Inhmu sakhi tawh lo ila

Ṭhiandun ramvak, pakhat zawkin sa emaw tia a ṭhianpa a kah palh thu kan hre ta fo mai a, hei hi ‘tihpalh’ kan tihpui reng thei dawn em ni aw? A tuartu lamin a tipalhtu hi a pawi khawih ang taka a phu tawk hremna lek turin hma la ta se engtin nge kan ngaih ang?

Kan hunlaia sava veh nachang hre lo kha chu tlema tuai deuhah kan ngai a, a perh thla tam leh awk tam apiang kha kan ngaisang a. Ṭum khat chu silai ka hawh ve a. Ka kalpui pa chuan silai nen thlam min nghahtir a, a ni’n ka thlang deuh fea sunhlu rah tlan sakhi a chang a. Niin suk a chen awm vel aṭang chuan ka silai chu ka muanpui lo ṭan ta riau a. Ka silai chu kan load ve rap a, balhla hung kar aṭanga sakhi lo dak chhuak hmuh tumin hung hrang hrang ka tin lawr zet zet a. Ka ṭhianpa chu lo chhuak har hi ka ti khawp a.

Khua a thim dawn tihah ka thlangah chuan aw thian kharh thawm kan hria chu, lawm a hnehin ka phu nasa kher mai. Ka silai ken ve kha ka lek kual lai a ni lo hlauh a le! Ka kalpui pa hi chuan sa a kah dawnin a mei emaw, a beng emaw a chian zet loh chuan a pang sen che mai maiah silai a hmeh per ngai lo a. Kei ve chuan sa lo chhuahna lam tur nia ka rinah chuan hnim che zet zet pawh hmu ila, ka thal ka thlah mai dawn tih ka chiang ta reng mai.

Sa pelh hi ṭhen­khat chuan sport chi khatah an ngai a, silai changkang ber ber nen office ban leh Chawlhniah te an chhuak ṭhin. Ṭhenkhat lah thlawhhma la ve duai e ti lo hian an sa pel duha talangin thlawhhma an ngaih­tuah ṭha hman lo a, nupui fanaute an rim al al ṭhin khawp mai.

Sa beia a huhoa chhuah chang a awm a, hetiang hunah hian ‘ba leh saihlum a nget lo’ ti rilru chunga inhmuhsual palh pawh thil awm thei a ni. Thema ṭhu zawkin, “Ṭhianpa sakhi e law i nih?” a ti a, leia mi chuan hlau tak chungin, “Ni lo ve, Mawia ka nih hi” a ti lawm lawm chung pawh a, “I huk e lo maw?” a tih ṭalh chuan thil pawi a hnai viau a ni.

Ramvah dawn hian ramsa rawng lam, a sen leh uk lam hak hi inhmuh sual tiawl tak tur a ni a, a dum lam lah ni se sanghal/ savawm rawng a ang tho si. Vawikhat ṭhianten min hmu sual se... chuti hlauh. Ramvah ching zawng zawng lah kei ang chauh an awm ve ngei awm si.

Vawikhat inhmuh suala thil pawi thleng thei a nih avangin ram vahna rilru tung ṭhain Animal Planet vela hmuhnawm thlira thlir hi ka duhtawk ta khawp mai.