Bike-a Proton vuah an ninawm
Aizawl khawpuiah bike cilencer ri tihrinna (proton) vuah an la tam mai a, heng hi hi kea kal leh a bula awmte tan an ninawm a, lung lam ṭha lo tan phei chuan hlauhawm tak a ni. Chak tak takin an tlan a, a bengchheng em em mai si. Hetianga dan bawhchhiahte hi traffic police lam hian engatinge an man rem theih miah loh le?
Pathianni angah te phei chuan khawpui daifemah a huhoten an inzui a, an in tlansiak ṭhin bawk a. an tlanchak vangin an hlauhawm a, proton an vuah avangin an bengchheng em em ṭhin. Zan reiah kawngpuiah chk takw tawkin an han tlan phei chu rapthlak tak a ni. Muhil lai pawh an harh zawk zawk thei a lawm le.
Dan bawhchhe rau rau-ah hetianga mimal zalenna pawngsual a, bengchheng siama an awm reng bikna tur a awm lo. Chuvangin Transport department-a vehicle lam changtute leh traffic police lam hi inthurual se, hma han la deuh teh se. Mi kut tuara hliampui an tawrh hma hian. Chuti lo chu mimal emaw, a veng ang pawha ninawm lutuka an tlan vel hi lung tum emaw, silai emaw, sairawkherh emaw an hmachhawn ang tih a hlauhawm hlel lo e.
Bike kher lo pawh motor ṭhenkhat chuan proton an vuah a, heng ho pawh hian bengchheng an siamin an ninawm ve tho mai. Thuneitute leh dan kengkawhtute hian ṭan han la deuh teh se. Dan bawhchhia an man pawh a na thei ang bera hrem chi an ni. An licence cancell sak te, an documnent hrensak thleng pawhin hrem an ṭul ta viau mai.
Aizawl dai mihring chennaa intlansiak ngat phei chu a hlauhawm em em ringawt. Heng veng/khuaa chengte hian hmanraw hmanga an thinrimna an lo hrithla anih pawhin an demawm lutuk lo ang. Mihring hian intluk tlanna leh zanlenna kan nei ṭheuh a, chu kan zalenna leh intluk tlanna midang nekchep nan kan hmang thiang bik lo tih hi kan hriat reng a ṭha.
Lirtheia dan bawhchhiatna ṭhenkhat hi chu midang tan a ninawm lem lo a, a hlauhawmna a awm lem lo. Entir nan side glass vuah lo angte hi chu a ngaihmawhawm hran lem lo. Mahse midang tana harsatna siam hi chu dan bawhchhiatna a ni. Chuvangin ka sawi ang hian traffic police hi thuam chak deuh nise, mi tana harsatna siam chi hi chu hmehmih ran a ṭha khawp mai. Pathianniah checking an nei fo pawh hi a ṭha khawp mai.
-Lalkhirhvela