Ka beidawng deuh tawh
Beidawn duh lo ni mah ila tunah chuan ka beidawng ṭan tawh. Kan thil thlir dan ka en hian ka beidawng ru tawh. Chu ka thil thlir dan chu chhiartute ka han share ve duh che u.
1. Kohhran Upa leh Pastor-te meuh pawh an ṭhat lohna lam hre thei hnam kan ni. Rawngbawltute ngaisang lo hnam kan ni. An sualna ni lo an hnathawh ṭhat a tam tehlul nen kan hmuh chhun hi chu an tlin lohna, an fel bik lohna, rawngbawltu ni lo pawhin an tih duh loh an lo tih duh mialte hi kan hmuh theih lai a ni. Kan rama Pathian rawngbawltute ber an tlin tawh si loh chuan kan beidawn mai loh chuan beiseina mawl tak kan nei tihna a ni dawn.
2. Engineer kan hmuh dante hi aw... ka ngaihtuah chian hian a dik thei lo. Mizo engineer zingah eiru an awm ka ring a, a ṭhente hi chu ei ru pawh ni loin ei lang an ni. An in leh car, an huan lo ram aṭangin a hmuh theih. Ka sawi tum zawk chu engineer-te hi in tha tak tak min siamsaktu, kawngpui min siamsaktu, lei min dawh saktu an ni tihte hi pawm ve tho ila, electric eng min petu leh lui aṭanga tui min pump saktu an ni. An hlu em em a ni. Engineer inngaihsan loh siak hnamah kan chhuak mekin ka hria. Class X mathtmetics leh science pawh pass hleithei loin, "Engineer ve mai mai," kan han ti hi chu engineer-te ka lainat ru ṭhin.
3. Doctor-te duhâm hmuha hmutu hnam kan ni. Doctor-te chu min tidamtu, natna khuma kan awma min kana min bawihsawma damdawi min chawhtu an ni. Zai kan ngaihin min zai a, kan nunna min chhansak ṭhin. Doctor-te hi eizawnna zawnga eizawnna zahawm ber pawl an nih tehlul nen, Mizo ṭhalai tam tak hi chuan, "Doctor ka ngaisang bik lo. Sum an duh si. An hnaa an thawh ṭhat loh nen private clinic lamah sum an duh vangin an ṭhu peih leh tho si," an han ti bawng bawng mai a, doctor pawh ngaisang chuang lo hnamah kan chhuak ta niin ka hria.
4. Politician-te hmusit hnam kan niin ka hria. Pu Zoramthanga chu ṭhangtharte fiamthu thawhna a ni a, a minister hlui ṭhenkhatte chu an hming leh eiruk inzawm tlat hmuhin an hmu. Pu Lal Thanhawla ni se kan zah loh mai bakah kan sawi chhe tawn tawn a, a minister thawk ṭha ve deuh pawh, "Thil dangah an ṭha chuang lo," tiin an ṭhatna an sawi duh lo. Pu Lalduhoma ni se an rin tak tak loh thu hlir an sawi a, ṭha nia an hriat chu anmahni chiah a ni. Income-a dawt ziak luta scholarship buaipui ve tho zirlaite'n kan Chief Minister ngat ni theite leh politician chal langte hmusit em ema an ṭawngkhum ka hriat hian, he ram hian aia upa zahna a nei ta lo a, mi hmasate zahna leh ngaihsan tumna a nei lo a, mahni leh mahni insawi len chawp mai mai hi a buaipui ta niin ka hria a, ṭhangtharah hian ka bei a dawng ru tlat.
5. Mahni kuta a tlaka sum duh hnam kan niin ka hria. Ka sawi tum tak chu mahni kuta a tlak chuan sum thianghlim lo hi kan hnar ngam mang loin ka hria. Sum thianghlim lo hhnar ngam ṭhangthar hi kan neih loh chuan heng mite hi lo puitling pawh ni se tuna kan buaina hi a zual zel dawn tihna a ni ang. Zirlai pawl hruaituten hnathawh ṭhulh ṭhaka zirlai pawl an hruaina ramah hian khawia pawisain nge an inchawm? tihte hi ka rilrua riak reng ṭhin a ni. Mahni hna ṭhulh ṭhaka YMA hruaitu ni ta maite pawh he ramah hian an awm ta zel si a, tuna kan kal danah hian ka bei a dawng deuh tlat.
Beiseina ka neih chhun chu halpuah hlawhtling taka kan khap thei kha a ni a, zirtirna ṭha leh ruahmanna fel tak neih chuan Mizote hian thil ṭha tih hi kan la hre vak lo chuan ka han hre ve a, ka inti fingin thil ka thlir kual vel a, ka ngaihtuahna ka kawm a, ka beidawnna hi beiseina chhe te chuan a la kalpuiin ka hria a ni.