NGO hlutna a tlahniam em ni?

Mizoram pum huapa kan NGO neih len deuhte chu YMA, MSU, MZP, MHIP leh MUP te an ni. Anni hian pawl thil tum mumal tak neiin mipui paw'n an hmalakna te kan thlawp thei fu mai.

Tun hnaiah erawh an hmalakna leh kalphungte enin an dinhmun hian tunhma chu a pha ta lo deuh hlawm a ang hle. An thawm erawh a na thei fu a, hruaitute zingah belhchian dawl lo leh mahni tana chakai khawrh erawh an awm ve nuk ta mai.

Hruaitute zingah reality aia popularity ngai pawimawh zawk an pun chhoh mek avangin NGO din­hmun hian mipuite zingah hniam lam a pan zel niin a lang.

Mipuite hian an pawl thil tum leh mi­puite hamṭhatna tura ke an pen phawt chuan heng pawlte hi kan la thlawp thei viau mai. Chutihlai chuan NGO te pawn lam aṭanga mawng hiah theiha an awm ṭhin avang hian mipuite rinna erawh an hlauh zel a ni.

NGO te hian in­siam ṭhatna tur an ngah hle a, an pawl thil tum bawh buai lo leh mipui tam zawkte hamṭhatna tura ke an pen phawt chuan mipui rinna hi nasa zawkin an nei chho leh thei dawn a ni. Tun dinhmunah hi chuan heng NGO a hruaitu ṭhenkhat hi chuan political institution ang lekah ngaiin thil tak tak aiin a behbawmah an buai nasa zawk a, lar an khel a ni ber mai. Mipuite hian kan duh ber chu inti lar satliah ni lo, a taka thawktu a ni kan hmuh duh chu.

Tuna NGO a hruai­tu ṭhenkhatte nihna leh kalphung avang hian mipuiin an chung­ah rinna kan hloh chho mek a, pawl zahawmna pawh an tichhe zel a ni.

NGO dinhmun hi a tlahniam a nih chuan hruaitute mawh a ni a, Zoram leh mipuite tan insiam ṭha mawlh teh se.