Kaziranga National Park ka tlawh ve a..

Assamese hmanlai thawnthua Kazi (tlangval) leh Ranga (nula) te chu an in hmangaih em em a, an chhungte'n inneih an phal si lo a; Kaziranga ramngaw-ah hian an tlanbo ta a, hei vang hian he ramngaw zau tak hmingah hian "Kaziranga" hming an vuah hlen ta niin an sawi.

Kaziranga National Park (KNP) hi Assam state chhung Guwahati aṭanga km 217 zeta hla, Nagoan leh Golaghat district chhunga awm a ni a, square metres 430 a zau a ni. Kum 1905 khan British awpna hnuaia Viceroy of India, Lord Curzon chuan a nupui Lady Curzon thurawn angin he ram ngaw hi nungchate zalen taka an chenna turin a din a, UNESCO chuan kum 1985 khan world heritage site-ah a puang a, khawvel pumah samak ki khat nei (one horned Rhino) awm zinga hmun thuma ṭhena hmun khat awm angin an chhut a, chu samak ki khat nei chu mit ngeiin kan zu hmu ve a ni.

Mizorama journalists member 11 chu Forest Minister Pu Lalrinmawia Ralte leh forest official-te duhsakna-in he hmun tlawh tur hian February 24 khan forest department bus-in kan kal a, heta kalte hruaitu (team learder)-ah a hmingin ka ṭang ve khanglang a, midangte chu Champhai MJA treasurer C. Lalhnunpuia (DDK); Serchhip MJA president Kapliana Pachuau (Serchhip Times); FC Laldinpuia (Zoram Herald) Lunglei; Lawngtlai MJA fin. secretary Lalnunkima (HS Vision); Lalnunzira (DDK, Aizawl); Zonunsanga Kawlni (Lenkawl, Serchhip); T. Lalrosiama (Tipa Express, Saiha); Lalnunmawia Kawlni (Duhlai, Kolasib); Lalremruata Khiangte (Kawrthah Post, Kawrthah) leh Lalzuiliana (Kolasib Today, Kolasib) te kan ni a, Lawngtlai district tih loh district dang kan kim vek a ni.

MJA general headquarters chuan member-te khaw hawi tihzauh nan KNP tlawh hi a dil a, a dil angin minister Pu Lalrinmawia Ralte chuan hma min laksak a, forest department officer tenen ngun taka an ngaihtuah hnuah he hmun tlawh theih nan hian bus leh pawisa min tumsak a, kan lawm takzet a. A bik takin Chief Conservator of Forest (central circle) Pu Lalthangliana Murray chuan theihtawpin hma min laksak vangin he tour hi a hlawhtling ti ila kan sawi sual lo ang; a bik takin a chungah lawmthu kan sawi tak meuh a ni.

Kaziranga National Park (KNP) ah hian samak ki khat nei chi bakah sakei ṭhahnem tak a awm bawk a, kum 2006 khan tiger reserve-a puan a ni leh bawk.

Samak, sakei bakah hian sai, sanghal, sazuk, sakhi leh sava chi hrang hrang ṭha­hnem tak a awm bawk. Heng ramsa zingah hian Mizoram state animal 'Saza' bakah sakhi leh sazuk te, ram-ar te leh sai te kan hmu a, sakei erawh km 30 zet bial chhunga kan zawn pawhin kan hmu ta lo a ni.

He hmun tlawhtute riahna tur hian cottage hrang hrang mimalin an nei a, kei ni chu Kohora khuaa Sneha Bhawan-ah kan thleng a, zing khawvar hma deuhah thoin km 13 vela hla-ah kan kal a, samak ki khat en turin khualzin an lo phu mur mur tawh a. Keini pawh sai chungah chuangin km chanve bial velah kan inkhalh chhuak ve a, kan sai chuanna chu lian tak, ka ban pil fe a ni a, mi pali kan chuang a ni. Sai chunga chuangin khualzin dangte nen kan vak thelh suau suau a, samak ki khat nei chu hmun nga vel laiah an lo tla a, a ṭhen chu a mal te, a then chu no hruai lai te an ni.

Breakfast ei zawhah jeep safari (gypsy) hmangin sakei hmuh tumin kan fehchhuak leh a, km 30 vela thui kawng blacktop loah kan tlan a, mahse sakei erawh chhun khawlum vanglai a nih bawk vangin kan hmu ta lo. He ram chhungah hian forest department chuan hmun engemawzatah chawlhbuk an siam a, vai leh sap chi hrang hrang pawhin an lo fang ve mek bawk a ni.

KNP hi National Highway 37-in a tan tlang a, he kawngpui hi district ṭhenkhat chhak lakna ber a nih bakah industry engemaw zatin bungraw lakluh nan leh phurhchhuah nan an hman vangin motor lian vei vak a tam a, hei vang hian Environmentalist thenkhat chuan KNP-a ramsate tan a him lo tiin an dodal thin a, lirthei veivak tam lutuk chu National Green Tribunal (NGT) hnenah zual koin khap turin an ngen a. NGT chuan complaint a ngaihtuah hnuah Assam sorkar chu NH 37 hi divert turin a hriattir a, mahse kawngpui chu district ṭhenkhat tan kawng pawimawh ber a nih si avangin hmun danga divert chu a harsa a, hei hi Assam sorkarin a ti puitling thei lo a, NGT chuan motor tlan chak zawng (speed) chu khuahkhirh turin a hriattir leh a ni.

KNP chungchanga Assam sorkarin thubuai a neih bakah samak te hi an sapel ru ṭhinte lakah an him lo hle a, nikum khan Assam-a national park hrang hranga samak kahhlum zat hi 20 chuang a ni. Kuminah KNP ah samak pathum kahhlum a ni tawh bawk a, district dangah pakhat kahhlum a ni tawh bawk. Sapel ru thinte hi ULFA leh Bodo hel te niin Forest department official te chuan an sawi a, hei vang hian KNP vengtu Forest Guard te tan chuan beihlet an harsa niin an sawi a, mahse nikum khan sapel ru ṭhin mi 20 vel an kaphlum. Assam sorkar chuan tunhnai khan sapel ṭhinte lak aṭanga ramsate venghim tur Forest Protection Force changtlung takin din a tum a, hma a la mek a, ramsate venghim nan drone hman a rawt tawh bawk.

He hmun tlawh tura bus kan kal hi a kawng a thui tham a, Aizawl aṭangin Shillong-ah riakin hetah riah phalna hi Mizoram GAD-ah dil a ni a, Dy. Residen­tial Commissioner Pu Jacob-a chuan ṭha takin min lo thleng a, kan hawlam February 27 tlai khan zanriah min buatsaih sak nghe nghe a, a chungah kan lawm hle a ni.

Sawi tawh angin kawng a thui tham a, kan bus driver pawh a hah tawngkhawng a niang, Kaziranga kan thlen zan aṭangin a khua a sik a, bus khalh haw leh thei loin a awm a, inzir zawpin km 300 zeta thui national highway four lane-ah ka khalhsak a, darkar khata km 100 velin kan tlan ve vang vang a, motor lian la khalh ngai reng reng lo kha ka tan chuan experience ṭha ve tak a ni.