Sorkar hnathawk

Mizoramah industry lian a awm meuh loa, Mizorama industry lian ber chu sorkar hna hi a ni ti ila kan sawi sual awm lo e. Mizoram budget a chanve dawn ei zotu kan sorkar hnathawk tam tak hian an mawhphurhna an hre tawk loin ka hria.

Sorkarin a hna-thawkte a duhsak a, dinhmun ṭha thei ang berah a dintir a, Mizo mipui nuai 10 chuang zingah sorkar hnathawk nuai 1 vel tan budget 50% dawn a hmang hial a ni. Hetiang khawpa duhsak hlawh hi chuan an tih tur leh an mawhphurhnate an hlen tur a ni a, an hlen lo a nih chuan a ruaitu sorkar hian an lakah action a la ngei turah ka ngai.

Sorkar hnathawk fel leh ṭha tak tak eng-emawzat an awm lai hian, ṭhenkhat zawm thaw deuh leh inthlahdah deuhte hian sorkar hnathawk hmel an tibal ṭhin. Office dawra han luhve changte hian office tam tak chu a ruak hei huai a, office ṭhenkhatah lah dawhkan khat kila lo titi ta vel mai mai pawh an awm ṭhin.

Office hunchhung pawh awm tluan peih lo sorkar hnathawk chu a inenfiah ngai hleah ka ngai. Hlawh ṭha tak neia chhawr, hlawh mai bakah damloh ni khua pawha sorkarin a chhawmdawl, sorkar hna an thawh loh hnu thleng pawha sorkarin hlawh a pek zui sorkar hnathawk office hunchhung pawh awm tluantling peih lo chuan a ruaitu a zah lo hle a ni.

Kan sorkar pawh hi tun ai hian sorkar hnathawkte lakah hian an khauh a ṭulin ka hria. Office huna thleng lo leh ban hun hmaa haw te, office hun laia thil dang lo ti ṭhinte lakah hian tun ai hian han khauh se, hrem ngaite chu hrem hmak hmak mai se chuan rah ṭha a chhuah ngei ang. Sorkar hnathawkte'n hun tiam chhung hna an thawk a nih phawt chuan tun ai hian kan ramin hma a sawn ngei ang.

Sorkar hnathawkte u in enchiang teh u, mipui chhiahhlawh tura lak in nih laiin, nangmahni dawrtu mipuite in lo chhang ṭha peih lo a, in lo induhkhum ṭhin maw? Ngun takin han chhut chiang teh, i tih loh tawp tur i ti a ni. Mipuite pui tura lak in ni a, an thil hriat lohte hrilh hria a, puih an ngaihna hrang hrangah phur taka pui tur i ni asin.

In hnathawh ang thawk chak leh thawk thei tam tak an awm laia i vannei bik (hmelhriat neih ṭhat vanga sorkar hnathawk pawh an awm mai thei) vanga i hna kha thawk i ni tih in hria la, he ram leh mipui tan han insangmar leh teh le.

Hmun hla tak tak aṭangin nangmahni dawr turin mi an lokal a, office hun chhung pawh i awm peih loh avang khan mi tam takin tha leh zung, sum leh pai an seng thlawn tih hria ang che. Ṭan huna i thlen loh a, ban hmaa i haw khan i rawngbawl sak tur mi tam tak tan harsatna i thlen tih hria ang che.

Eng emaw ho te te avanga office i chhuah san, file i pending khan mi tam tak an buai tih hriain i chanvo chinfel zung zung tum ang che. Mi tam tak tana harsatna thlentu nih hi ringtu tan a inhmeh lo a ni.

I vanneih bikzia hriain he ram leh mipuite tan ṭhahnemngai takin hna han thawk la, nangmah pawhin nuam i tiin i nun pawh a hlim ngei ang. Sum leh pai i eiru lo a ni mai thei, mahse office hunchhung i eiru thei tih hria a, i hna tur i thawh ṭhat loh pawh eirukna chi khat a ni tih theihnghilh suh.

Sorkar hnathawkte u han ṭang sauh sauhte u, in hlawh phu tawk leh mil tawkin hna in thawk a nih phawt chuan keini miretheite hian a rah kan seng ngei ang. Midang tana malsawmna nih tuma hna in thawk a nih phawt chuan, mi harsa zawkte tan i va hlu dawn em.

- Lalrinthanga