Ka Ngaihtuahna

Mizote hi a hlimchhawn laia ti chiam chiam hnam kan ni a; entirna’n murder case te, human trafficking te, Assam nena ramria kan buai zual tak tak laite. Hengte hi a sarhu lai chuan social media-ah status-ah te, story-ahte kan hmang nasa thei hle; mahse, kar 2/3 a liam chuan kan bawhzui leh tak tak peih lo ṭhin.

Tunlai kan Mizo ṭhalai tam tak, zirnaah pawh thleng sang tak takte hi ram danga hna zawngin an kal a, cruise-ah te, hotel-ahte an thawk a. Han hriat chiana han zawh chuan Mizoramah thawh tur awm loh vanga kal ta an ni tlangpui ṭhin. A ṭhenin sawrkar hnain min daih lo an ti bawk. A zir peih tak tak tan chuan hna hi a vang kher ang em?

Hlawhtlinna hi Mizo ṭhenkhatah chuan hna sang tak chelh hi a ber emaw kan ti a, mahse, eng ang hna hniam pawh thawk ila, taima tak leh dik taka thawh chuan officer chair-a ṭhu nen kan inang reng a ni. US President hlui James Garfield-a policy Spoil System chu a kalpui a, a fuh lo hle a, mi an thih phah a ni.

Tichuan, keini hunah ram changkang kum 1880-a an hman, an inchhir hlena kha kan han hmang ve chhin a, mahse, a hlawngtling ta lo a nih kha. Kan sawrkar hnathawkte hian an hnathawh a hlawngtling em tihte ngaihsak loa hlawh a lut em kan tih hmasak zel chuan hmasawnna hi neih a har a ni.

Khawchhak lam aṭanga kuhva rah tawlh rutute hi kan vei em em a, mahse, a bul tumtu (kingpin) mi lian tak takte hi kan ngam si lo. Tute nen nge an thawhho tih kan hre bawk si lo. Politician-te nen hian inlaichhinnate an nei ve ang em? Hetiang em ema a zual ta mai hi chu ngaituah tham a ni.

Han ngaihtuah chian chuan khawvel mi rethei berte chu middle class family ho hi kan ni a, mi rethei zual tak takte nena kan inthlauhna hi tlemte a ni. Amaherawhchu, mi hausa zualpui tak tak hi an han sang zual bik em em a ni. Heng mi hausa tak takte siam tur hian mi rethei eng zat tak awm ngai ang maw? Mi hausa tel loin mi rethei an awm thei lo a, mi rethei tel loin mi hausa an awm thei lo. Chuvang chuan tu mah hi inhmusit thei kan awm lo.

I ramin i tan a tih theih zawt hmasa loin, i ram tan i tih theih hi zawt hmasa ṭhin ang che. Kan ram hi mi dangin min ei ral lo ang a, tu ma’n min tihmingchhe lo ang. A tichhe theitu chu keimahni bawk hi kan ni. Christian, Muslim, Hindu kan nih hma hian mihring ṭha hi I ni hmasa ang u.

- K Hruaia