DOCTOR LEH NPA

Hman deuh aṭanga sorkar hnathawkte zinga chanchin lawmawm deuh kan hriat tak fo chu pension chungchangah a ni. Sorkar hna thawk ṭhenkhat chuan an service kum aiin an kum dik tak a tam zawk tiin pension-in a chhuak ta fur mai a, an fakawmin an rinawm ngawt mai. Tun hnu hian zirlai zingah scholarship dil leh lak chungchangah pawh harhtharna ṭhami kan chang chho zel a, dik lo taka scholarship dil leh lak tum an awm ta mang lo niin a lang; zirlaite leh an nu leh pate an fakawm ngawt mai.

Mizo Kristiante hi kan mak angreng khawp mai. Thil dik lo kan tih hi miin an hriat leh a tlangthan hma chu kan ti zui char char duh zel mai. Chu mai ni lovin, miin an hriat, ṭhenkhatah phei chuan nasa taka tuartu an awm tawh hnuah pawh la ti zui ngat ngat duh pawh kan tam khawp mai. Chuti chung chuan tui takin, intineitu takin mahni kohhranah rawng kan bâwl zel thei tho bawk si lai hi thil mak tak chu a ni.

Sorkar hnuaia doctor-te tan private practice hi dan phal loh a ni sa hrim hrim a; dan bawhchhiain private-in an practice a ni. Private practice damdawi atan Non-Practising Allowance pek an ni a, inthlahrung miah lovin, an dikna chanvo chang ang hrimin private practice chungin NPA an la hmak hmak bawk a. Mi pangangai tan chuan thil zahthlak tak a ni.

Doctor-te mamawhna hi a sangin a nasa em a, private-a an lo practice hi chu ngaidam ta mai ila. Amaherawhchu, NPA tal hi chu la lo ve ngam thung rawh se. Ka ngen lo, a chahin ka chah a ni. Hna sang leh zahawm, hlawh tam tak nei pawh kan rinawm loh chuan mi rethei kan tih maite tan phei chuan rinawm hi thil harsa tak tur a ni. Party worker-te’n hna chhe tê tê an lo beisei ve hi chu âwm tak a ni zawk, kan doctor-te nena khaikhin phei chuan.

Kan incheina leh kan hmui-hmai te, kohhran leh pawl danga kan che vel han en hi chuan hetiang thil dik lo tak ti duh tur hi chuan kan lang mawlh lo asin maw le. Doctor-te pawimawhna leh hlutna, kan mamawhna sanzia chu inhrilh leh chuan kan ngai lo. Mahse, doctor-te hna leh an hnain a ken tel hre saa zir leh thawk an ni. An pawimawh em avangin dan an bawhchhe ngawt thiang lo. Sorkar hnathawk dang pawh mahni hnaah chuan mi pawimawh leh an tel ova tih theih loh tam tak an awm. Chung mite tan chuan dan bawhchhiat phalsak an ni bik chuang lo ang chiah hian doctor-te pawh hian anmahni inkahhhruaina dan chu an zawm ve mai tur a ni.

‘Kan lo ti dik lo a ni e’ tiin NPA hi la tawh lo rawh se. Anni berin hma an hruai chuan mi dang chuan kan zui em em ang. Inla value lutuk bik suh se. An tana siam dan chu zawm ve ngei rawh se. An retheih phah lo ang a, an zahawm phah sawt thung zawk ang.

Hei hi ka thurâwn ve chu a ni: Sorkar doctor zingah private-a practice duh an awm chuan mit siai san ila, NPA erawh an la tawh tur a ni lo. Private-a practice lo na na na chuan NPA pawh la ngei se la. Heti chung hian dan pakhat zawk ‘Private practice phal loh’ tih chu an bawhchhiat kan haidersak tihna a la ni fan. Sorkar thar hian huaisen takin, inthlahrung miah loin he thil hi chu champion-pui ngei teh se. A tawp thlengin kan thlâwp ang.

Tin, sorkar doctor ṭhenkhat hi chu sorkar damdawi inah an duty tlem em em a, ṭhenkhatin private hospital dinin, ṭhenkhat private hospital-a thawk kawpte pawh an awm. An rilruah damlote ai mahin damlote aṭanga sum siam a lian zawk daih tihna a ni. Hengte pawh hi chinfel a ṭul khawp mai.

Kan sorkar thar hian Mizote ‘comfort zone’ hi min kal pelhpui hram teh se.

- Chawngthana