Mizote leh OBC chungchang

Mizo hnam tana Gorkha-te OBC pek a him lohna tur nia lang leh a chhehvelte:

1. Central Government hnuaia hna hrang hrang laknaa OBC-te tana reservation dah zat 27% a ni.

2. India rama OBC quota neite hian Central-ah chauh ni lovin state service-ah pawh OBC quota/reservation an pe vek. Central quota/reservation chauh neihna state a awm lo. Chumi awmzia chu Gorkhali-te’n OBC quota an neihna state-ah hian central leh state-ah reservation an nei kawp vek.

3. Gorkha-te hian OBC status hmu ta se, central hnuaia hna lakna atan chauh an ti nain, hun kal zelah state sawrkara hna hrang hrang laknaah OBC quota an beisei ngei dawn a. OBC quota hi 27% a nih avangin an puala hna dah hran tur zat hi a ṭhahnem hle dawn a ni (State-in an dah zat erawh a inang lo).

4. State dangin OBC quota/reservation hi an lo pek deuh vek avangin Gorkha-te hian ṭan chhan an nei ṭha hle dawn a, state sawrkar tan dâl a har hle tawh ang. Court-ah kal se chak theihna chance a sang thei hle ang. Tunah hian Mizoram Gorkha ho hian thiam takin central hna lak atan chuan kan hmang ang an ti nâ a, nakinah thiam takin National Commission for Backward Classes-ah an kal ang a, anni recommendation ang chuan court emaw central sawrkarin emaw state-ah reservation siam turin an ti mai dawn a ni.

5. Sawrkar hna hrang hrang laknaah mai ni lo, local/municipal body-ahte pawh OBC reservation hi dah theih a ni bawk. Tun hnaiah J&K-ah chuan OBC-te tana local bodies-a reservation siam turin Lok Sabha-ah bill put luh a ni. State ṭhenkhatah OBC-te tana local bodies-a reservation siam a nih lohna turin high court-te hial pawh an inrawlh a ngai bawk. Tunah pawh Uttarakhand sorkar chu Supreme Court-in municipal bodies-ah OBC reservation siam turin a ti. Chutiangin Madhya Pradesh-ah pawh Supreme Court-in local body election-ah OBC reservation siam turin a ti bawk.

6. India ram state-a Gorkha-te OBC reservation petute hi non- tribal state deuh vek an ni a. Kan chhehvela tribal state leh keini state aia Gorkha population tamna state-te hian OBC status an pe lo. NE state zingah Meghalaya (54,716) Arunachal Pradesh (95,317), Nagaland (43,481)-te hian OBC Reservation an pe lo (bracket chhunga mi hi 2011 Census-a Gorkha population a ni). Kum 2011 Census-ah khan Mizoramah Gorkha 9,025 an awm a, tunah chuan an pung leh viau tawh turah ngai ila. Tunah hian Northeast state-ah Assam, Sikkim leh Manipur-in OBC an pe. Permanent Body-in Gorkha-te OBC status pek tur chin a bithliah hi ni 26.1.1950 hma lama Mizoram a awm chinte an ni a, chungte chu mi 7,687 an ni.

7. State-ah OBC reservation an neih chuan state sawrkara hna lak tur zat aṭangin Gorkha-te tan hian reserve a awm zel tawh ang a, ram leilung fate’n kan chuhpui ve thei tawh lo ang.

Kan hma lam hun hi tu man kan sawi thei lo va, tunah central-ah chauh lo lungawi pawh ni se, kum 10/20 hnuah daih pawh state quota hi an la rawn dil ngei ang. Chutih hunah chuan dan a har viau tawh ang. Chuvangin, nakina atan kan himna turin tun huna hma kan lak hi a ngai a, nakinah chuan a tlai tawh ang.

Mizoram hma lam hun hi tun hunah a innghat e.

- Vanlalruata (VL-a), Ex-President, CYMA