Lengpui Airport hi a nihna tur ang takin kalpui ila

Tunlaiin Lengpui Airport hralh tumna chuan sawi a hlawh hle mai. Hemi chungchang hi ngawihpui tum mah ila, chhung lam turna a na sâwt hle mai a, chuvangin ka ngaihdan leh hriat ve dan ka au chhuahpui ve tawp mai a ni. Uluk takin lo chhiar chhuak u la, lo ngaihtuah chhunzawm teh u.

Kum 2022 kum tir, 21st January, 2022-a sorkarin a din Mizoram Resource Mobilization Committee (MRMC)-ah MIMA President ka nihnain Committee Member-a min ruatna appointment 24th January-ah ka hmu nawlh mai a. Hetiang Mizoram tana Committee pawimawh lutuk maia member ka ni chu ka insit viau chungin ka lawm hle. MRMC hian Mizoram tan 60.79 crore teh meuh a thawk chhuak hman a ni. Mipuite khawih lutuk si lo aṭanga resource mobilize chu a tum ber niin, ruahmanna tam tak thawh khawm a ni a, kei pawhin kan committee hmasak ber 1st February, 2024 aṭangin Mizoram tana ka lo vei ve ṭhin, resources awm thei tur ka thawh ve nual mai. Mahni ram tana thawh chu nuam ve tak a ni. He lam chu sawi vak lo mai ila, tunlaia sawi hlawh tak airport-ah lut tawh mai ang aw.

Lengpui Airport hi hralha tute emaw hnena thuneihna pe kher lovin, mipuite phurrit siam chuang si lovin resource mobilize tur hi a tam hle mai a. Lengpui Airport an hawn ni 12.12.1998 aṭang khan revenue awm theihna tur chi pawh ngaihtuah lovin a kal miah miah mai a. MRMC 2022 a lo din khan committee chuan nasa taka hma lain, an hmalakna zarah passenger manah ringawt April 2022–March 2023 chhung ringawt pawhin cheng nuai 389 a la lut a, a bak tam tak lak luh theihna tur a la awm a ni.

A nihna ang tak chuan revenue tur ngaihtuahin ṭang ila chuan a hnuaia mi ang hi India rama lak luhna tur duan sa ang thlap a ni.

1. Passenger hi kar tin mi 4,000 nei ang a ni a, passenger zawng zawng hnenah Rs. 229 charge tur a ni. Passenger service fee (RSF) chu kar khatah 4,000×229 = 9,16,000 a ni ang.

Journalist senior leh rintlak ber pawl Pu HC Vanlalruata chuan ni 3.8.2023-a Union Minister for Civil Aviation Jyotiraditya Scindia-a'n Lok Sabha-a Tamil Nadu MP SR Parthiban zawhna a chhanna rawn la chhuakin, "Kum 2022-2023 chhung khan Lengpui ṭumhmun chuan cheng nuai 389 a la lut a, a sum sen chu cheng nuai 676.91 niin kum khata a sum hloh chu cheng nuai 287.91 a ni,” a tih thu a sawi.

Pu Ruata hian nikum April leh kumin march thla inkar chhung khan Lengpui ṭumhmunah hian mihring lut leh chhuak nuai 4,20,000 chuang an awm thu a sawi bawk. Hetiang hi a nih phei chuan passenger service fee hi a tam ang hle ang; kum khatah 4,20,000×229 = Rs 9,61,80,000 a tling dawn a ni.

2. Landing charge: Kar tin thlawhna hi vawi 21 ṭum ziah ang a ni a, vawi khat ṭumah Rs 12,435 lak tur a ni. Kar tin 12,435×4 = Rs 2,61,135+GST per week a ni ang.

3. Route navigation facility charge (RNFC):

Delhi – 3 flights

Guwahati – 6 flight

Kolkata – 9 flights

Imphal – 3 flights

Agartala – 3 flight

Heng flight aṭang hian kar khata Rs 1,25,000+GST a ni. Tunah chuan Delhi flight a awm ṭeuh tawh. Pawisa lut pawh a tam tawh leh zual ang. Hemi Airport-a lak luh dan kan hmuh hi a rei deuh hlek tawh a, passenger hi an tam chho zel a, hemia chhut dan pawh hian kar khatah Rs 13,02,135 a ni a, thla khat chawlhkar 4 leh kum khata thla 12-a puntirin, kum khat lak luh hi Rs. 6,25,02,480 +GST a ni.

Pu HC Vanlalruata, Times of India correspondent-in tun hnai maia a article-ah passenger lut leh chhuak a ziah dan phei chuan kum khatah passenger ringawtah 420000×228 = Rs 9,61,80,000 a ni dawn a ni. Pu Ruata’n passenger zat a ziah hi a update zawk mai thei bawk.

Heng mai bakah hian Lengpui Airport-ah hian parking fee lak a ni a, tuna mi bakah hian state danga an tih angin parking lodge senso sang lutuk si lovin siam se la, zin mite an zin chhung man chawia a dahna tur kalh theihin siam se la, sum tam tak a lut ang. Private siamah open air-ah kan motor man to tak kan han dah ṭhin hi chu uiawm tak a ni.

Hei mai a ni lo, sorkar quarters 73 a awm a, a free vekin an luahtir a, maintain ngai se, Mizoram sorkarin a tum a, cheng vaibelchhe tel lak luh theihna turah a thlawnin an luah. Hei hi quarters an pek dan chu a ni a, a la dik turah ka ngai.

Airports Authirity of India – 25

Airport security unit, MRP – 10

Aviation department – 14

Air India Ltd. – 4

CRPF – 2

City fire – 1

IOCL – 1

MET – 2

MPRO – 1

PHED – 1

PWD – 8

Vacated – 4

Total – 73

Aviation Wing hnena lut tur restaurant pawh pahnih a awm bawkin ka hria. Kum tin 10 crore chuang lak luh theih tura thil awm sa reng ngaihthah a nih vangin sorkarin a lost mai mai a ni. A nihna ang takin kalpui se, senso zawng zawng paihin Mizoram sorkar hian a hlêp zawk ngei ang.

Sumdawng te, sorkar hnathawk te, mipui, damlo leh thil danga ṭangkai leh hlu em em Lengpui Airport hi i hralh mawlh lo ang u. MLA zahawm tak, Adviser to CM ni bawk Pu TBC Lalvenchhunga chairman-na Working Committee to Look into the Maintainance and Management of Lengpui Airport pawhin lo mangnghilh lul lo turin ka ngen a ni.

- PC Laldinthara, President, MIMA