Sawhthing - Mizopa innghahna

Mizoramah sorkarna siam party lian pahnih (PC party tiam lo ta ila) MNF leh Congress kan nei tawh a, term khat mai an sorkar lo a, term tam tak an sorkar ve ve tawh a ni.

Heng party pahnih sorkarah khan thingtlang pa, kut hnathawka eizawngte bei a dawng em em a, ZPM hotu Pu Lalduhoma chuan chu harsatna chu hriain bana kaih (hand holding) policy hmanga khai chhuah a tum a, kan han inthlang a, hneh takin sorkarna an chang ta a ni.

Thingtlang kut hnathawka eizawng zingah sawhthing ching an tam hle a, a hralhna lamah pawh thuk takin sorkarah beiseina an nei a, an beisei ang ngei chuan sorkar pawhin kalpui a tum a, hlawhtling ngei se tih chu kan duhsakna a ni ang. Sawhthing hi thlai man man tak ni si, chhe hma deuh mai ni bawk si, sum hai luhna ṭha tak ni si a ni a; beiseina nen i lo thlirpui phawt mai teh ang.

Tun hnaiah sawhthing tâm a tam thu sawi a ni a, tun hnai lawkah pawh Hoticulture mithiamte chuan sawhthing tâm beihpui thlak tur hian an inko khawm a, hma an la mek a ni. Sawhting chingtute chuan dingdihlipin an lo thlir dawn a, an harsatna hi a theih ang anga chinfelsak an phu hle a ni.

MNF leh Congress sorkar kal tawh khan sawhthing hralh chungchangah nasa takin an bei lo tih kan hre vek a, tunah Pu Duhoma ho lakah hian rinna an nghat thui hle. Chung an rinna chu sorkar pawh hian tihhlawhtlinsak ngei se, kum pui lingleta an thawh chhuah hlâwkpui nan han hmantir hlauh se a duhawm khawp mai.

ZPM hi thla 8 vel chauh a vawng vuanin a sorkar ve dek dek a, MNF leh Congress paty chuan an han er em em khawp a. An sorkar laia an tih theih loh Zoram mipui, a bikin kut hnathawk tan hma a han la a, sawiselna lamah an hmanhlel ta em em maite hi a zahthlak lam mah a ni. Kum khat tal sorkar ve phawt se, an hmalakna a ṭhat loh chuan sawisel ta zawk se an party a zahawm phah zawkin a rinawm.

Sorkarah chuan eptu party hian ram an hmangaih ber emaw tih tur hian sorkar hmalakna tlema he deuh an hmuh chuan nasa takin an sawisel ṭhin a, sawiselna ṭha a awm laiin mipuia puang mai loin a nihna tur taka thlente hi chin a ṭha khawp mai. An sorkar laia an hnathawh kan hriat ve hi maw.

- Lal Rinmawia