Music industry versus TV
Mizoramah hian 'music industry' han tih tur pawh hi a awm nge awm lo? tih hi inhnialna hmasa a ni a, a awm angah lo ngai ta phawt ila, chu music industry chu tunah hian telivision thuhnuaiah awmin chumi pawn lamah chuan Mizoram rimawi hian tih theih a nei lova, future pawh a nei lova ka hriatna hi ka au chhuahpui ve ang a, kei aia thiam zawkte cho chhuah ka tum dawn a ni.
Radio hi kan rimawi ngaihthlakna hmasa a ni a, radio kaltlang lo chuan lar theih a ni lova, audio cassette lo chhuah hnuah hei hi kan music hmunpui ber a ni a, audio cassette aṭanga lar chhuak hi tuna kan zaithiam hranghlui chang ta tam tak hi an ni. Radio leh audio cassette-a lar ngat hi chu zaithiam vang liau liaua lar an ni.
TV hun a lo thleng a, cable Tv lamin Mizo zai an tichhuak a, chu chu Mizote'n zaithiam tehna atana kan hman chu a ni ta ber mai. Local cable TV-ah duh duh huna hlathlan theihna kan han nei a, hmeh chhuah channel an tih maiah chuan a zaithiam aiin hmelhriat neih
ṭhat leh maksak a pawimawh zawk a, zaithiam lar kan tihte aiin mi thar an rawn lang ta nawlh nawlh a nih kha.
Hun a kal zel a, TV lamin reality show buatsaihin Youth Icon leh Mizo Idol an thlang a, Aizawl pawnah pawh hetiang lam hawi zaithiam thlanna hi nasa taka buatsaih a ni a, TV kal tlanga zaithiam thlante chu namen lovin an lar chhuak ta a, Tv kaltlang lo chuan lar a harsa ta.
Tunah hian TV kaltlang lo chuan a lar theih loh tawp hun kan lut ta chiah a, local cabl;e Tv operator-in an duh duh an tilar thei a, an duhsak zawng an zai tir reng thei a, a dang a awm loh avangin min entir apiang chu zaithiam kan ti ta mai mai a, zaithiam kan tih loh pawhin an lar em em a, cable Tv enkawltu mi tlem te hian he music industry (a awm chuan?) hi an control ta a ni.
Tumahin concert an siam ngam tawh lova, zaithiam leh zaithiam an indo a, an zai an inensak lova, free concert ang deuh chapchar Kut deuh chiah chu mipui an auh khawm theih hun a ni a, chu pawh chu music vanga kal khawm ni lovin kut huau huau boruak vang a ni. Kan music khawvel hi ka ngaihtuah chang chuang, zaithiam, hla ṭha leh aw ṭha aiin hmelṭha leh video quality nei ṭha an sang zawk a, kanz aithiamte hi beng ni lovin mitin kan thlang a ang ka ti a, lo chhunzawm ve teh u....
- Sangi Pa