Pawi ber mai chu - Zu
Kan ram roreltu, a bikin Congress Ministry hi ka fak ṭhin tehlul nen, MLPC Act an han passed ta mai hi Pathian pawi kan sawi niin ka hria.
Nu ṭhenkhat thu sawi turin, ‘Ka sawi loh chuan ka awm a nuam thei dawn lo, min tur ut ut’ an tih ang hian awmzia thui tak a neih chu ring ngam lo mah ila, ‘Sawi loin ka awm thei lo’ a nih ber hi maw.
Kan sorkar hruaitute hi an fakawm hlein ka hria a, corruption chungchangah pawh an fihlim khat ni ngei tur a ni; session-ah meuh pawh eptu lam pawhin an sawi lo hle mai a, anmahni pawh an infuih nasaa hriat a ni.
An flagship programme - NLUP pawh hi a ṭha a, rethei chhanchhuahna atan a bak a awm chuang lo a ni ang, party dang pawhin rorelna an chan lai khan Jhum control tih te, Dry Terrace te leh MIP te an ti ve tho a nih kha. Kan sawisel a nih pawhin mipui lam zir loh vangte pawh a ni ngei ang.
Zu zawrh pawizia hi kan la hre dawn chauh a ni. A chhan chu Mizoram hi Lalpa zawn chhuah ram, Chanchin Ṭha avanga enna hmu ve ta kan ni.
Biak-inah Pathian thu angin zu kan do ang a, pawn lamah kan thlah zalen leh si ang maw? A ni thei lo.
Ram hmasawna tur kan ngaihtuahnaah Pathian thu aia khawvel finna leh thiamna kan rawn zawk chuan kan tifuh hauh lo ang. Pathian zawn chhuah ram, a mi leh sate kan ni si a.
MLTP Act kan hman lai, sorkar, NGO leh Kohhran thlenga zu kan do lai khan zu hi Pathian duh lohzawng thil a ni tih mipuiin kan pawm vek a. A in ṭhinte pawh Pathian leh midang chunga thil sual tiah kan ngai vek ṭhin. Zu in mite pawh Pathiana piantharna an neih chuan an zu in ṭhinte pawh an bansan vek ṭhin.
Kan do rem theih loh avanga rorelna sang berin a han thlah dul a, zawrh phalna leh in phalna a han siam ta mai hi a dik thei dawn em ni? Pathian thu hi a danglam ve si lo a. A ṭhatlohzia chu Assembly-a an han passed thawm aṭang ringawt pawhin Aizawl chang ni lo, thingtlangah pawh a ti ṭhinte an zalen nghal a, an huangtau zual sauh a ni.
Permit-in awmzia a nei vak lo, zalenna a siam a ni ringawt. Aizawl mai pawh rui leh rui lo, permit nei leh nei lo check reng a harsat dawn nen; Mizoram pum chu engtin nge an tih tak ang le?
Pawi ber mai chu mipui thinlunga zu chungchanga kan ngaihdan min hruai sualtu, Pathian duh loh zawng pawh pawisak lohna min siamsaktu a nihna, Pathian dodalna ni si hi a ni. Pathian thu chu a danglam ve si lo.