‘Hmai plain’ dik tak chu hei ngei hi a lo ni!

Hmun pakhatah ni sarih chhûng, July 23-29, 2024 khan chawnghei ṭawngṭaina neiin hun ka hmang a. Chumi ṭuma ka testimony tam tak zinga pakhat chu a pawimawh em avangin, tlâng hrang hranga ringtute hian kan lo hriat atan ka duh em em a ni.

Tunlai hian ‘hmai plain’ a lâr viau mai a. Mi ṭhenkhatte chuan an lo hlau hle a ni âwm e; min tibuai viau zawng a nih hi!

Kei pawh chu, chutia chawnghei ṭawngṭai ka neih lai chuan zan khat chu zanlai velah hian ka rilru suangtuahna ramah hetiang hian a lo lût a: ‘Ka awmna hmun, Ṭawngṭaina In tukverhah tak mai hian tunlaia an sawi fo ‘hmai plain’ an tih hi lo langin, a lo dak ve thut mai angah,’ tiin. Chu chuan ka rilru a luah khat ta tlat mai a! Tichuan, tukverh chu ka melh ka melh ta mai a; ka muhil thei ta rêng rêng lo mai a!

A khât tâwkin thlî a rawn thaw heuh heuh reng a. Ngaw kâra Ṭawngṭaina In awm tih takah, thing ṭang ro te tak tê tête leh thing hnah rote chu ka awmna Ṭawngṭaina In chungah chuan a khât tâwkin a rawn tla ri leh ṭhin a. Thâwm dangte erawh chu a reh ruih mai a, rilru a kal ding duh ngei mai.

Chutiang kârah chuan ‘hmai plain’ an tih chuan rilru a rawn tibuai leh ṭhin a. A awmzia berah chuan, sualin ‘hmai plain’ hmangin min rawn tihṭhaih a ni ber mai âwm e. Tichuan, chu ka ngaihtuahnaa thil awm chu duh lovin, muthilhsan daih tumin ṭan pawh ka han la viau a; mahse, a sâwt mawh hle.

Chawnghei ṭawngṭaina neia patling meuh rammû mah ni ila, ‘hmai plain’ an tih chuan ka rilru a luah hneh a, tihṭhaihna ka tawng nasa hle a nih chu (A tak taka amah chu lo kal ni lovin, ka rilru ramah vek zawk a ni e!).

Chutiang dinhmuna ka awm lai mêk chuan, ‘A ni maw, kei ngei pawh hi ‘hmai plain’ an tih hian min lo va tibuai ve tho tak em!’ tiin ka inngaihtuah nasa ta mai a!

Tichuan, chutianga hun eng nge maw chen ka hman ral hnuah chuan, “Ringtute hi khatiang hmai plain-in a tihbuai che u ai khan, in mobile phone (hmai plain) khan in nun a tibuai daih zawk asin,” tiin ka rilruah chuan thil lo thleng thar a awm ta a. Ka rilru chu a harh ta hawk mai a! Êkhai, a ni dawn tak maw, ka ti ta a ni.

An sawi fo ṭhin, ‘hmai plain’ lam rêng rêng chuan ka rilru luah ta lo chuan, kan mobile phone ‘hmai plain’ hi ringtute min tibuaitu dik tak a lo ni zawk a ni tih leh, khîta an sawi, ‘hmai plain’ ai khian kan mobile phone ‘hmai plain’ hi kan nun atan a lo hlauhawm daih zawk a ni tih chu ka ngaihtuahnaah a rawn awm ta a. Ka rilru chu a tikal thui ta hle mai a. Tichuan, hun eng nge maw chen a liam hnuah chuan Pathian ṭanpuinain tui takin ka muhil chhunzawm thei ta a ni.

Pathian tel lova min awm tlei ṭhintu, nupa kâr min tiṭhen ṭhintu, ṭhiante laka min ṭhen hrang ṭhintu, zirna min pawt chhe ṭhintu, infiam mite min tihmasâwn thei lotu, kohhrante min tichak lotu, Bible chhiar leh ṭawngṭai min thlahthlamtir ṭhintu leh ram leh hnam hmêlma (etc) dik tak chu kan mobile phone ‘hmai plain-a’ ngei mai hi a lo ni e!

Genesis 4:7-ah chuan hetiang hian kan hmu a: ‘Sual chu kawngka bulah a bawk reng a ni; a duhzâwng chu nangma hnen lam a ni ang a, a chungah thu i nei tur a ni,’ tiin.

‘Sual chu kawngka bulah a bawk reng a ni’ tih thu ang hian, mi tam tak chu kan mobile phone ‘hmai plain-a’nen hian kan inhnaih reng ṭhin a ni. Ni tina kan bulhnaia awm reng leh kan khawih hmasak ber fo leh, kan khawih zin ber ni fo chu kan mobile phone ‘hmai plain-a’ hi a ni.

Chutiang chu a nih avangin, ‘A chungah thu i nei tûr a ni’ tih thu ang hian kan mobile phone ‘hmai plain-a’ chungah hian thu nei tlat tur kan lo ni e. Chutianga a chunga thu kan neih loh vaih chuan ‘hmai plain-a’ zâwk hian min thunun mai dawn a ni.

Lalpa’n Mosia hnenah a tiang ṭangkaizia sawi a tumna atan, "I kuta mi kha eng nge ni?” (Genesis 4:2) a ti a. Chutiangin, Mosia’n a tiang chu kawng engkimah a hmang ṭangkai ṭhin a nih kha. A nihna dik takah chuan, a tiang tel lovin engmah a ti thei lo emaw ni tih mai tur a ni. Kan hriat tel tur erawh chu hei hi a ni: Mosia tiang chu chutiang taka ṭangkai leh thil ti thei a nih avang chuan ama duh dan danin a hmang tur a ni lo va, Lalpa’n a hman dan tur leh a hman hun tur a hrilh ṭhin zâwk a ni.

Aw le, Mosia tiang chu chutiang taka a ṭangkai ang chuan kan mobile phone hi a hmang ṭangkai thiam tan chuan kawng engkimah a ṭangkai em em a. Tunlai hun atanah ngat phei chuan a tel lovin engmah kan ti thei lo emaw ni, tih mai tur a ni. Nimahsela, chutiang taka a ṭangkai em em rual chuan, a chunga kan sawi tawh ang hian, kan Kristian nun min eichhetu a ni bawk si.

Chumi awmzia nia lang ta chu, kan mobile phone ‘hmai plain-a’ hi a hmangtu keimahni thununna hnuaia awm lovin, kan mobile phone ‘hmai plain-a’ zawk hian a neitu hi min lo thunun zawk ṭhin tihna a lo ni. Chutiang chu ni lovin, a neitu hian kan thuhnuaiah dahin kan thunun zawk tur a ni.

Kan tana ṭangkai tur tâwk chauhvin, Pathian duh dan leh remtih chin ang zelin kan mobile phone-te hi i hmang ṭheuh ang u. Lalpa’n malsawm rawh se. Amen! 

- R Lalvenhima, PFS (TEM Speaker)