Bungraw fakna rimawi

Tun hnai, kum tam pawh a la vei hman hma hian electronic media lamah kan ṭhang nasa a. Sumdawng, company, mimal leh pawl chi hrang hrangin kan hmang ṭangkai hle a, mah se he thilah hian vei ka nei nual mai.

TV kan han en a, sumdawng, pawl leh mimalten fakna an tichhuak nasa tawh a, an bungraw ṭhat bikzia leh tlawm bik dan te an rawn sawi a. A background rimawiah hian sap hla lar tak tak leh hnam dang kut chhuak rimawi an hmang nasa em em a.

Hei tak hi a nia ka lo ngaimawh leh ka rilru kaptu, local channel fakna ka en tui loh phah chhan chu.

Tun hnaiah Mizo music industry pawhin hma a sawn em em a, hei hi hman ṭangkai tum ila. Instrumental/ guitar solo album siamte pawh kan awm nual tawh a, hengho bakah hian Mizo hla ṭha tak takte pawh a tam tawh mai. Minute hnih emaw minute khat lek atan chuan an ui ka ring lem lo a, a thlawna hman tur tam tak a awm tho ang a, an remti vak lo a nih pawhin minute 2/1 lek atan chuan man to taka lei a ngaih pawh ka ring lo.

TV advertisement kan han en a, english leh Hindi channel ah te chuan anmahni ṭawnga hla an hmang a nih loh pawhin instrumental te an hmang a, a changkang em em a ni.

Keini Aizawl khaw chhung dawr bungrua kan fak laia kan bungraw fak nena inmil lo lutuk, sap hla leh hnam dang hla, Mizo kut chhuak pawh ni lo instrumental lar lutuk tawh tim hauh loa kan hman hmang mai ṭhin hi chu sim hram i tum teh ang u.

Kan lo changkan zel nan kan local channel-a fakna kan tihchhuahin keimahni local/ Mizo kutchhuak ngei hi bungrua leh fakna dang la tichhuak leh zel turte pawh hian hman hram hram i tum ang u.

Engkimah sapho kan ngaihsanna te hi heng thil mai maiah te hia chuan paih/ hnawl ngam ila, kan Mizo puite kutchhuak ngei hman hram hram tum ila. Changkanna ropui tak chu kawng khat talin kan chuangkai ngei ang tih ka ring tlat a ni.