Media Leh Journalism
Tun ṭum chu media leh journalism chungchang hi i han thai lang ve thung teh ang. Tunlai ṭhangthar zingah te, nu leh pa thlengte pawhin a ni ang chu, media-in hmanrua ṭhenkhat a neihte hi hre lo tam tak an awm tawh awm e. Tunlai khawvel changkang mek zelah hian media hmanrua lam pawhin nasa taka hmasawnin changkang lam a pan chho mek zel bawk a. Chung media hmanrua kan hriat lar ṭhenkhatte hetiang hian lo thai lang ila.
Reporter: Reporter kan tih hian ṭhenkhat chuan kan hre thiam mai awm e. Reporter chu ram pakhata thil thleng thar chanchin thar atana thu thawntu leh thil chinchang rawn sawituah an hmang deuh ber a ni. Tin, reporter hian mi langsar biangbiakna hi a neih ṭhin bawk.
Correspondent: He chanvo hi ram danga awmte koh nan an hmang bik a. Bial nei deuha thawk niin, entirnan political party pakhat vil bik tur te, court vil bik tur te, khawtlang thil leh leh infiamna lam khawpui chhung chanchin ngaihven biktu atan an hmang ber a ni.
Columnist: Anni ve thung hi chu regular taka subject nei ngaihdan ziak ṭhin an ni a. A tlangpuiin columnist-te hi chu senior journalist tawhte ni tlangpuiin, heng mite tel lo chuan chanchinbu hi a ṭha tak tak thei lo.
Freelance Journalist: Anniho hi hlawh hranpa nei lova an thu ziah hmun hrang hranga thehdarhtu leh, an thu ziahte hralh a ngaih changa hralh ṭhintute an ni. Tin education qualification a ngai lo chungin an hriam hle a ṭul a ni.
Feature Writer: Thu ngaihnawm leh sei deuh, news pangngai aia sei emaw, article emaw ziak ṭhinte an ni a. Deadline a awm chungin reporter-te aiin an thu ziah tur atan research an bei hman deuh ṭhin.
Critics: He mite hi chuan lehkhabu, film, television leh radio programme thlengin an review ṭhin a ni.
A tawp berah chuan journalism lama lut turte tana hriat reng tur chu, hna hrang hrang angin tribal quota a awm ve lo tih hi a ni ṭhin. A thiam leh a thluak ṭha, huaisen leh taima dinchanna profession a ni ringawt mai. Journalist ṭha ni tur chuan a profession luh chilh hma emaw, a hnuah emaw training a pawimawh em em bawk. Thiam inti sa tan pawh training hi a pawimawh tak zet a ni.
- George L Ralte, Vaivakawn