthei hmangin hma zawkah an kal deuh vek. Chutiang tawt lutuk pumpelh duh vangin keini Mizo pathum chuan zing dar 7:00 bus-ah chuangin kan zirna hmun chu dar 8:45 velah kan thleng ṭhin a. Trafiic jam a awm lo tluk deuhthaw a ni e.

Kan zirtirtute khaw pawn lama chengte pawh dar 8:00 hmain an rawn thleng hman vek zel a ni. An Assembly - Parliament ṭhut­khawm pawh dar 9:00 hmain zu ṭan daih a! Zing hun an hmang ṭangkai hle.

Sikul kai hun thar hi zawm a nih chuan Mizoram pumah eng emaw chhung chu nunphung a danglam ngeiin a rinawm. Tihlawhtling turin thingtlanga chengte tan chuan hmun hlaah sikul a awm ngai loh avangin thil harsa a tam lo mai thei. Khawpuia chengte tan bawk harsatna thleng thei tur a awm nual mai. Chung harsatna zinga lian ber pakhat ni thei chu kalvahna 'transport system' hi a ni awm e. April, 2015 hma ngei hian School Education Department thil tum 'sikul kai hun ṭan hma' tihhlawhtlin nan Transport Department chuan Aizawl, Lunglei leh khawpui danga kalvahna 'lirthei tlan dan' tur ruahmanna thar han duang thei se la; mipui nawlpui tan pawh a va ṭangkai lehzual dawn em.

Taxi tlan dan leh man bituk dan thar pawh hi a felfai zawk turah ngai ila. He ruahmanna thar hi a hlawhtlin beiseiin i lo thlir ang u le.