Bangladesh lakah kan ram kan chân ta em ni?

March 2 Vanglaini chhuak, phek 2-naa 'Borapansury-a balu lakna hawng' thupui hnuaia ka news chhiar khan ngaihtuah a tithui hle mai. Helai hmuna balu lakna lui hi tualchhung mite chuan Mizoram leh Bangladesh inri-naa ngaiin hun rei tak balu lak nan an lo hmang tawh a, India sorkarin lui aṭanga Mizoram lama metre 150 velah ramri a hung avangin Border Guard of Bangladesh (BGB) te chuan balu lakna hmun hi "No Man Zone"-a puangin Mizoram lam amite tan balu lak a khap a ni. BGB te hian Border Security Force (BSF) te nen inbiakna an neih hnuah inremna siamin a duh apiang tana balu lak phal a ni leh ta a ni.

Bangladesh sipaite hian hun rei tak chhung Mizoram hi an lo khuah­khirh tawh tihna a ni thei em? He thil hi ngaihtuah chian a hun hle.

He news article-a Tlabung Post editor thusawi, ramri hungna pawn lam ram chu India lamin an chan taa a ngaih thu a tarlan hi ram chan kan duh lo tak zet a nih chuan bawhzui a ngai a ni. India-in hmarchhak biala ramri hung hna a thawh mekah India ram bung eng emaw zat chu ṭhenawm ram, Myanmar lamah a lut nia sawi a ni a, hei vang hian Manipur-a pawl hrang hrangte chuan Moreh hmuna ramri hung hna kalpui mek pawh an dodal a, hei vang hian Moreh hmuna ramri hung hna hi hmun eng maw zatah chawlhsan lailawk a ni.

Kan ṭhenawm Assam pawhin India sorkarin Bangladesh ramri rem­na a siampui, Land Boundary Agreement (LBA) chu nasa takin a dodal mek a ni. LBA hi land swap deal tia sawi a ni bawk a, inremna ang chuan Assam ram bung eng emaw zat Bangladesh mite'n an luah chu Bangladesh hnena pek a ni dawn a, Bangladesh ram Assam mite'n an luah chu India hnena pek a ni bawk ang. Hetihlai hian Assam lam chuan he inremna avang hian an ram acre 286-a zau an chan dawn niin an sawi a, hei hi Assam-a zirlai pawl lian ber, All Assam Students Union leh tlawmngai pawl dangte chuan an duh lo hle.

Mizoram pawh tla­muang taka kan awm lai hian kan ram hi kan lo chan duai thei a, India sorkarin ram venhimna avanga Mizoram chhunga Bangladesh ramri a hung avanga kan ram bung ṭhenkhat Bangladesh ram lama a lut hi a pawi a, inchi khat pawh ram hloh tum lo Mizo ṭhalai te'n hemi chungchang hi kan bawhzui a ṭul.

Kan issue hrang hrang avangin Union Minister te hian Mizo­ram an tlawh khat a, UPA leh NDA sor­kara home minister pahnihte'n Mizoram aṭanga chhuak tau, Bru te chu Tripura-a an awm hmunah an tlawh tawh a, kan ram mipuite duhdan leh ram humhim tura kan inpekna hi sorkar laipuia hotute'n hre ve tawh rawh se.

Kan ram chhungah Mizoram sorkar kan ngam tluk zet hian state pawn lam, sorkar laipuia bawhzui ngai kan issue tam tak hi huaisen taka au chhuahpui a hun tawh hle.