Ka hâng nâ a, ka nalh a nia!

Vun rawng hrang hrang kan awm a, ngo leh hâng deuhte pawh kan awm a; mi tin inan theih ni hek lo. Hetih lai hian ngo leh hâng chungchang hi kan buaipui viau mai a, kan thil sawi danah hian ngo hi tehkhâwng pakhatah kan hmang emaw tih mai turte pawh a awm. Hengte hian ngo châkna pawh min neihtir phah a niang, tunlaiah hmeichhia chauh ni lo, mipate pawh an tel hial tawh a, damdawi leh thil dang hmanga intihngo tum kan tam ta hle.

Dawr leh online bazar lamah ngona damdawi chu marketing ṭha tak a tling tawh a, an zuar sup sup a, an sold out zung zung bawk. Hmai ngona, taksa pum ngona... tiin, a khai chi leh ei/in chi bakah, hnawih chi, chi hrang hrang an zuar chuai chuai a. An ‘before’ leh ‘after’ thlalakte a inthlau thei bawk si, ‘Ngo ngei ngeina’ te an ti hmiah mai zel nen, han hman ve a châkawm thei bawk em a ni.

Heng damdawi hmangte hian an lo ngo phah deuh pawh a ni mahna, a nih loh paw'n an vun a dáng/vár zawk pawh a ni mai thei. Mahse, eng angin nge hna a thawh a, taksa lamah eng angin nge nghawng a neih ang, khuareiah a him ang em tih erawh ngaihtuah zui a ngai viau mai.

Ngo leh hâng hi hmelṭha leh 'glow' tehna tur a ni ngai lo a; vun hrisel neih hi a pawimawhin a mawi zawk hle tih kan hriat a ngai. Kan pianpui vun rawngah lungawi ila, duat leh uluk takin enkawl ila, hâng deuh hlek pawhin kan 'glow' nalh em em thei reng. Ngo leh han lam aiin vun hrisel leh nung neih kan ngaih pawimawh a, chumi nei thei tura kan inenkawl uluk a ngai zawk e.

Vun mawi tak neih duh siin kan ei leh in, zûk leh hmuam lamah kan inuluk kim leh peih lo ṭhin. Pawn lama kan hnawih ringawt duhtawk loin, ei leh in thlenga invawngin taksa kan enkawl ṭhat a ngai a ni. Cosmetic product man to tak tak hmang ṭhinin, sum tam tak seng ngam mah ila, vun a hrisel loh chuan a lang mawi thei lo a, kan 'glow' dawn chuang lo.

Hriselna ṭha kan neih theihna atan thlan titla tam tura taksa sawizawi peih te, thlai leh thei ei tam te, tui in tamte a ngai a, rilru hrisel neih a ṭul bawk. Hetianga kan invawn ṭhat miau chuan chhung lam chauh ni loin vun thlengin a lo nalh phah ang a, hâng mah ila kan mawi em em dawn zu nia. Eng vun rawng pawh pu ila, Pathian mitah chuan thuhmun vek kan ni a, 'Ka hâng nâa ka nalh a nia' tiin kan mawi em em mai dawn a lo ni.

- Lungen Mami