MIZORAM HMASAWN NAN

Census 2011 a alan danin Mizoram mi cheng te hi 10,97,206 kan ni. Kum 2016-ah hi chuan hei aia ṭhahnem tura ngaih a ni. Kristian 9,56,331, Kristian ni lo 1,40,875 vel zet an awm bawk. Mizoram decaded growth rate-in a tarlan dan chuan Mizoram chhung mipui 75 % lai hi khawpui (town) ah kan awm a, lo nei mi tak tak chu 25 % vel chiah kan ni.

Kan ram zimteah kohhran leh pawlte hi kan ngah em em a. Veng khata mi pangngai chin chu committee member eng emaw berah kan tel zel. Kan ram hi committee ramah kan chantir a ni ber mai. A landan aṭang ringawt hi chuan Mizoram chu Kristian ram, eiruk tlemna, rualkhai taka hmasawnna awmna leh thil man pawh tlawmna ram a nih hmel viau mai.

Hetihlai hian tuna kan Kristianna kan kalpui dan erawh hi chu ngaihtuah uluk a ngai ta khawp mai. Pawn lam lan danah chuan sual haw em em, mi hawihhâwm tak hmel pu si hian chhungril nuna kan hlawkna tur a nih phawt chuan sual hi kan haw phal lo.

Kan politician, dan hre mi leh mipui ṭhenkhat ten heng infrastructure hlawhtlinna tiṭhuanawp zawngin hma an la mek a, compensation lak theihna zawngin rail kawngin a sut tlang ngeina hmun turah ram an lei lawk chiam chiam a. MLA term khat chhunga rei an tlawh peih loh a hminga ram an neihte pawh electricity siamna tur tuikhuahin a chim dawn meuh chuan an eizawnna hnar ber tichhiaa puhin dan hre mite nen inremsiamin compensation an dil chamchi bawk a. Kawngpui chungchang ni se chuti bawk!

Kan chief minister zahawm takin NLUP ṭhatzia a sawi kha kan la hre ṭheuh awm e. Chief Minister leh NLUP policy hlawhtlin nana rim taka hnathawktu hi Mizo mipuite hian kan thlawp ṭha tak zet em tih hi ngaihtuah tham tak a ni. Vawiin thlenga BPL family kan la pun zel danah hian NLUP dawngtu tam zawk hian NLUP policy hi an kalpui lem lo tih erawh a chiang. Tin, NLUP hi in khatah pakhat chauh sem a nih avangin Mizoram hmun ṭhenkhatah chuan an fate an indantir nasa mai bawk.

Mipuite hi sum hmanga hnuhkual mai mai theih kan ni zel dawn em? India rama bus fare, taxi, parking fee leh thlai thar man to lawr lak state kan nihte hi engtin nge kan ngaih le? Kan ram hi committee hmanga rel fel chi ni loin, Kristianna hi kan nunpui a hun ta. NLUP sawiseltute sawiselna hi party chirhthehnaah emaw ngai loin, a dawngtu mipui lam te pawh hian NLUP policy ang ngeia kan hman phawt chuan kan ram hian a ṭhatpui ngei a rinawm. Tin, economy lama Mizoram kan ṭhan a ṭhut loh nan railway te, lamlian leh êng (electricity), infrastructure peng pawimawh tak takte hi Mizoram economy
ṭhanlenna ban pawimawh tak mai a nih avangin sum hmuh nana hman phet tum lo ila kan ram hian hma a sawn em em bawk ang.

- Chhungpuia Renthlei