Kan ketli chhîn (A ṭial a thâwl!)

Hmân deuha ka thuziak pakhat thupui, ‘Kan ketli thar’ tiha kan ketli chhìn ngei mai kha tuna ka thupuia ka dah hi a ni e!

Kan neih tirh chuan kan ketli chhìn kha a’n nghet em em khawp a, hawng tur chuan pawh deuh fan fan te, sâwi deuh fote kha a ngai a. Tûkchhuah fuh loh deuh ṭum phei chuan thinrim a belhchhahin a pawh pawh ka pawt deuh sawk sawk ṭhin! Kum 2 vel a vei a, chutia sâwi sâwi leh pawh vak vak tâkah chuan a hawn pawh a awlsam ta deuh a (ka thiam tâk vang pawh a ni mai thei), thin pawh a rim khát ta deuh. Mahse, chutia a awlsam tak deuh rual chuan a chhìn vawnchhan zawk chu a thâwl ta riau va, a bûk a bûk ta mai. Buaithlak thar pakhat ka nei ta tlat a, a khât tâwkin chhung lam aṭanga herh ngheh a ngai ta fo mai.

Kan inbual pindana inhrûkpuan leh thawmhnaw dang khaina kan kilh beh pawh ka inhrûkpuan la thla tura kan phih deuh kha a rawn thlawn hlawl mai a, a perek, ṭial nei chi chu chhuatah a tla bal mai a. Ka chhar a kan nawr lut leh mawlh mawlh a, a ṭha ve leh mai a, nghet lêm lo takin!

Kan dressing table chhuar kawngkhar pawh hawnna lah a lo chuti ve bawk. A hmaa a ngheh loh pawh ka hriat loh kha ka’n pawt thlawn leh ta hlawl mai a nih chu! Engtin tin emaw hei pawh hi ka vuah leh a, dîm deuha ka hawn chuan nghîng deuh lei lei mah se, a chhe lo va, ka theihnghilh a, ka pawh pawp erawh chuan a dawk nghal zawk zel mai.

Kan ketli chhìn te, kan bual ina thawmhnaw khaina te, kan dressing table kawngkhar pawh hawnnate hi a tira a siamtute’n an siam laia inmil leh nghet ṭha pangngai tak vek a ni; ketli chhìn phei chu ka duh aiin a nghet nghe nghe kha a nia. A hmangtu keimah zawk hian zawi-awia ama zia ngaichâng chunga ka hman loh avangin a tlin loh chin a lo thleng ve mai hi a lo ni. Kei hian ka tûkchhuah fuh loh châng chuan ka lo pawt deuh sawk ṭhin a, thawmhnawte ka lo phih deuh vak ṭhin a. Chutia a ṭanhmun rem ṭha tak mai keiina ka pawh a, ka phih a, ka sâwi ka sâwi takah chuan an ṭial pawh chu a lo thâwl ve tial tial a, a lo thlawn ta mai a lo ni.

Ṭial thâwl tia tute emaw kim hlel deuhva kan sawi ṭhinte hi ṭial kim leh nghet ṭha pangngai tak, a enkawltuin kan dimdâwi loh avanga lo thâwl zui ta hi a awm theih ang em?

Kan fate hi keimahni duh dan ang chiah zela kan zilha kan hauh hian anmahni mil tur tâwk pêlin kan va tih luattukah hian an ṭial tithawlin,. an nun tihrehawma keh chhe khawpin kan lo sâwiin kan lo pawt a ni thei em?

Kan zirlai zingah kan duh dana kan pawh a, kan sâwi a, kan herh kual nasat lutuk avanga an ṭanhmun kan tihchhiatsak a, tho leh thei lo tura kan namthlukte hi an lo awm mai lo maw?

Engkim mai hi keimahni duh dan ngawta kan kalpui hian nun nghet nei tur mang mang pawh hi nun phawsawlh leh nghet lo takah kan lo chhuah thei reng dawn a lo ni.

Siamtu hian mi tin mai hi a duh taka a siam, ṭha a tih em emte kan ni a, min enkawltu azira tlo leh hmasawn emaw, chuai leh hnufûm emawah kan chhuak thei dawn a lo ni.

Kan ketli chhìn chu a ngheh loh apiangin dawhthei takin ka herh nghet a, ka hawn dawn pawhin ka’n dîm deuh a, ka dim loh dawn hian a thâwl hma dawn tih hre chhuakin ka insûm ṭhin. Kan dressing table hawnna chu a kilhna perek ṭial thâwl tawh kha ka pasalin Araldite hmangin a siam a, nghet takin a inkilh leh a; chutiangin kan thawmhnaw khaina, bual ina mi pawh chu.

Kan fate, kan zirlaite leh kan ṭhen leh rualte pawh a ni ang, kan duh ang anga kan duh dana awmtir kan tum hi an tlin reng bik lo tih hria ila. An ṭial kan lo tithâwl a, an nun kan lo tihrehawm emaw a nih pawhin, pereka Araldite hnawih te, ketli chhìn tinghet tura kan herh leh mai angte hian keimahni lamah eng nge kan tih theih ngaihtuah a va ṭha dawn em!

Mi tin hi mahni tâwka ṭhatna nei, min hawlh min hawlh erawh chuan ter ve at mai thei kan ni tih hriain, mahni duh dan chauh ni lo, mi dang nena inrema khawsak dan zir ang u le.

- Dikteii Hnamte