Sawhthing politics
Tun hnaia sawi hlawh ber pakhat chu Mizoram sorkarin kut hnathawktute thar chhuah sawhthing lei a tum chungchang hi a ni awm e.
Mizoram sorkar leh kut hnathawktute ai mahin eptu lam hian an ngaihven zawk em aw a tih theih. Tun hmain kut hnathawktute'n an thlai hralhna lamah harsatna an lo tawk tawh ṭhin a, tam tak chu an beidawn phah a ni.
Sorkarin sawhthing lei a tum takah hian kut hnathawktute an phûr thar tih loh rual a ni lo a, kum dang aiin sawhthing ching an pung nasa hle nia sawi a ni. A lawmawm tak zet zet. Kan kut hnathawktute hi an thawh rah phu tawk an hmuh dawn phawt chuan an thatchhe lo tih a chiang hle.
Sawhthing hi kg. khat Rs 50 aia toa hralhna an hmu lo a nih chuan Mizoram sorkarin kg. khat Rs 50-a leisak a intiam a, kut hnathawktute tan pawh a phurawm hle. A hralh hun a thlen hma hmain kawng hrang hrangin eptu party-te chuan an sawisel a ni.
Eptu party-te'n an sawisel dan han en hian kut hnathawktute an hmangaih vang ai mahin, sorkar policy hi hlawhchham se an tih vang a ang thei lek lek zawk.
Sorkar hian a intiam anga thil a tihlawhtling a nih phawt chuan kut hnathawktute tan chuan ZPM hi an hlu dawn a, inthlan lehah pawh an thlauhthla phal hauh lo ang.
Hei hi eptu lam hian an hlau em ni aw a tih theih.
Mizoram sorkarin a intiamna a tihlawhtling lo tih tur pawh a la awm hma hauha sawi bawrhbanna tur lo zawn phet hi chu kut hnathawktute hmangaih vanga chhal a har. An intiam anga an ti leh si lo a nih erawh chuan na takin eptute hian kut hnathawktute thlavang hauh ngei thung rawh se.
Kut hnathawktute sum lak luh a tam hian Aizawl lamah pawh sum lengvak a tam. Kut hnathawktu tamna state, keini state angah chuan kut hnathawktute hi kan duat deuh deuh a pawimawh. Industry leh company liante kan la nei ve si lo a, kan economy chawikanna atana pawimawh tak chu kut hnathawktute an ni.
Tun hma aṭangin politics ball-ah kut hnathawktute hman an ni ṭhin; hawh u, i hmang tawh lo ang u. An dinchhuah ngei theihna atan ngaihtuahna senpui ila, sorkar hian a bum a nih erawh chuan na takin an thlavang i hauh tlang ang u.
- Lalrinthara