Higher education-ah zirna ṭha pawng lak tum zel a la ngai dawn em?

Kan rama zirna in sang, higher secondary school leh college (oawl 12 leh a chung lam zirna) hi mi tinin kan vei ta emaw ni chu aw tih tur khawpin kan sawi nasa a, a lawmawm khawp mai. Kan vei dan erawh chuan ram pum huap sâwt tlanna tur thleng ngei se. Tun hnaia Govt. Champhai College mamawh zirtirtu ngiata MZP-te hmalakna kha a hlawhtling dawn niin a lang a, an lawmpuiawm khawp mai. Chutih rualin, intihhmuh chi a ni lo tawp tih erawh hriat a ṭha. Mahni khua/veng/district bil ang zawnga kan kal vak chuan kan inpawt pherh vak ang a, ram pum zirnain a tuar thei dawn tlat.

Kan ram hruaitute hian zirna siamṭhat an duh a, an hun lai ṭheuhvah a changtu minister-te (School Education leh Higher & Technical Education-a mite) pawhin ṭan an la viau ṭhin. Hma pawh kan sawn ve zel a, duhthu erawh a la sam hlei thei meuh lo thung. Chutih rualin, tunlai hian thil lawmawm deuh mai chu–khawpui leh thingtlang college-te rualkhai zawka kaltir duhna avanga zirtirtu (principal/ professor/ associate professor/ assistant professor/ lecturer)-te college/school hrang hrangah mamawhtute mamawh dan mila sem rual ni se, tia thutlukna, tun hmaa an lo siam tawh ṭhin, an kalpui hleih theih tawh loh ṭhin chu tunah hian tihhlawhtlin ngei tuma chak taka hmalakna a awm hi a ni. Kalphung thar duh sawrkar leh a changtu minister chak leh huaisen kan neih vang a ni ngei ang.

Zirtirtu sem rual (tum) hian nghawng a nei na duh hle ṭhin. Tlem lai deuh khan, ‘Zirtirtu sawn chhuah an phal lo… an dang…’ tih thawm a awm ṭhin. RUSA hnuaia zirtirtu atana an lak leh mamawh hmanhmawhna avanga an lak chawp nawk nawk, zirtirtu la ṭhalai deuh, thiam tak tak site kha a ngheta lak an nih dawn chuan post ruakah ngei dah an ngai tawh si a. An lo thawh mekna college, theihtawp an lo chhuah tawhna kha an rilruah a lo bei nghet hman a, an zirlaite lahin an lo ta neih hman tawh ṭhin bawk nen, chhuahsan mai an harsat ṭhin a ni. A âwm viau.

Zirtirtu, mahni thawhnaa zirlaite’n an chhuak tur an ui ngawih ngawih chuan thil lawmawm tak a ni a, ‘chhuak thuai thuai se’ an ti ang tih hi hlauh zek zek tur a ni. Chutih rualin, kan hotute thu awih phawt mai hi zirlaite leh a nghawng mek college tan mai ni lo, kan ram pumpui kal zelna atan a pawimawh ngawih ngawih a ni. Siamṭhatna hna thawh tak tak dawn chuan vawi khata vawi khat chu rîk laih hi a awm lo thei lo; chu chu sut tlang ngei ngei tur a ni. Sut tlang loh chuan ‘a zual zawpui vailen hlo’ tih ang kha a ni mai. Tih thar leh dawn pawhin a hma aiin a har sawt a, siamṭhat a khirh zual sauh tawh ṭhin.

Tlem lai deuh khan kan ram hruaitute zingah ‘a ngaihna hria’ tih ṭawngkam hi a lar viau thin a, dik kan ti a, kan lawm viau ṭhin a nih kha. Tunah erawh chuan a ngaihna hriat ringawt a tawk tawh lo; a taka kalpui a ngai tawh. Thil, a ṭha zawnga kalpui tak tak tur erawh chuan huaisen a ngai khawp mai. Tun hma hlek khan kan HTE hotute’n ‘Zirtirtu sem rual/inkal thelh/inthlak kual dan’ (teacher- rationalization/exchange programme) ṭha deuh mai an duang chhuak a; a lawmawm tawh tehreng nen, tute emaw he policy duh lotu emaw, awm hmun sawn huphurhtu emawte boruak rit, tâwn tlang huphurh vang ni maw, an titlang ngam ta lo va, a uiawm khawp mai.

College-a thawktu zawng zawng deuh thawte’n khawpuia luh an duh a, luh hram dan tur an dap char char a; post ruak–pension hnai leh vanduaina (thihna) tawk an awm hlek chuan chung mite chhuahsan hmun ruak chu chan ngei tumin an kherh ngar ngar a, inchuh buai, inhmu thiam lote pawh an awm hial ṭhin. Hengte avang hian khawpui college-ah chuan post ruak a awm hman meuh lo. An chhuahsan college, a bikin thingtlang college-a post ruakte erawh chuan ngaihsak an hlawh nêp khawp mai. Post ruak an nei deuh reng ṭhin. Khawpui college-a thawk, thingtlang college-a sawn chhuahte chuan hrem tuar ang hiala an inngaih laiin, thingtlang aṭanga khawpui lut theite erawh chuan promotion hmu ta ang hialah an inngai thung; mi pawhin an ngai tlangpui.

Mak deuh mai chu, zirtirtu thingtlanga awmte hian khawpuia an luh theihna tur a nih dawn phawt chuan eng chhuanlam pawh siam an hreh lo a ang. Hmeichhia, pasal nei tawhte pawhin an chhuahsan tawh an nu leh pate damlohna/harsatna chhuanlamah zu hmang duha maw le. Sut tlang ngai chu a chiang khawp mai.

Zirna siamṭhat nana kan ram mamawh ber ni a ka hriat tak chu: Ram tana ṭha turah chuan kan ram roreltute hian tlak phah ṭhak dawn pawh ni se, dodalna nasa tak karah pawh huaisen takin kalpui hmiah hmiah rawh se. Ram an hmangaih tak zet chuan an la lawm zawk tho tho vang. NGO, MCTA, MZP, MSU, etc. te pawhin chutiang kawngah chuan sawrkar thlawpin an kut tihchak tum bawk ila; kan thlâwp thei ngang lo a nih pawhin dodal lo tal ila, hma kan va sawn rua e.

- Dr. Lalsiamhnuna