Zoram nghahfak - Zirlaite auhla kha!

A hmuna ka awm ve chiah loh vangin, 2nd. March 2015 (Mon) chhuna zirlaiten scholarship 10 % la pek kim loh pek phuta kawngzawh an huaihawt kha internet lamah ka lo en ve a. An ṭhahnemngaihna leh an tumruhna a ropui ka tih viau laiin, an auhla erawh kha chuan ka ngaihtuahna a vahkual thui tir khawp mai.

Israel Prime Minister hlui, Benjamin Disaraeli-a'n, “Tuna zirlai la ni mekte hi nakin lawka ram leh hnam la hruaitu tur an ni" tia Israel Parliament House, ‘Knesset’ a lo sawichhuah la chhawng a, zirlaite hi ram leh hnam darthlalang an nih kan lo tih fo ṭhin tawh angin zirlaite hian kan ram inrelbawlnaah hian pawimawhna thuk tak kan nei a. Kan pawimawhna hi kan inhriat chian lehzual pawh a ngai khawp mai. Zirlai kan nihlai hi kan thisen lum vanglai leh engemawni zawng tala chetlak nuam kan tihlai a ni ve tlat bawk a. Chuvangin, he kan hun pawimawhlai tak hi kan hman fimkhur a, kan rilru insiam puitlin chhoh lai mek a nih angin kan inven thiam pawh a ngai khawp mai. Chuti a nih loh chuan kan damchhung hun ṭha tur vuak chhiatna hmanruaah hman hlauh theih a ni.

Tin, Sawrkar hian ram tana ṭha a ngaihtuah zawk tur nge mipuite lawm­zawng leh duhzawng ringawt tih pawh hi zirlaite mai ni lo, Zoram mipuite pawh hian kan ngaihtuah ve reng a ngai. Mipuitena keimahni hamṭhatna atana ṭha leh dik nia kan lo hriat ve ringawt angte hi ram tana ṭha a lo ni lo maithei bawk a. Chungte chu kan ngaihtuah tel ṭhin a pawimawh khawp mai. Kan ram politics pawh hi ngun takin han thlir kir ila, tuna kan politician ṭhenkhatte pawh hi politics lipuia an zuan luh hma hi chuan khawtlang leh Kohhrana mi hmingṭha tak leh fakhlawh tak, mipuiten kan ram siam ṭha tura politics khelmuala kan auhluhte an ni nual a. Mahse, politics a an han luh chiah hian a chhe thei ang berin kan chhuah leh chuai chuai ṭhin. Mipuite pawh hi kan lo dik lo zawk em ni le aw tihte pawh min ngaihtuahtir thei awm e.

Chutianga kan lo ngai kher lo a nih pawhin a kotlang aṭanga lo thlir ringawt leh a tak tak lo inthlauhzia tur tal hi chu ngaihtuah thiam ṭhin ila. Sawrkar lam harsatna leh an dinhmun khirh ve turzia lam ngaihtuah lek loa, famkim ber awm hrima a chhe thei ang bera kan han inchhuah chiam chiam ṭhin hi chu a fuh zan lo. Politician-te kan aiawha ram leh hnam tana ngaihtuahna sengtute an nih vangin tu party pawh ni mah se, kan zahin kan ngaihlu thiam hle tur a ni a. Hetianga ṭawngkam uchuak tak tak - ‘Hawl-eka’ ‘Babutea’ ‘Zuanglawra’ tia auhnawmnah kan ching hi chu mahni inenlet kan ngai nasa hlawm hle.

Facebook group ṭhenkhata kan ṭawng­kam hman dan ṭhin te reng reng hi a uchuakin a rapthlak thei khawp mai. Hetianga ṭawngkam thlahdah tak taka hmang a, ram hruaitute au nawmnah a, ram leh hnam hmangaih ber awm ang ziazanga ṭawng chhuak ṭhinte hi tu pa mah hian ram leh hnam hruaitu atan kan it hauh awm lo e. Zofate kan moral lo chhiat tawhzia leh kan rilru ngaihtuahna siamṭhat a hun tawhziate pawh min ngaituah chhuah tir thei awm e.

Zirlaite hi ka demin an thiltih hi ka sawisel tihna a ni reng reng lo. Keini pawh College kan kal ve laiin a hmingin zirlai hruaitu te pawh kan lo ni ve reng tawh ṭhin a, an rilru tur awm ang pawh ka hriatthiampui khawp mai.

Tunah pawh zirlai ang tho chu kan la ni a, scholarship te pawh a kima dawn chu kan duh ve lutuk, a mamawh ber ber zinga mi pawh ka ni hial ang. Mahse, keimahni hamṭhatna kan duh vang ringawta sawrkar lam harsatna kan hriatthiampui lo a, a chhe thei ang ber zela kan puh ringawt zelte chuan engtin nge khua leh tui ṭha kan nih theih reng ang? John. F. Kennedy ṭawngkam hawhin tlang ka'n kawm ang e - “Ka ramin eng nge mi tihsak theih tih ai chuan ka ram leh hnam tan eng nge ka tih ve theih tih kan ngaituah zawk tur a ni.”