Damdawi zuarte hausak dan hi
Mihring leh ran tana damdawi hi a siamtu lam factory aṭangin a hlawma hralhchhuak leh a mal (retail)-a hralh chhuak an awm a, Mizoramah pawh chutiang chu kan ngah hle a, state dang aiin damdawi dawr hi kan ngah emaw tih tur a ni. A hlawk a ni chek ang chu maw?
Mizorama dam-dawi zuar reng reng hi state danga damdawi zuar aiin an hausa emaw tih tur a ni a, dawr lian tak tak emaw, dawr te deuh pawh an hlawk viau zel ni tur a ni; an hausa viau zel mai hi a mak ka ti deuh ṭhin. Mizoram hi bungraw lakluhna kawng nei chhe ber pawl kan niin a lang a, bungrua man pawh state dang aiin a to filawr viau a ni. Aizawl aṭanga km 180 vela hla Silchar-ah thil pakhat Rs. 10 a lei theih kha Aizawlah chuan a man chanve laia to-in Rs. 15 te zu ni a.
Kan damdawi zuar mawlh mai hi an hausa ka ti lo thei lo. Theihtawp chhuahin hlawkna umin an thawk a, hah pawh an hah viau reng a, a thawh phu tawk pawhin a hlawkna an tel a ni mai thei. Chuti chung chuan 'ti em ema hlawkna an nei hi eng nge a chhan ni ang le? An damdawi laknaah printed price aiin eng zatin nge an lak hniam a, damdawi strip khatah cheng eng zat nge an ei pawh kan hriatpui hek lo. Rs. 15-a hralh tur Rs. 10-in la ta se, printed price-ah Rs. 15 a nih miau chuan Rs. 5 chu an hlep a ni mai a, an hlawk viau thei reng a ni.
Hemi piah lamah hian mihringte'n ruih nana hman leh kheh-puam thleng hian damdawi zuarte hian an licence hmangin awlsam takin an chah thleng thei a, doctor chawh (prescribe) lem loha manto zawka lo hralh pawh an awm a, an hlawk phian leh nghal. Damdawi dawr lian tak tak neite pawh an hlawkna tam tak hi dik taka an damdawi hralh aṭang ni loin, sorkar leh vantlang huatzawng leh phal loh pelin an kal nasa niin hriat ruk an ni.
Heng sorkar phal chin pela kal hi dam-dawi zuar zingah eng zat nge awm tih chu hriat a harsa em em a, mahse an awm ngei
ṭhin kha. Ruihhlo siam leh nana khehpuam an chawkluh, khawchhak lama tawlh luh pawh a hluar hle a nih kha. Kha khehpuamte kha damdawi zuarte permit hmanga lakluh, a kawr kheh hnua khawchhak lama thawnchhuah leh an ni a, manchhuah an awm a, manchhuah loa thawnchhuah a tam ngiang ang tih a rin theih.
Tunah pawh hian chutiang chu a la awm rengin a rinawm a, an fimkhur vang leh a mantute an bum thiam vanga manchhuah loh a la tam hle ang. Heng ruihhlo tawlh chhuah chungchangah hian damdawi zuarte'n an permit a ni lo lamah an hmang ṭangkai viau a nih chuan hausa tak tak pawh an awm ngei tur a ni. A tlangpuiin state danga damdawi zuar aiin Mizoram damdawi zuarte hlawk leh hausa zawk nia hriatna awm tlat hi rin-hlelhna lian tak a awm vang a ni.
-Zawmpuii pa